މިދިޔަ ހޯމަ ދުވަހު ފުވައްމުލައް ސިޓީ ކައިރިން ޑައިވިންއަށް ގޮސް އުޅެނިކޮށް ގެއްލުނު މުހައްމަދު "ސައިއްޓޭ" ސައީދު ހޯދުމުގެ އޮޕަރޭޝަނުގެ ތެރެއިން މިއަދު ކަނޑުގެ 68 މީޓަރު އަޑިން ޑައިވް ބެލްޓެއް ހޯދިފައިވާ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފި އެވެ.
ސިފައިން ބުނީ، ސައީދު ހޯދުމުގެ މަސައްކަތުގައި ބަލާ ސަރަހައްދުގެ ކަނޑުގެ 68 މީޓަރު އަޑިން މިއަދު ޑައިވް ބެލްޓެއް ފެނިފައިވާ ކަމަށެވެ. އަދި އެ އޮޕަރޭޝަނުގެ ތެރެއިން މިއަދު ވެސް ހަތަރު ޑައިވްއެއް ސިފައިން ކޮށްފައިވާ ކަމަށެވެ. ނަމަވެސް އަދިވެސް ސައީދު ފެނިފައިނުވާ ކަމަށް އެމްއެންޑީއެފުން ބުންޏެވެ.
ފުވައްމުލަކު ނެރު ކައިރިއަށް ގެއްލުނު ސައީދު ހޯދުމުގެ އެ އޮޕަރޭޝަނުގައި އިއްޔެ މަސް ބާނަން ގެންގުޅުނު ކަމަށް ބެލެވޭ އާލާތެއް ވެސް ވަނީ ހޯދައިފަ އެވެ. ސައީދު ގެންގުޅުނު ކަމަށް ބެލެވޭ އެ އާލާތް ހޯދިފައިވަނީ 59 މީޓަރު އަޑިންނެވެ.
ސައީދު ހޯދުމުގެ އޮޕަރޭޝަން އިތުރަށް ފުޅާކޮށް، ޑޯނިއާ އާއި ހެލިކޮޕްޓަރު ވެސް ބޭނުން ކުރަމުންދާ ކަމަށް އެމްއެންޑީއެފުން ބުންޏެވެ.
ވިއްސަކަށް އަހަރުގެ ޑައިވިން ތަޖުރިބާހުރި ސައީދު ފީނަން ފޭބީ ހޯމަ ދުވަހުގެ މެންދުރުފަހުގެ ވަގުތެއްގަ އެވެ.
ފީނަން ފޭބިއިރު އޭނާ ލައިގެން ހުރީ ކަޅު ކުލައިގެ ޑައިވިން ސޫޓަކާއި ކަޅުކުލައިގެ ފިންސަކާއި އަދި ކަޅުކުލައިގެ މާސްކެއް ކަމަށާއި އަދި އޭނާގެ އަތުގައި ރީނދުލާއި އޮރެންޖު ކުލައިގެ ބެލޫނެއް އޮތް ކަމަށް އެމްއެންޑީއެފުން ބުންޏެވެ.
ޑައިވް ބެލްޓަކީ އާންމު ގޮތެއްގައި ޑައިވްކުރާއިރު ބަރުދަން ހިފަހައްޓައި އަޑީގައި އޮތުމަށް ބޭނުންކުރާ ބެލްޓެކެވެ.
