ރޯދަމަސް ނިމުމާއެކު ބާޒާރުން ގާތްގަނޑަކަށް ކަރާ ހުސްވެ، އަގު ދެ ގުނައަށް އުފުލިއްޖެ އެެވެ.
ރޯދަ މަހުގެ ތެރޭގައި އއ. ތޮއްޑޫގެ އިތުން ބައެއް އެހެން ރަށް ރަށުންނާއި އިންޑިއާ އިން ވެސް ގިނަ އަދަދަކަށް ކަރާ އެތެރެ ކުރި އެވެ. ރޯދަމަހު ބާޒާރުގައި ކަރާ ކިލޯ އެއްގެ އަގު އެވަރެޖްކޮށް ހުރީ 25ރ. އަށެވެ.
މާރުކޭޓުގެ ވަރަށް މަދު ގޮޅިއަކުން ނޫނީ މިހާރު ކަރާ ލިބޭކަށް ނެތެވެ. ކަރާ ކިލޯ އެއްގެ އަގު ވަނީ 45ރ. އަށް އުފުލިފަ އެެވެ. މިވަގުތު ލިބެން ހުރީ ވެސް އިންޑިއާ ކަރާ އެކަންޏެވެ. ރޯދަމަސް ނިމުނުއިރު ތޮއްޑޫގެ ދަނޑުތަކުން ވަނީ ކަރާ ހުސްވެފަ އެވެ.
"މިހާރު ކަރާ ގަންނަން ވެސް ލިބެނީ 38ރ. އަށް ކިލޯ އެއް، 45ރ. އަށް މި ވިއްކަނީ، ބާޒާރުގައި ހަމަ އެއްގޮތަކަށް ވެސް މިވަގުތު ކަރާ ނެތީމަ އަގު ބޮޑުވެގެން މިއުޅެނީ، އިންޑިޔާ އިން ކަރާ އައިހާ އަވަހަކަށް އަގު ދަށަށްދާނެ،" މަޖީދީމަގުގައި ހުންނަ މާރުކޭޓުގެ ގޮޅިއަކުން ވާހަކަ ދެއްކި މީހަކު ބުންނެވެ.
މަޖީދީމަހުގައި ހުންނަ މާރުކޭޓުން މީހުން ވިޔަފާރި ކުރަނީ: ރޯދަމަހު އެންމެ ޑިމާންޑް ބޮޑުވީ ކުއްޅަފިލާ ފަތަށް-- އަދަދު ފޮޓޯ އަހުމަދު ސައީދު
މިއަހަރުގެ ރޯދަމަހު އެންމެ ގިނައިން ވިކުނީ ކުއްޅަފިލާ ފަތް
ބާޒާރުމަތީގައި ހުންނަ އެންމެ ބޮޑު ލޯކަލް މާރުކޭޓުގެ ބައެއް ގޮޅިތަކުން ބުނި ގޮތުގައި މި އަހަރުގެ ރޯދަ މަހަކީ އެމީހުންނަށް އެންމެ ރަނގަޅު ރޯދަމަހަކަށް ނުވި އެވެ. ސަބަބެއް ކަމަށް އެމީހުން ބުނަނީ، ކޮޑިވް-19 ގެ ތެރޭގައި އުފެދުނު ގޭދޮށު މާރުކޭޓު ތަކެވެ.
"މި ރޯދައަށް ވެސް ހަތަރު މާރުކޭޓު އެއްގަމު ތެރޭގައި ހުޅުވައިފި، އެހެން ވީމަ، މި މާރުކޭޓަށް އަންނަ މީހުން ވަރަށް މަދުވޭ އެބަ،" ލޯކަލް މާރުކޭޓުގެ ގޮޅިއެއްގައި ކުރުނބާ ވިއްކާ މުހައްމަދު ބުންޏެވެ.
ގޮޅިތަކުން ބުނާ ގޮތުގައި ފާއިތުވި ރޯދަމަހު، އެންމެ ބާރަށް ވިކުނު އެއްޗަކީ ކުއްޅަފިލާފަތެވެ. މާރުކޭޓަށް ކުއްޅަފިލާ ފަތް ގެންނަނީ ހުޅުމާލެ އިންނާއި ރަށް ރަށުންނެވެ. ދެ އިނގިލި ވަށާ ޖެހޭ ވަރުގެ ދެ ބޮނޑި ކުއްޅަފިލާ ފަތް ރޯދަ މަހު ވިއްކަން ހުރީ، 25ރ. އަށެެވެ.
"ރޯދަމަހުގެ އެންމެ ފަހު ދުވަހު އެކަނި ވެސް 140 ބޮޑި ފަތް ވިކުނު، އޮންނަނީ ހަމަ ނުގެނެވިފައި،" ގޮޅިއެއްގައި ފަތް ވިއްކާ ބިދެސީއެއް ކަމަށްވާ ކަރީމް ބުނެންޏެވެ.
ގިތެޔޮ މިރުހުގެ އަގު ވެއްޓިއްޖެ
ރޯދަމަސް ފެށުނުއިރު، ގިތެޔޮ މިރުހާއި ލުނބޯގެ އަގު ހުރީ އިންތިހާ އަށް މަތިގަ އެވެ.
ބާޒާތުގައި އޭރު މަދުވެފައިވާ އެ ދެ ބާވަތުގެ ތެރެއިން، ލުނބޯގެ އަގު އޭރު ހުރީ 140ރ. އަށް ކިލޯ އެކެވެ. ގިތެޔޮ މިރުސް ކިލޯ އެއް ވިއްކީ 700ރ. އަށެެވެ.
މިހާރު ބާޒާރުގައި ލިނބޯ ކިލޯއެއްގެ އަގު 50ރ. އަށްވުރެ ދަށަށް ގޮސްފައިވާއިރު، ގިތެޔޮ މިރުހުގެ އަގު ވަނީ ކިލޯ އެއް 240ރ. އަށް ވެއްޓިފަ އެެވެ.
