އިސްތަންބޫލް، ތުރުކީ (މޭ 3) - ސީރިއާގައި ގެދޮރާއި އެހެނިހެން އިންފްރާސްޓްރަކްޗާ ބިނާކޮށް، މިލިއަނަކަށް ވުރެ ގިނަ ރެފިއުޖީން އަނބުރާ ގައުމަށް ފޮނުވަން މަސައްކަތް ކުރައްވާނެ ކަމަށް ތުރުކީގެ ރައީސް ތައްޔިބް އުރުދުގާން ވިދާޅުވެއްޖެ އެވެ.
ތުރުކީގެ ދެކުނުގައި އޮންނަ ސީރިއާގައި 2011 ވަނަ އަހަރު ފެށި ދާހިލީ ހަނގުރާމައާ ހެދި، 3.6 މިލިއަން ސީރިއާ ރައްޔިތުން ދިރިއުޅެނީ ތުރުކީގައި ރެފިއުޖީންގެ ގޮތުގަ އެވެ.
ރެފިއުޖީންގެ މައްސަލައާ ހެދި ތުރުކީ ރައްޔިތުން ހިތްހަމަނުޖެހޭ އިރު، އަންނަ އަހަރު އޮންނަ ރިޔާސީ އަދި މަޖިލިސް އިންތިހާބުގެ ކުރިން އެކަން ހައްލު ކުރުމަށް ވަނީ ޕްރެޝަރު ބޮޑުވެފަ އެވެ.
"ސީރިއާގެ އެއް މިލިއަން މީހުން އަނބުރާ ގައުމަށް ދެވޭނެ ގޮތް ހެދުމަށް ބޮޑު މަޝްރޫއެއް އަޅުގަނޑުމެން އެބަ ރާވަން،" ވީޑިއޯ މެދުވެރިކޮށް އުރުދުގާން ވިދާޅުވި އެވެ.
އުރުދުގާން ވިދާޅުވީ ސަރުކާރުން މަސައްކަތް ކުރާނީ ތުރުކީ އާއި ބޭރުގެ އަމިއްލަ ޖަމާއަތްތަކާ އެކުގައި އެއް މިލިއަން ރެފިއުޖީން އަނބުރާ ސީރިއާއަށް ފޮނުވުމުގެ އަޒުމުގައި ކަމަށެވެ.
އުރުދުގާންގެ ވީޑިއޯ އާއްމު ކުރީ ހުޅަނގު އުތުރު ސީރިއާގެ އިދްލިބްގަ އެވެ. އެއީ އެ ތަނުގައި ތުރުކީއިން އެޅި ގެތަކުގެ ތަޅުދަނޑި ސީރިއާ ރައްޔިތުންނަށް ހަވާލު ކުރުމަށް ބޭއްވި ރަސްމިއްޔާތެއްގަ އެވެ.
އުރުދުގާން ވިދާޅުވީ 2016 ވަނަ އަހަރަށް ފަހު ތުރުކީ އާއި ސީރިއާގެ ބޯޑަރު ދެމެދުގައިވާ "ރައްކާތެރި ޒޯނަށް" 500،000 ރެފިއުޖީން ބަދަލުވެފައިވާ ކަމަށެވެ.
ތުރުކީ ސަރުކާރުގެ ވިސްނުމަކޯ ސީރިއާގައި އިތުރު ގެތައް އަޅައި، ގިނަ އަދަދެއްގެ ރައްޔިތުން އަނބުރާ ގައުމަށް ދިޔުމަށް ބާރު އެޅުމެވެ.
އޭގެ އިތުރުން ސްކޫލަކާޢި ހޮސްޕިޓަލެއް އެޅުމުގެ އިތުރުން، ސަރަހައްދީ އިގްތިސާދަށް ބޭނުންވާ އެހެން އިންފްރާސްޓްރަކްޗާ ބިނާ ކުރުމަށް ވެސް ތުރުކީއިން އެހީވާނެ އެވެ.
ތުރުކީގައި ޖުމްލަ ފަސް މިލިއަން ރެފިއުޖީން ދިރިއުޅޭ އިރު، އޭގެ ތެރޭގައި ގިނައިން ހިމެނެނީ ސީރިއާ އާއި އަފްގާނިސްތާނުގެ ރައްޔިތުންނެވެ.
