ގުދުސް (މޭ 5) - ޖަރުމަނުވިލާތުގެ ކުރީގެ ޑިކްޓޭޓަރު އެޑޯލްފް ހިޓްލަރަކީ ޔަހޫދީއެއް ކަމަށް ސިފަކޮށްފައި ވާތީ ރަޝިއާގެ ރައީސް ލެޑިމިއަ ޕުޓިން މައާފަށް އެދިވަޑައިގެންފި އެވެ.
މި ހަފްތާގައި އިޓަލީގެ ޓީވީ ޗެނަލަށް ރަޝިއާގެ ފޮރިން މިނިސްޓަރު ސާގެއި ލެވްރޯވް ދެއްވި އިންޓަވިއުގައި ވިދާޅުވީ "ހިޓްލަރުގެ ގައިގައި ވެސް ޔަހޫދީ ލޭ ދައުރުވި" ކަމަށެވެ.
އެކަމާ ގުޅިގެން އިޒްރޭލުން ނުރުހުން ފާޅުކޮށް، ރަޝިއާގެ ސަފީރު ހާޒިރު ކުރި އެވެ. އިޒްރޭލްގެ ބޮޑު ވަޒީރު ނަފްތާލީ ބެނެޓް ބުރާސްފަތި ދުވަހު ވިދާޅުވީ ޕުޓިން މައާފަށް އެދިވަޑައިގެންނެވި ކަމަށެވެ.
"ބޮޑު ވަޒީރު ވަނީ ރައީސް ޕުޓިންގެ ވާހަކަތައް ބަލައިގަނެ، ޝުކުރު އަދާ ކުރައްވާފައި،" ބެނެޓްގެ އޮފީހުން ނެރުނު ބަޔާނެއްގައި ބުންޏެވެ.
ޕުޓިން އާއި ބެނެޓް ފޯނުން ވާހަކަ ދެއްކެވި ކަމަށް ބުނެ، ރަޝިއާ ސަރުކާރުން ނެރުނު ބަޔާނުގައި ޕުޓިން މައާފަށް އެދިވަޑައިގެންނެވިކަން ހާމަކޮށްފައެއް ނުވެ އެވެ.
މީގެ ކުރިން އިޒްރޭލްގެ ފޮރިން މިނިސްޓަރު ޔެއާ ލެޕިދް ނެރުއްވި ބަޔާނެއްގައި ލެވްރޯވްގެ ވާހަކަ ކުށްވެރި ކުރައްވައި، އެއީ މައާފް ނުކުރެވޭނެ އަދި ތާރީހީ ގޮތުން ކުށް މައުލޫމާތު ހިމެނޭ ވާހަކައެއް ކަމަށް ވިދާޅުވި އެވެ.
ފެބްރުއަރީ 24 ވަނަ ދުވަހު ރަޝިއާ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން އިޒްރޭލުން މަސައްކަތް ކުރަނީ ވަކި އަތަކަށް ނުޖެހި އޮތުމަށެވެ.
އަސްކަރީ އެހީތެރިކަމަށް ޔޫކްރެއިނުން އެދުނު ނަމަވެސް، އިޒްރޭލުން މިހާތަނަށް އަސްކަރީ އެހީ ފޯރުކޮށްދީފައެއް ނުވެ އެވެ.
އޭގެ ބަދަލުގައި އިޒްރޭލުން ފޯރުކޮށްދިނީ ސިއްހީ މަސައްކަތްތެރިންނަށް ބުލެޓް ޕްރޫފް ޖެކެޓާއި ހެލްމެޓް އަދި ފީލްޑް ހޮސްޕިޓަލެކެވެ.
