އައްޑޫ ސިޓީގެ ހިތަދޫގެ ގޮނޑުދޮށަށް ގެއްލުންތަކެއް ދީފައިވާ މައްސަލައެއް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން ބަލަން ފަށައިފި އެވެ.
އީޕީއޭ އިން ބުނީ ހިތަދޫ ކުނިކޮށީގެ ދެކުނުން އޮންނަ ސަރަހައްދުގެ އެއްގަމާއި މޫދު ކޮނެ، ހޭޅި ފަށުން ގަސްނަގައި، އަދި އާނުގަނޑު ނަގައި ހަލާކުކޮށްލާފައިވާ މައުލޫމާތު ލިބިފައިވާ ކަމަށެވެ. އެހެންވެ، އެ މަސައްކަތް ހިނގާފައިވާ ގޮތުގެ ހުރިހާ ތަފްސީލެއް އަންނަ ބުދަ ދުވަހުގެ 12:00 ގެ ކުރިން ފޯރުކޮށް ދިނުމަށް އައްޑޫ ސިޓީ ކައުންސިލަށް އީޕީއޭއިން ވަނީ އަންގައިފަ އެވެ.
ހިތަދޫ ދެކުނު އަތިރިމަތީގެ އާނުގަނޑު ނަގާފައިވާ ފޮޓޯތަކެއް. ފޮޓޯ: އީޕީއޭ
އީޕީއޭއަށް ފޮނުވަންޖެހޭ މައުލޫމާތުގެ ތެރޭގައި މަސައްކަތުގެ ތަފްސީލާއި ބޭނުން، މަސައްކަތްކޮށްފައިވާ ތާރީހު އަދި އެ މަސައްކަތުގައި އިސްކޮށް އުޅުނު ފަރާތްތަކުގެ މައުލޫމާތު ހިމެނެ އެވެ.
އައްޑޫ ސިޓީ މޭޔަރު އަލީ ނިޒާރު ވިދާޅުވީ، އީޕީއޭގެ ހުއްދަ ނުނެގީ އެ ސަރަހައްދުގައި ސިޓީ ކައުންސިލުން ކުރި މަސައްކަތްތަކަކީ އެފަދަ ހުއްދައެއް ބޭނުންވާވަރުގެ މަސައްކަތެއް ކަމަށް ފާހަގަ ނުކުރެވޭތީ ކަމަށެވެ.
އަޅުގަނޑުމެން ކުރީ އެތަން ބޮޑަށް ސާފުކުރުމުގެ މަސައްކަތްތަކެއް. އާންމު ބީޗެއްގެ ގޮތަށް ތަރައްގީކުރަން. ގަސް ކެނޑުން ރުއް ކެނޑުން ކަހަލަ ކަމެއް ނުކުރަން އެތަނުގައި. އެހެންވެ ހުއްދައެއް ނުނެގީ،" ނިޒާރު ވިދާޅުވި އެވެ.
އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް ވިދާޅުވީ "ހުއްދަ ބޭނުންވޭތޯ ނިންމާނީ ކައުންސިލަކުން ނޫން" ކަމަށެވެ. އެފަދަ މަސައްކަތްތަކެއް ކުރާއިރު ކަންކުރަންވީ ގޮތާއި ހުއްދަ ހޯދަންޖެހޭ ގޮތް ލިޔެފައިވާ ކަމަށް ނައީމް ވިދާޅުވި އެވެ.
"ޝައްކެއް އުޅެންޏާ އެހެން ދޫކޮށްލުމަށްވުރެ، އަހައި އޮޅުންފިލުވުން އޮންނަ ގޮތަކީ،" ނައީމް ވިދާޅުވި އެވެ.
ހިތަދޫގެ ގޮނޑުދޮށް ހަލާކު ކޮށްލި ކަމަށް ބުނާ ސަރަހައްދަށް އީޕީއޭ އާއި އެންވަޔަރަމެންޓް މިނިސްޓްރީގެ ޓީމެއް ގޮސް ބެލި ބެލުމުން، ބިން ކޮނެ، މޫދު ކޮނެ، ޕޮންޑް ހަދައި، ރުއްގަސް ކަނޑައި، އަދި އާނުގަނޑު ނަގާފައި ހުރި ތަން ފެންނަން ހުރި ކަމަށް ނައީމް ވިދާޅުވި އެވެ.
