މިއުނިކް (މެއި 1) - ޖަރުމަނު ލީގުގައި ރޭ ކުޅުނު މެޗުތަކުން ލީގު ޗެމްޕިއަންކަން ޖެހިޖެހިގެން 10 ވަަނަ ފަހަރަށް ހޯދި ބަޔާން މިއުނިކާއި ލީގުގެ ދެ ވަނައިގައި އޮތް ޑޯޓްމަންޑް ބަލިވެއްޖެ އެވެ.
މައިންޒް ދަނޑުގައި އެ ޓީމުގެ އަތުން ބަޔާން ބަލިވީ 3-1 އިންނެވެ. އަދި ޑޯޓްމަންޑް ވަނީ އަމިއްލަ ދަނޑުގައި ބޮކުމް އަތުން 4-3 އިން ބަލިވެފަ އެވެ. މި ނަތީޖާތަކަށް ފަހު ބަޔާން އެއް ވަނައިގައި އޮތީ 32 މެޗުން 75 ޕޮއިންޓާ އެކު އެވެ. ދެ ވަނައިގައި އޮތް ޑޯޓްމަންޑަށް ވަނީ 32 މެޗުން 63 ޕޮއިންޓް ލިބިފަ އެވެ.
ޔޫރަޕްގެ ވަރުގަދަ ފަސް ލީގުގެ ތެރެއިން ފުރަތަމަ ފަހަރަށް ޖެހިޖެހިގެން 10 ފަހަރު ލީގު ހޯދި ޓީމުގެ ޝަރަފް ބަޔާނުން ހޯދީ މީގެ ހަފްތާއެއް ކުރިންނެވެ.
ރޭ ކުޅުނު މެޗުގައި މައިންޒުން ވަނީ ބަޔާން ކައިރީގައި މޮޅަށް ކުޅެ، ލަނޑު ޖަހާނެ ގިނަ ފުރުސަތުތައް ތަނަވަސްކޮށްފަ އެވެ. ތިން ގޯލު ޖެހުމުގެ އިތުރުން މައިންޒުން ފޮނުވާލި ހަތަރު ބޯޅައެއް ވަނީ ގޯލުގެ ދަނޑިއަށް ވެސް އަމާޒުވެފަ އެވެ.
މެޗުގެ ފުރަތަމަ 27 މިނިޓް ތެރޭ މައިންޒުން ދެ ގޯލުގެ ލީޑެއް ނެގި އެވެ. މި ގޯލުތައް ޖެހީ 18 ވަނަ މިނިޓްގައި ޖޮނަތަން ބުރްކާޑްޓާއި 27 ވަނަ މިނިޓްގައި މޫސާ ނިއަކާޓޭ އެވެ. މައިންޒުން ދެ ގޯލުގެ ލީޑެއް ނެތިތާ ފަސް މިނިޓް ފަހުން، މެޗުގެ 33 ވަނަ މިނިޓްގައި ރޮބަޓް ލެވަންޑޯސްކީ ވަނީ ބަޔާނަށް ގޯލެއް ޖަހައިދީފަ އެވެ. އެކަމަކު، ދެ ވަނަ ހާފުގައި ބަޔާނަށް އިތުރު ގޯލެއް ނުޖެހި، މެޗުގެ 57 ވަނަ މިނިޓްގައި މައިންޒްގެ ލެއަންޑްރޯ ބަރިއޭރޯ ޖެހި ގޯލުން އެ ޓީމު މޮޅުވީ އެވެ.
މިއީ ބަޔާން ލީގުގައި މި ފަަހަރު ބަލިވި ފަސް ވަނަ މެޗެވެ. މެޗަަށް ފަހު ބަޔާންގެ ކޯޗު ހޫލިއަން ނާގަލްސްމަން ބުނީ ލީގު ޔަގީންވުމާ އެކު ފަސޭހަކޮށްލެވިގެން ނުވާނެ ކަމަށެވެ. އަދި ބަޔާން މި މެޗުން ބަލިވުމުގެ އެންމެ ބޮޑު ސަބަބަކީ މެޗުން މޮޅުވުމުގެ ރޫހުގައި ޓީމުގެ ކުޅުން ނުފެނުން ކަމަށް ނާގަލްސްމަން ވަނީ ބުނެފަ އެެވެ.
ރޭ ޑޯޓްމަންޑް ދަނޑުގައި އަށް މިނިޓް ތެރޭ ބޮކުމް އިން ދެ ގޯލު ޖެހި އެވެ. މި ލަނޑުތައް ޖެހީ ސެބަސްޓިއަން ޕޮލްޓާ އާއި ގެރިޓް ހޯލްޓްމަން އެވެ. އެކަމަކު، ފުރަތަމަ ހާފުގައި ދެ ޕެނަލްޓީ ޖަހައި، ހާލަންޑް ވަނީ ޑޯޓްމަންޑަށް އެއްވަރުކޮށްދީފަ އެވެ.
މެޗުގެ 62 ވަނަ މިނިޓްގައި މާކޯ ރެއުސް ދިން ބޯޅައަކުން ހާލަންޑް ވަނީ ހެޓްރިކް ފުރިހަމަކޮށް، މެޗުގައި ފުރަތަމަ ފަހަރަށް ޑޯޓްމަންޑަށް ލީޑުނަގައިދީފަ އެވެ. ބޮކުމް މޮޅުވީ މެޗުގެ ފަހު 10 މިނިޓް ތެރޭ ދެ ގޯލު ޖަހައިގެންނެވެ. އެ ގޮތުން 81 ވަނަ މިނިޓްގައި ބޮކުމް އަށް އެއްވަރުކޮށްދިން ގޯލު ޖެހީ ޔާގެން ލޮކާޑިއާ އެވެ. އަދި އޭގެ ހަތަރު މިނިޓް ފަހުން ޕެނަލްޓީ އަކުން މިލޯސް ޕެންޓޮވިކް ޖެހި ގޯލުން ބޮކުމް ވަނީ މެޗުން މޮޅުވެފަ އެވެ.
ބޮކުމް އަތްދަށުވެ، ޑޯޓްމަންޑުން ކުރިމަތިލާން ޖެހުނީ މި ފަހަރު ލީގުގައި އެ ޓީމުގެ ނުވަ ވަަނަ ބައްޔާ އެވެ.
