މެންޗެސްޓާ (އޭޕްރީލް 24) - އިނގިރޭސި ޕްރިމިއާ ލީގުގައި ރޭ އާސެނަލް އަތުން 3-1 އިން މެންޗެސްޓާ ޔުނައިޓެޑް ބަލިވި މެޗަށް ފަހު، ގަދަ ހަތަރެއްގެ ޖާގައެއް ހޯދުމަށް ޔުނައިޓެޑުން ކުރަމުންދާ އުންމީދު ގެއްލިއްޖެ ކަމަށް އެ ޓީމުގެ ކޯޗު ރާލްފް ރަންގްނިކް ބުނެފި އެވެ.
އަމިއްލަ ދަނޑުގައި ރޭ ޔުނައިޓެޑް އަތުން 3-1 އިން މޮޅުވެ، އާސެނަލް އިން ވަނީ ލީގު ތާވަލްގެ ހަތަރު ވަނައިގެ ކޮންޓްރޯލް ހޯދައިފަ އެވެ. ފަސް ވަނައިގައި އޮތް ޓޮޓެންހަމް ހޮޓްސްޕާގެ މައްޗަށް ދެ ޕޮއިންޓް ލީޑެއް އާސެނަލް އިން ހޯދާފައިވާއިރު، ހަ ވަނައިގައި އޮތް ޔުނައިޓެޑާ ދެމެދު އޮތް ފަރަގު ވަނީ ހަ ޕޮއިންޓަށް އިތުރުވެފަ އެވެ.
"މި މެޗުގެ ކުރިން ވެސް އަހަރަމެންނަށް (ގަދަ ހަތަރަކަށް އެރުމަށް) އޮތީ ކުޑަ ފުރުސަތެއް. އެކަމަކު، މި ނަތީޖާއެކު އެ ފުރުސަތު ގެއްލިއްޖެ،" މި ސީޒަންގެ ނިޔަލަށް ޔުނައިޓެޑްގެ ކޯޗުކަމާ ހަވާލުވެގެން ހުރި ރަންގްނިކް ބުންޏެވެ.
ހުސްވި ހަފުތާގައި ޔުނައިޓެޑް ވަނީ ލިވަޕޫލް އަތުން 4-0 އިން ރަށުން ބޭރުގައި ބަލިވެފަ އެވެ. މި މެޗަށް ފަހު ރަންގްނިކް ބުނީ މި ނަތީޖާއާ މެދު ޔުނައިޓެޑުން "ލަދުގަންނަންޖެހޭ" ކަމަށެވެ.
އަންނަ ސީޒަން އިން ފެށިގެން ޔުނައިޓެޑްގެ ކޯޗުކަމާ އަޔަކްސްގެ އެރިކް ޓެން ހާގް ހަވާލުވާނެ ކަމަށް ޔުނައިޓެޑް އިން އިއުލާންކުރީ އެ މެޗަށް ފަހު އެވެ.
ޔުނައިޓެޑްގެ މިޑްފީލްޑަރު ސްކޮޓް މެކްޓޮމިނޭ ބުނީ ޔުނައިޓެޑް ކޮޅަށް އާސެނަލް އިން ތިން ލަނޑު ޖެހުމަކީ ބަލައިގަނެވޭނެ ކަމެއް ނޫން ކަމަށެވެ. އަދި ބާކީ އޮތް ހަތަރު މެޗުން މޮޅުވެ، ސީޒަން ނިންމާލުމަކީ މިހާރު އެންމެ މުހިންމު ކަންތައް ކަމަށެވެ.
"ފަހު ހަތަރު މެޗުގައި އަހަރަމެންގެ އަގު ހިފަހައްޓަންޖެހޭ،" މެކްޓޮމިނޭ ބުންޏެވެ.
އާސެނަލް އަތުން ބަލިވުމާ އެކު ޔުނައިޓެޑަށް ވަނީ އިތުުރު ދަށް ރެކޯޑަކާ ކުރިމަތިލާން ޖެހިފަ އެވެ. އެންމެ ފަހުން ކުޅުނު މެޗުތަކުގެ ނަތީޖާ އަށް ބަލާއިރު، މިއީ 1981 ވަނަ އަހަރުގެ ފަހުން ޔުނައިޓެޑް ލީގުގައި ރަށުންބޭރުގައި ކުޅުނު މެޗުތަކުން ޖެހިޖެހިގެން ހަތަރު މެޗުން ބަލިވި ފުރަތަމަ ފަހަރެވެ.
