ވެރިކަންކުރާ ކޯލިޝަނުގެ މައި ޕާޓީގެ އެމްޑީޕީގެ ޗެއާޕާސަންގެ މަގާމަށް އަންނަ ކެންޑިޑޭޓަކު "ސާފުތާހިރު" ވާންޖެހޭ ކަމަށް ވިދާޅުވެ، ޕާޓީގެ ރައީސް މުހައްމަދު ނަޝީދު ތާއީދުއޮތް ވަކި ކެންޑިޑޭޓަކަށް އޮތް ސަބަބު ސާފުކޮށް ދެއްވައިފި އެވެ.
އެމްޑީޕީގެ ޗެއާޕަސަންގެ މާގަމަށް އެއްކޮޅުން ކުރިމަތި ލައްވައިގެން ހުންނެވީ އިކޮނޮމިކް މިނިސްޓަރު ފައްޔާޒް އިސްމާއިލް އެވެ. އޭނާއާ ދެކޮޅަށް ވާދަކުރައްވަނީ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އެވެ.
ނަޝީދުގެ ތާއީދު އިންތިއަށް އޮތް އިތުރު ފައްޔާޒުގެ ފަހަތުގައި ހުންނެވީ ޕާޓީގެ އެންމެ އިސް ލީޑަރު އަދި ރައީސް އިބްރާހިމް މުހައްމަދު ސޯލިހު އެވެ.
އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅުގައި އެގައުމުގެ މަޝްހޫރު ދޫރުދަރުޝަން ޗެނަލަށް ދެއްވި އިންޓަވިއު އެއްގައި ނަޝީދު ވިދާޅުވީ އެމަނިކުފާނު ވެސް އަދި ރައީސް ސޯލިހު ވެސް ފާޅުގައި ވަކި ކެންޑިޑޭޓަކަށް ތާއީދު ކުރައްވާކަން ހާމަކުރައްވާފައިނުވާ ކަމަށެވެ.
ނަމަވެސް، އެމަނިކުފާނު ވެސް އަދި ރައީސް ސޯލިހު ވެސް އެ އިންތިހާބުގައި ބޭނުންވާ ގޮތް ވަރަށް ސާފު ކަމަށް ނަޝީދު ވިދާޅުވި އެވެ.
"އަޅުގަނޑު ގަބޫލުކުރަނީ ތެދުވެރި، އަދި ސާފުތާހިރު ކެންޑިޑޭޓަކު ވަރަށް ވެސް މުހިންމު ކަމަށް،" އިންތިއަށް ތާއީދުކުރައްވާ ސަބަބު ނުސީދާކޮށް ނަޝީދު ވިދާޅުވި އެވެ.
އަދި ޗެއާޕާސަންގެ މަގާމު ރައްޔިތުންގެ މަޖިލީހުގެ މެމްބަރަކަށް މާ ފުރިހަމައަށް އަދާކުރެއްވޭނެ ކަމަށް ގަބޫލުކުރައްވާ ކަމުގައި އެމަނިކުފާނު ވިދާޅުވި އެވެ.
އެ އިންތިހާބުގައި ދެ ކެންޑިޑޭޓުން ވެސް ވަރުގަދައަށް ކެމްޕޭނު ކުރަމުންދާއިރު، އެމްޑީޕީގެ ތެރޭގައި ވެސް ބައިބައިވުން އުފެދިފަ އެވެ. އަދި ދެ ފެކްޝަންގެ ދެމެދު ބަހުގެ ހޫނު ހަމަލާތައް ވެސް ދަނީ ބަދަލުކުރަމުންނެވެ.
ނަމަވެސް، ނަޝީދު އެ އިންޓަވިއުގެ ތެރެއިން ވަނީ އެ ވާދަވެރިކަމަކީ މާބޮޑު މައްސަލައެއް ނޫން ކަމަށް ވިދާޅުވެފަ އެވެ.
"ކޮންމެ ރަށެއް މިވަނީ ރީނދޫ ވެފައި. ފެންނަނީ އަޅުގަނޑުމެންގެ [އެމްޑީޕީ] ލޯގޯ. އަޅުގަނޑުމެންގެ އަޑުތައް. އަޅުގަނޑުމެންގެ މީހުން. ރަނގަޅު ދެ ކެންޑިޑޭޓުން އެބަ ވާދަކުރޭ. އެކަމަކު ހަގީގީ ކުލައަކީ ރީނދޫ،" އެމްޑީޕީގެ ޕާޓީ ކުލައަށް އިޝާރާތް ކުރައްވަމުން ނަޝީދު ވިދާޅުވި އެވެ.
