މިލާން (އޭޕްރީލް 26) - ޖޫން މަހުގެ އެއް ވަނަ ދުވަހު ދެކުނު އެމެރިކާގެ ޗެމްޕިއަން އާޖެންޓީނާއާ ދެކޮޅަށް އިޓަލީ ކުޅޭ މެޗަށް ފަހު ގައުމީ ޓީމަށް ކުޅުން ހުއްޓާލަން ކެޕްޓަން ޖިއޮޖިއޯ ކިއެލީނީ ނިންމައިފި އެވެ.
އިނގިރޭސިވިލާތުގެ މަޝްހޫރު ވެމްބްލީ ސްޓޭޑިއަމްގައި އިޓަލީ އާއި އާޖެންޓީނާ ވާދަކުރާ މެޗަކީ 2020 ވަނަ އަހަރު ދެކުނު އެމެރިކާގެ ފުޓްބޯޅަ އިދާރާ އާއި ޔޫރަޕްގެ ފުޓްބޯޅަ އިދާރާއިން ވެވުނު އެއްބަސްވުމެއްގެ ދަށުން ކުޅޭ މެޗެކެވެ. ދެ ބައްރުގެ ޗެމްޕިއަން ވާދަކުރާ މި މެޗަށް ކިޔަނީ "ފިނަލިއްސިމާ" ނުވަތަ "ގްރޭންޑް ފައިނަލް" އެވެ.
އިޓަލީގެ ކެޕްޓަން ކިއެލީނީ ގައުމީ ޓީމުން ރިޓަަޔާ ކުރަން ނިންމިކަން ހާމަކުރަމުން ބުނީ މި ވަގުތާއި ހާލަތަކީ ގައުމީ ޓީމުން ރިޓަޔާކުރަން އެންމެ ރަނގަޅު ދަނޑިވަޅު ކަމަށެވެ. އަދި މި ކަހަލަ ހާއްސަ މެޗަކަށް ފަހު ރިޓަޔާކުރަން ފުރުސަތު ލިބުމަކީ ވެސް ބޮޑު އުފަލެއް ކަމަށް ކިއެލީނީ ބުނެފައިވެ އެވެ.
"އާޖެންޓީނާއާ ދެކޮޅަށް ކުޅޭ ހާއްސަ މެޗަށްފަހު ރިޓަޔާކުރަން ލިބުމަކީ ބޮޑު އުފަލެއް. ގައުމީ ޓީމަށް ހިދުމަތްކޮށްދެވިއްޖެ ކަމަށް މި ބަލަނީ. އަހަރެން ފިޓުކޮށް ހުރެއްޖެއްޔާ މިއީ ގައުމީ ޓީމަށް އަހަރެންގެ ފަހު މެޗު" 37 އަހަރުގެ ޑިފެންޑަރު ބުންޏެވެ.
ކިއެލީނީ އުއްމީދުކޮށްގެން ހުރީ މިއަހަރު ގަތަރުގައި އޮންނަ ފީފާ ވޯލްޑް ކަޕަށް ފަހު ގައުމީ ޓީމުން ރިޓަޔާ ކުރާށެވެ. ނަމަވެސް ޕްލޭ އޮފް ބުރުގައި ނޯތު މެސެޑޯނިއާ އަތުން ބަލިވެ އިޓަލީ ވަނީ ޖެހިޖެހިގެން ދެ ވަނަ ވޯލްޑްކަޕަށް ކޮލިފައި ނުވެ ކަޓައިފަ އެވެ.
އިޓަލީއާ އެކު ކިއެލީނީ ހޯދި އެންމެ ބޮޑު ކާމިޔާބީ އަކީ 2020 ވަނަ އަހަރުގެ ޔޫރޯ ފުޓްބޯޅަ މުބާރާތް ކާމިޔާބުކުރުމެވެ. މިއީ 2012 ގެ ޔޫރޯގައި ސްޕެއިން އަތުން ބަލިވުމަށް ފަހު އިޓަލީގެ ކެޕްޓަންކަމާއި ހަވާލުވިފަހުން ކިއެލީނީގެ އެންމެ ބޮޑު ކާމިޔާބީ އެވެ.
އޭނާ އަކީ ހަތަރު ވަނަ އަށް އިޓަލީގެ ގައުމީ ޓީމަށް އެންމެ ގިނަ މެޗު ކުޅުނު ކުޅުންތެރިޔާ އެވެ. އެ ގޮތުން 2004 އިން ފެށިގެން މިއަދާ ހަމައަށް 116 މެޗު އިޓަލީގެ ގައުމީ ޓީމަށް ކުޅެދިންއިރު، ފަހުގެ ތާރީހުގައި އެ ގައުމުގެ ފުޓްބޯޅައިގެ އެންމެ އުނދަގޫ ހާލަތްތަކުގައި ޓީމުގައި ދެމިހުރެ އެހެން ކުޅުންތެރިންނަށް ނަމޫނާ ދެއްކި އެއް ކުޅުންތެރިއަކީ ކިއެލީނީ އެވެ.
