ކުރީގެ ރައީސް އަބްދުالله ޔާމީން އަބްދުލްގައްޔޫމް ޓްވިޓާ ބޭނުން ކުރައްވަން ފައްޓަވައިފި އެވެ. މިރޭ އެމަނިކުފާނު ވަނީ ފުރަތަމަ ފަހަރަށް ޓްވީޓް ވެސް ކުރައްވާފަ އެވެ.
ޕީޕީއެމްގެ ތަރުޖަމާނު ހީނާ ވަލީދު މި ނޫހަށް ވިދާޅުވި ގޮތުގައި, "އަބްދުالله ޔާމީން"ގެ ނަމުގައި ހުޅުވާފައިވާ އެކައުންޓަކީ ރައީސް ޔާމީންގެ އަމިއްލަފުޅު ރަސްމީ ޓްވިޓާ އެކައުންޓެވެ. ހީނާ ފާހަގަ ކުރެއްވި ގޮތުގައި, މިއީ ރައީސް ޔާމީން ޓްވިޓާ ބޭނުން ކުރައްވާ ފުރަތަމަ ފަހަރެވެ.
ޔާމީން މިރޭ ފުރަތަމަ ކުރެއްވި ޓްވީޓްގައި ގައުމީ ދިދައާއެކު ވިދާޅުވެފައިވަނީ ދިވެއްސަކަށްވީތީ ފަހުރުވެރިވާ ވާހަކަ އެވެ.
ވެރިކަމަށް ވަޑައިގެންނެވުމުގެ ކުރިން އަދި ވެރިކަމުގައި ހުންނެވިއިރު ވެސް ޔާމީން އަމިއްލަ ޓްވިޓާ އެކައުންޓެއް ނުގެންގުޅުއްވަ އެވެ. ނަމަވެސް, އެމަނިކުފާނުގެ ނަމުގައި ތަފާތު ޓްވިޓާ އެކައުންޓްތައް ޕާޓީންނާއި އޭރުގެ ސަރުކާރުން ހިންގާފައިވެ އެވެ.
ޔާމީން ޓްވިޓާއަށް ވަދެވަޑައިގެންނެވިއިރު, ކުރީގެ ރައީސުން ކަމަށްވާ މައުމޫން އަބްދުލްގައްޔޫމް އަދި މުހައްމަދު ނަޝީދަކީ އާންމުކޮށް ޓްވީޓް ކުރައްވާ ދެ ބޭފުޅުންނެވެ. ކުރީގެ ރައީސް ޑރ. މުހައްމަދު ވަހީދު ވެސް ޓްވިޓާ ބޭނުން ކުރައްވާއިރު, މިހާރުގެ ރައީސް އިބްރާހިމް މުހައްމަދު ސޯލިހް ވެސް ޓްވީޓް ކުރައްވަ އެވެ.
ޓްވިޓާގައި ޔާމީންގެ އެކައުންޓެއް ހުޅުވިއިރު, އެމަނިކުފާނު މިހާރު ހުންނެވީ ޖަލު ހުކުމުން މިނިވަންވެ ގެކޮޅުގަ އެވެ. ނަމަވެސް, މަނީ ލޯންޑްރިންގެ ދެ މައްސަލައެއްގެ ޝަރީއަތް މިހާރު ވެސް ކޯޓުގައި ކުރިއަށްދެ އެވެ.
ސިޔާސީ ގޮތުން ޔާމީން މިހާރު އެންމެ ބޮޑަށް ކުރައްވަމުން ގެންދަވާ ކަމަކީ, އިންޑިއާ ސިފައިން ރާއްޖޭގައި ތިބުމާ ދެކޮޅަށް ހިންގަވާ "އިންޑިއާ އައުޓް" ކެމްޕެއިންނެވެ. އެ ކެމްޕެއިންގައި ގިނަ ރަށްރަށަށް ވަޑައިގެން ޔާމީން ޝުއޫރު ފާޅުކުރައްވާފައިވާއިރު, ޓްވިޓާ އެކައުންޓްގެ އެންމެ ބޮޑު ބޭނުމަކީ ވެސް އެ ކެމްޕެއިން ފުޅާ ކުރުން ކަމުގައި ބެލެވެ އެވެ.
