ކްލަބް ވެލެންސިއާ އަށް ކުޅެމުން އަންނަ މިސްރުގެ މިޑްފީލްޑަރު ހަލީލް ޖަމާލް ކަކުލުގެ އޮޕަރޭޝަނެއް ކޮށްފި އެވެ.
ހަލީލް، 29، އެންމެ ފަހުން ކުޅެފައިވަނީ ލީގުގެ ފުރަތަމަ ބުރުގެ ފަހު މެޗުގައި މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށެވެ.
ވެލެންސިއާ އިން ވަނީ މި މަހު ފަސް ވަނަ ދުވަހު އޭއެފްސީ ކަޕްގެ ޕްރިލިމިނަރީ ފުރަތަމަ ބުރުގައި މާލޭގައި ބޫޓާންގެ ޕާރޯ އެފްސީއާ ދެކޮޅަށާއި ލީގުގެ ދެ ވަނަ ބުރުގައި މި މަހު އަށް ވަނަ ދުވަހު ޓީސީ ސްޕޯޓްސް ކްލަބާ ކުޅުމަށް ފަހު މިދިޔަ ހަފްތާގައި މާޒިޔާއާ ދެކޮޅަށް ކުޅެފަ އެވެ. މީގެއިން އެއްވެސް މެޗެއްގައި އަނިޔާގެ ސަބަބުން ހަލީލް ނުކުޅެ އެވެ.
ކުރިން ކްލަބް ގްރީން ސްޓްރީޓްސް އާއި ޓީސީ އަދި ފޯކައިދޫ ފުޓްބޯޅަ ޓީމަށް ފުރަތަމަ ޑިވިޝަނުގައި ކުޅުނު ހަލީލްގެ ކަކުލުގެ އޮޕަރޭޝަން ކުރީ އިއްޔެ އެވެ. ވެލެންސިއާގެ ހެޑް ކޯޗު އަހުމަދު މުޖުތަބާ (ފެސްކޯ) ބުނީ ހަލީލަށް ކުޅުމަށް އެނބުރި އާދެވޭނީ މަހެއްހާ ދުވަސް ފަހުން ކަމަށެވެ.
ޕްރެޒިޑެންޓްސް ކަޕްގައި ވެލެންސިއާގެ ހަލީލް (ވ) މެޗެއްގެ ތެރެއިން ބޯޅަ ހިފައިގެން.-- ފޮޓޯ: މުހައްމަދު ޝާބިން/ އަދަދު
"ކަކުލުގެ އެހާ ބޮޑު އޮޕަރޭޝަނެއް ނޫން. މެނިސްކަސް ސާޖަރީއެއް އެއީ. އެހެންވީމަ މި ބަލަނީ މަހެއްހާ ދުވަސް ފަހުން އާދެވޭނެ ކަމަށް،" ފެސްކޯ ބުންޏެވެ.
ހަލީލް އަށް ދެން ކުޅުމަށް އެނބުރި އާދެވޭނީ ލީގުގެ ދެ ވަނަ ބުރުގެ ފަހު މެޗުތަކަށެވެ. އެ މެޗުތައް އޮތީ ޖޫން މަހުގެ ތެރޭގަ އެވެ. އަންނަ މަސް ތެރޭގައި އޭއެފްސީ ކަޕާއި އޭޝިއަން ކަޕް ކޮލިފައިން އަށް ލީގު މެދުކަނޑާލާނެ އެވެ.
ކުޅުންތެރިންނަށް ދިމާވެފައިވާ އަނިޔާގެ މައްސަލަ އާއި ކްލަބްގެ މާލީ ހާލަތު ދަށްވުމުގެ ސަބަބުން ވެލެންސިއާ އޮތީ ފޯމު ގެއްލިފަ އެވެ. އެ ޓީމު އެންމެ ފަހުން ކުޅުނު މެޗުގައި މާޒިޔާ އަތުން ވަނީ 13-0 އިން ބަލިވެފަ އެވެ. މިއީ ފުރަތަމަ ޑިވިޝަނުގައި ވެލެންސިއާ އެންމެ ތަފާތު ބޮޑުކޮށް ބަލިވި މެޗެވެ.
ވެލެންސިއާ އިން ލީގުގައި މިރޭ ނުކުންނާނީ ކްލަބް ގްރީން ސްޓްރީޓްސްއާ ދެކޮޅަށެވެ. އެންމެ ފަހުން ޔުނައިޓެޑް ވިކްޓްރީ (ޔޫވީ) އިން ކުޅުނު މެޗުގައި ޓީސީ އަތުން މޮޅުވުމުން ވަނީ ތިން ވަނަ އަށް ޖެހިލައިފަ އެވެ. އަދި ވެލެންސިއާ ހަތަރަކަށް ވެއްޓިފަ އެވެ.
ތިން ވަނައިގައި ޔުނައިޓެޑް ވިކްޓްރީ އޮތީ 10 މެޗުން 14 ޕޮއިންޓާ އެކު އެވެ. ހަތަރެއްގައި އޮތް ވެެލެންސިއާ އަށް ނުވަ މެޗުން 13 ޕޮއިންޓް ލިބިފައިވާއިރު، މިރޭ ގްރީން ސްޓްރީޓްސް އަތުން މޮޅުވެގެން ވެލެންސިއާ އަށް އަލުން ތިން ވަނަ އަށް އެރޭނެ އެވެ. ވެލެންސިއާ އާއި ގްރީން ސްޓްރީޓްސްގެ މެޗު ފަށާނީ 22:00 ގަ އެވެ.
