ދަރިންނަށް އުފާވެރި މުސްތަގުބަލެއް ހޯދައިދޭން އަމިއްލަ އެކައުންޓަށް ޖަމާކުރާ ފައިސާ ވަކި ހިސާބަކުން ނަގަން ޖެހިދާނެ އެވެ. ނުނަގާ ބެހެއްޓި ނަމަވެސް އާއްމު އެކައުންޓެއްގައި ނަމަ ރައްކާކުރެވެމުން ދާނީ ހަމަ އެކަނި އެ އެކައުންޓަށް ލީ އެއްޗެކެވެ. ބޭންކިންގެ އާއްމު އުސޫލާ އެއްގޮތަށް އެއްޗެއް އިތުރުވެއްޖެ ނަމަ ދީނީ ގޮތުން ހިތްހަމަނުޖެހިދާނެ އެވެ. މޯލްޑިވްސް އިސްލާމިކް ބޭންކުން މިހާރު ވަނީ މިކަމަށް ހަައްލެއް ހޯދައިދީފަ އެވެ.
ދަރިންގެ މުސްތަގްބަލަށް ފައިސާ ރައްކާކުރަން އެ ބޭންކުން ވަނީ ޝަރިއާ ހުއްދަ ކުރާ އުސޫލުން، އެހެން ނަމަވެސް ފައިސާ އިތުރުވާނެ ދެ އެކައުންޓެއް ތައާރަފްކޮށްފަ އެވެ. އެއީ "ކިޑްސް އެކައުންޓް" އަދި "ކާމިޔާބު ކިޑްސް އެކައުންޓް" އެވެ. މި ދެބާވަތުގެ އެކައުންޓަށް ޖަމާކުރާ ފައިސާއިން ވެސް އެމްއައިބީން ކުރާނީ ޝަރީއާ ހުއްދަކުރާ ވިޔަފާރި އެވެ. އެ ވިޔަފާރިން ލިބޭ ފައިދާއިން ރަނގަޅު މިންވަރެއް އެކައުންޓްގެ ވެރިންނަށް ވެސް ލިބޭނެ އެވެ.
ކިޑްސް އެކައުންޓުގެ ފައިދާ ބަހާނީ 30:70 ރޭޝިއޯއިން ( ކަސްޓަމަރަށް 30، ބެންކަށް 70 ) އޮންނަ ގޮތަށެވެ. ކާމިޔާބު ކިޑްސް އެކައުންޓްގެ ފައިދާ ބަހާނީ ރޭޝިއޯއިން 40:60 (ކަސްޓަމަރަށް 40، ބެންކަށް 60) އޮންނަ ގޮތަށެވެ.
ޝަރީއާ ހުއްދަކުރާ ބޭންކިންގެ މާކެޓަށް ބަލާއިރު އެމްއައިބީގެ އެކައުންޓްތަކަކީ ފައިދާ އެންމެ ބޮޑު އެއް އެކައުޓްތަކެކެވެ.
ދަރިންގެ މުސްތަގުބަލަށް ޓަކައި މި ދެބާވަތުގެ އެކައުންޓް ހުޅުވަން ބޭނުންވާ ފަރާތްތަަކަށް އެމްއައިބީގެ ކޮނެމް ބްރާންޗަކުން ވެސް އެ ހިދުމަތް ލިބޭނެ އެވެ.
