ގުދުސްގައި ހުންނަ އަލް އަގްސާ މިސްކިތުގެ ގޯތި ތެރޭގައި ގިނަ ބަޔަކު ނަމާދަށް ތިބި ވަގުތު، ޑްރޯންގެ އެހީގައި އިޒްރޭލް ފުލުހުން ކަރުނަ ގޭސް ޖަހައިފި އެވެ.
ރިޕޯޓުތައް ބުނާ ގޮތުން އޭގެ ސަބަބުން ނަމާދަށް ތިބި ގިނަ ބަޔަކަށް ކަރުނަ ގޭހުގެ އަސަރުކޮށް، ނޭވާ ހާސްވާން މެދުވެރިވި އެވެ. އެ މީހުންނަށް އެހީވީ ފަލަސްތީން ރެޑް ކްރެސެންޓުންނެވެ.
ހުކުރު ނަމާދުގެ ޖަމާއަތަށް 150،000 މީހުން އަލް އަގްސާ މިސްކިތަށް ދިޔަ އެވެ. އެ ޖަމާއަތަށް ކަރުނަ ގޭސް ޖެހުމުގެ ކުރިން، ހުކުރު ދުވަހުގެ ހެނދުނު ވެސް ހަމަނުޖެހުން ހިނގި އެވެ.
އަގްސާ މިސްކިތުގެ ގޯތި ތެރެއަށް ޔަހޫދީން ވެއްދުން ވަގުތީ ގޮތުން މެދުކަނޑާލަން މިސްކިތް ބަލަހައްޓާ ފަރާތުން ނިންމާފައި އޮތް ނަމަވެސް، އިޒްރޭލުން އެކަމަށް އިހްތިރާމެއް ނުކުރެ އެވެ.
އެގޮތުން ފަހަކަށް އައިސް ގިނަ އަދަދެއްގެ ޔަހޫދީން އަންނަނީ އަގްސާ މިސްކިތުގެ ގޯތި ތެރެއަށް ޒިޔާރަތް ކުރަމުންނެވެ. އެކަމަކީ ފަލަސްތީނު މީހުން ނުރުހޭ ކަމެކެވެ.
އެ މައްސަލަ ހޫނުވެ، ހުކުރު ދުވަހު ހެނދުނު ފަލަސްތީނުގެ ޒުވާނުންނާއި އިޒްރޭލް ފުލުހުންނާ ދެމެދު ކުރިމަތިލުން ހިނގި އެވެ. ހުކުރު ނަމާދަށް ފަހު ވެސް ކުރިމަތިލުންތައް ހިނގި އެވެ.
ހުޅަނގު އައްސޭރީގެ ނަބްލޫސްގައި ހިނގި ހަމަނުޖެހުންތަކުގައި އިޒްރޭލް ފުލުހުން ރަބަރު ބުލެޓާއި، ސްޓަން ގްރެނޭޑް އަދި ކަރުނަ ގޭސް ބޭނުންކުރި އެވެ.
މިދިޔަ ހަފްތާގެ ހުކުރު ދުވަހު އިޒްރޭލް ފުލުހުން އަލް އަގްސާ މިސްކިތުގެ ގޯތި ތެރެއަށް ވަދެ، ހިންގި ހަމަނުޖެހުމުގައި ފަލަސްތީނުގެ 152 މީހުންނަށް އަނިޔާވި އެވެ.
