މިއުނިކް (އޭޕްރީލް 23) - ޖަރުމަނު ލީގުގެ ދެ ވަަނައިގައި އޮތް ބޮރޫޝިއާ ޑޯޓްމަންޑް އަތުން 3-1 އިން މިރޭ މޮޅުވެ، ބަޔާން މިއުނިކުން ޖަރުމަނު ލީގުގެ ޗެމްޕިއަންކަން ޖެހިޖެހިގެން 10 ވަނަ ފަހަރަށް ހޯދައިފި އެވެ.
މިއީ ބަޔާނުން ޖަރުމަނު ލީގު ހޯދި 31 ވަނަ ފަަހަރެވެ. ބާކީ ތިން މެޗު އޮއްވައި، ބަޔާނުން މި ފަހަރުގެ ލީގު ކަށަވަރުކުރިއިރު، 31 މެޗު ކުޅެގެން އެ ޓީމަށް ވަނީ 75 ޕޮއިންޓް ލިބިފަ އެވެ. ދެ ވަނައިގައި އޮތް ޑޯޓްމަންޑަށް ވަނީ 31 މެޗުން 63 ޕޮއިންޓް ލިބިފަ އެވެ.
މިއީ ޔޫރަޕްގެ ވަރުގަދަ ފަސް ލީގުގެ ތެރެއިން ލީގެއް ޖެހިޖެހިގެން 10 ފަހަރު ޓީމަކުން ހޯދި ފުރަތަމަ ފަހަރެވެ. މީގެ ކުރިން، ޔޫރަޕްގެ މަޝްހޫރު ފަސް ލީގުގެ ތެރެއިން ޖެހިޖެހިގެން އެންމެ ގިނަ ފަަހަރު ޖެހިޖެހިގެން ލީގު ތަށި ހޯދީ ނުވަ ފަހަރަށް އިޓާލިއަން ލީގު ކާމިޔާބުކުރި ޔުވެެންޓަސް އެވެ.
އަލިއާންޒް އެރީނާގައި މިރޭ ކުޅުނު މެޗުގެ 15 ވަނަ މިނިޓްގައި އޭރިއާ ރޮނގުކައިރިން ލިބުނު ފުރުސަތަކުން ވޮލީ އަކުން ގޯލު ޖަހައި ސާޖް ގްނަބްރީ ބަޔާނަށް ލީޑުނަގައިދިނެވެ. މެޗުގެ 27 ވަނަ މިނިޓްގައި ޑޯޓްމަންޑްގެ އާލިން ބްރައުޓް ހާލަންޑް ނަތީޖާ ހަމަހަމަކުރަން ޖެހި ބޯޅަ ދިޔައީ އަރިމަތިން ބޭރުންނެވެ.
ބަޔާނަށް ލީޑުފުޅާކޮށްދޭން ގްނަބްރީ ޖެހި ގޯލު ވަނީ އޮފްސައިޑް ކަމަށް ނިންމައިފަ އެވެ. އެކަމަކު، މެޗުގެ 34 ވަަނަ މިނިޓްގައި ތޯމަސް މުލާ ދިން ބޯޅައަކުން ރޮބަޓް ލެވަންޑޯސްކީ ވަނީ ބަޔާނަށް ދެ ވަނަ ގޯލެއް ޖަހައިދީފަ އެވެ. މިއީ ޑޯޓްމަންޑް ދޫކޮށް ބަޔާނަށް ބަދަލުވި ފަހުން އެ ޓީމާ ދެކޮޅަށް ކުޅުނު 26 މެޗުން ލެވަންޑޯސްކީ ޖެހި 27 ވަނަ ގޯލެވެ.
ދެ ވަނަ ހާފްގެ ކުޅުން ފަށައިގެން ހަތް ވަަަނަ މިނިޓްގައި ޕެނަލްޓީ އަކުން އެމްރޭ ޗާން ވަނީ ޑޯޓްމަންޑަށް ލަނޑެއް ޖަހައިދީފަ އެވެ. މިއީ ބަޔާންގެ ޔޯސުއާ ކިމިކް އޭރިއާތެރެއިން ޑޯޓްމަންޑްގެ މާކޯ ރެއުސް އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ. އޭގެ ފަހުން އޭރިއާތެރެއިން ޑޯޓްމަންޑްގެ ޖޫޑް ބެލިންހަމް އަށް ބަޔާންގެ ބެންޖަމިން ޕަވާޑް ކުރި ފައުލަކަށް ރެފްރީ ނިންމީ ޕެނަލްޓީ ނުދޭށެވެ. ނަތީޖާ ހަމަހަމަކުރަން ގޯލެއް ޖަހަން ހާލަންޑަށް ލިބުނު ދެ ފުރުސަތުގެ ބޭނުމެއް ނުހިފުނެވެ.
ބަޔާނަށް ތިން ޕޮއިންޓް ޔަގީންކޮށްދިން ގޯލު ޖެހީ ޒުވާން ފޯވާޑް ޖަމާލް މުސިއާލާ އެވެ. މެޗުގެ 83 ވަނަ މިނިޓްގައި ޑޯޓްމަންޑްގެ އޭރިއާތެރެއިން އެ ޓީމުގެ ޑިފެންޑަރުންނަށް ސަލާމަތްނުކުރެވިދިޔަ ބޯޅައެއް މުސިއާލާ އަށް ލިބުމުން އޭނާ ވަނީ ގޯލުގެ ކައިރީ ކަަނަށް ބޯޅަ ފޮނުވާލައިފަ އެވެ.
މިއީ މި ސީޒަނުގައި ބަޔާންގެ ކޯޗުކަމާ ހަވާލުވި 34 އަހަރުގެ ހޫލިއަން ނާގަލްސްމަންގެ ކޯޗިން ކެރިއަރުގައި ލިބުނު ފުރަތަމަ ލީގު ތަށްޓެވެ. އޭނާ އަކީ ޖަރުމަނު ފުޓްބޯޅައިގެ ތާރީހުގައި ލީގު ޗެމްޕިއަންކަން ހޯދި ދެ ވަނަ އަށް އެންމެ ޒުވާން ކޯޗެވެ. ކުރިން ހޮފެންހައިމް އާއި އާރްބީ ލައިޕްޒިގަށް ކޯޗުކޮށްދިން ނާގަލްސްމަން ބަޔާނާ އެކު ހޯދި ދެ ވަނަ މުބާރާތެވެ. ފުރަތަމަ ތަށްޓަކީ ޖަރުމަނު ސުޕަ ކަޕް އެވެ.
