ޖަރުމަނުވިލާތުގެ ކުރީގެ ޑިކްޓޭޓަރު އެޑޯލްފް ހިޓްލަރަކީ ޔަހޫދީއެއް ކަމަށް ސިފަ ކުރުމުން، އިޒްރޭލުން ހިތްހަމަނުޖެހި، ރަޝިއާގެ ސަފީރު ހާޒިރުކޮށްފި އެވެ.
ފެބްރުއަރީ 24 ވަނަ ދުވަހު ރަޝިއާ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން އިޒްރޭލުން މަސައްކަތް ކުރަނީ ވަކި އަތަކަށް ނުޖެހި އޮތުމަށެވެ.
ނަމަވެސް އިޓަލީގެ ޓީވީ ޗެނަލަށް ރަޝިއާގެ ފޮރިން މިނިސްޓަރު ސާގެއި ލެވްރޯވް ދެއްވި އިންޓަވިއުގައި ދެއްކެވި ވާހަކަތަކާ ގުޅިގެން އިޒްރޭލުން ވަނީ ހިތްހަމަނުޖެހިފަ އެވެ.
ރަޝިއާއިން މީގެ ކުރިން ބުނީ ހަނގުރާމަ ފަށަން ޖެހުނީ ހަތިޔާރު އިތުރު ކުރުމާއި ހިޓްލަރުގެ "ނާޒީ" ވިސްނުން ޔޫކްރެއިންގައި އިތުރުވަމުން ދާތީ ކަމަށެވެ.
އެކަމަކު ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވީ އެމަނިކުފާނަކީ ޔަހޫދީއަކަށްވާ އިރު، ނާޒީ ވިސްނުން ނުހުންނާނެ ކަމަށެވެ.
އެ ވާހަކައަށް އިޝާރާތް ކުރައްވާ ލެވްރޯވް ވިދާޅުވީ "އަޅުގަނޑުގެ މައުލޫމާތު ގޯސްވެދާނެ" ކަމަށާއި "އެކަމަކު ހިޓްލަރުގެ ގައިގައި ވެސް ޔަހޫދީ ލޭ ދައުރުވި" ކަމަށެވެ.
އިޒްރޭލްގެ ފޮރިން މިނިސްޓަރު ޔެއާ ލެޕިދް ނެރުއްވި ބަޔާނެއްގައި ލެވްރޯވްގެ ވާހަކަ ކުށްވެރި ކުރައްވައި، އެއީ މައާފް ނުކުރެވޭނެ އަދި ތާރީހީ ގޮތުން ކުށް މައުލޫމާތު ހިމެނޭ ވާހަކައެއް ކަމަށް ވިދާޅުވި އެވެ.
ބަޔާނުގައި އިތުރަށް ބުނީ ރަޝިއާގެ ސަފީރު ހާޒިރުކޮށް ސުވާލުކޮށްފައިވާ ކަމަށެވެ. ބޮޑު ވަޒީރު ނަފްތާލީ ބެނެޓް ވެސް ވަނީ ލެވްރޯވްގެ "ދޮގުތައް" ކުށްވެރި ކުރައްވާފަ އެވެ.
