މާލޭގައި މާދަމާ ފެށުމަށް ހަމަޖެހިފައިވާ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕަށް ހާއްސަކޮށްގެން ތައްޔާރުކުރި ލަވަ ލޯންޗުކޮށް ދެއްވައި، މުބާރާތުގައި ވާދަކުރާ ގައުމީ ޖޫނިއާ ޓޭބަލް ޓެނިސް ޓީމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހްމަދު ހިތްވަރު ދެއްވައިފި އެވެ.
މާދަމާ އިން ފެށިގެން އަންނަ ބުދަ ދުވަހުގެ ނިޔަލަށް ކުރިއަށްދާ ސަރަހައްދީ ޖޫނިއާ މުބާރާތުގައި ހަ ގައުމަކުން 85 ކުޅުންތެރިން ވާދަކުރާނެ އެވެ. މި މުބާރާތަށް ތައްޔާރުވުމުގެ ގޮތުން ގައުމީ ޓީމުން އެންމެ ފަހުގެ ފަރިތަކުރުންތައް ކުރިއަށް ގެންދަމުން އަންނައިރުު، ޓީމު މިހާރު ވަނީ ބީހައިވް ހޮޓެލްގައި ކޭމްޕް ވެސް ކޮށްފަ އެވެ.
ރޭ ސޯޝަލް އިންޑޯގައި ބޭއްވި އިވެންޓްގެ ތެރެއިން ޓީޓީ މުބާރާތަށް ތައްޔާރުކުރި ލަވަ ދައްކާލަނީ.--- ފޮޓޯ: މުހައްމަދު ޝާބިން/ އަދަދު
ރައީސުލްޖުމްހޫރިއްޔާގެ އަނބިކަނބަލުން، ފަޒްނާ ވަނީ މުބާރާތުގައި ވާދަކުރާ ގައުމީ ޖޫނިއާ ޓޭބަލް ޓެނިސް ޓީމާ ރޭ ބައްދަލުކުރައްވާ ހިތްވަރު ދެއްވާފަ އެވެ. މި ބައްދަލުކުރެއްވުމުގައި ފަޒްނާ ވަނީ ގައުމަށް ރީތި ނަން ހޯދައިދިނުމަށް ޓީމުން ކުރަމުން އަންނަ މަސައްކަތް ފާހަގަކޮށް އެ ކުޅުންތެރިންނަށް ކާމިޔާބަށް އެދޭކަމަށް ވިދާޅުވެފަ އެވެ. އަދި ހުރިހާ ކުޅުންތެރިން ވެސް ހިތްވަރާ އެކު ކޮންމެ މެޗެއްގައި ވެސް ގައުމީ ޖޯޝާއި ރޫހުގައި ކުޅޭނެ ކަމަށް އުއްމީދު ކުރައްވާ ކަމަށް ވިދާޅުވި އެވެ.
މި ބައްދަލުކުރެއްވުމުގައި މެޑަމް ފަޒްނާ ވަނީ މުބާރާތަށް ޙާއްސަކޮށް ތައްޔާރުކޮށްފައިވާ ލަވަ ލޯންޗުކޮށް ދެއްވާފަ އެވެ. ސިމްބޮލިކް ރެކޯޑްސް އިން ތައްޔާރުކުރި މި ލަވަ އަކީ ޓީޓީ މުބާރާތަކަށް ރާއްޖޭގައި ތައްޔާރުކުރި ފުރަތަމަ ލަވަ އެވެ. ލަވަ އެޑިޓްކުރީ ޕަބްލިކް ސާވިސް މީޑިއާ (ޕީއެސްއެމް) އެވެ.
ސައުތު އޭޝިއާ މުބާރާތަށް ރާއްޖޭގެ ޓީޓީ އެސޯސިއޭޝަނާއި ޔޫތު މިނިސްޓްރީ އިން ވެސް އަންނަނީ މުބާރާތް ޕްރޮމޯޓްކުރުމާއި އިންތިޒާމްގެ ކަންކަން ކުރަމުންނެވެ. އެ ގޮތުން މުބާރާތުގެ މެޗުތައް ކުރިއަށްދާ ޒުވާނުންގެ މަރުކަޒު އެތެރެ ކޯޓު އޭސީ ކުރުމުގެ މަސައްކަތް މިހާރުވަނީ ނިމިފަ އެވެ. ޔޫތު މިނިސްޓަރު އަހުމަދު މަހުލޫފް ވިދާޅުވީ މިއީ 30 އަހަރު ތެރޭ ޒުވާނުންގެ މަރުކަޒު އޭސީ ހަރުކުރާ ފުރަތަމަ ފަހަރު ކަމަށެވެ.
އަދި މީގެ އިތުރުންވެސް އިންޑޯ ހޯލު މަރާމާތުކޮށް މުޅި ހޯލު އެއްކޮށް ޒީނަތްތެރިކުރުމުގެ މަސައްކަތް ވެސް ދަނީ ކުރިއަށެވެ. އަދި މުބާރާތުގެ ފޯރިގަދަ ކުރުމަށް މިނިސްޓްރީ އާއި ޓީޓީ އެސޯސިއޭޝަނުން ވަނީ ސަރުކާރު ހިއްސާވާ ކުންފުނިތަކުގެ ވެރިންނާ ބައްދަލުކޮށް، މެޗުތައް ބަލަން މީހުން ދިއުމުގެ އިންތިޒާމްތަކާ ބެހޭގޮތުން މަޝްވަރާ ކޮށްފަ އެވެ.
ޓީޓީ މުބާރާތުގައި ވާދަކުރާ ގައުމުތަކުގެ ކުޅުންތެރިން އިއްޔެ އިން ފެށިގެން ވަނީ ރާއްޖެ އަންނަން ފަށައިފަ އެވެ.
