އިމާރާތްކުރުމަށްޓަކައި ރާއްޖެއަށް އެތެރެކުރާ އަދި ރާއްޖޭގައި އުފައްދާ އެފަދަ ތަކެއްޗަށް ނަގަން ޖެހޭ ހުއްދަތައް ނަގައިގެން އެފަދަ މަސައްކަތްތައް ކުރުމަށް ޕްލޭނިން މިނިސްޓްރީން އަންގައިފި އެވެ.
އެ މިނިސްޓްރީން މިއަދު ނެރުނު އާންމު އިއުލާނެއްގައި ބުނީ އިމާރާތް ކުރުމަށް ބޭނުންކުރާ ތަކެތީގެ ތެރެއިން އިމާރާތް ކުރުމަށް ބޭނުންކުރާ ތަކެތި އެތެރެކުރުމާއި އުފެއްދުން ކޮންޓްރޯލް ކުރުމުގެ ގަވާއިދުގައި ބަޔާންކޮށްފައިވާ ބާވަތްތައް ރާއްޖެއަށް އެތެރެކޮށް ނުވަތަ އުފައްދަންވާނީ އެކަމަށްޓަކައި ނަގަންޖެގޭ ހުއްދަތައް ނަގައިގެންކަމަށް އިމާރާތްކުރުމުގެ ގާނޫނުގައި ބަޔާންކުރާ ކަމަށެވެ.
ގަވާއިދުގައި ބަޔާންކުރާ އެފަދަ ތަކެއްޗަކީ:
ސިމެންތި
- ހިލަ (ކޮންކްރީޓަށް ބޭނުންކުރާ ހުރިހާ ގްރޭޑެއްގެ ހިލަ)
- ވެލި (ކޮންކްރީޓަށް ބޭނުންކުރާ ހުރިހާ ވައްތަރެއްގެ ވެލި)
- ދަގަނޑު (ޢިމާރާތް ކުރުމުގެ ބޭނުމަށް ގެންނަ ސްޓްރަކްޗަރަލް ދަގަނޑު)
- ރެޑީމިކްސް ކޮންކްރީޓް (ހުރިހާ ގްރޭޑެއްގެ)
- ރެޑީމޭޑް ބްލޮކްސް (އިމާރާތް ކުރުމަށް ބޭނުންކުރާ ގާ)
ޕްލޭނިން މިނިސްޓްރީން ނެރުނު އިއުލާނުގައި ބުނީ އެފަދަ މަސައްކަތްތައް ކުރުމަށް އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދުގެ ދަށުން SY އަދި CM ކެޓަގަރީގައި ރަޖިސްޓަރީ ވެގެން ކަމަށެވެ.
ޕްލޭނިންއިން ބުނީ އެ އިއުލާންކުރާ ތާރީހުން ފެށިގެން އެއް މަސް ދުވަސްފަހުން އެފަދަ ތަކެތި ރާއްޖެ އެތެރެކޮށް، ނުވަތަ އުފައްދަނީ، ހުއްދަ ނަގައިގެންތޯ އެ މިނިސްޓްރީން ބަލާނެ ކަމަށެވެ. އަދި އެކަމަށްޓަކައި އެތަންތަނަށް ޒިޔާރަތްކުރާނެކަމަށް ޕްލޭނިންއިން ބުނެ އެވެ.
އެފަދަ މަސައްކަތްތަކަށް ބޭނުންވާ ހުއްދައަށް އެދޭ ފޯމު ޕްލޭނިން މިނިސްޓްރީގެ ވެބްސައިޓުން ލިބެން ހުންނާނެ އެވެ. އަދި އިތުރު މައުލޫމާތު ހޯދުމަށް quality.control@planning.gov.mv އަށް ނުވަތަ registration@planning.gov.mv އަށް މެއިލް ވެސް ކުރެވޭނެކަމަށް އެ މިނިސްޓްރީން ބުނެ އެވެ. ނުވަތަ ރަސްމީ ގަޑީގައި 4004830 ނުވަތަ 4004828 އަށް ގުޅައިގެން ވެސް މައުލޫމާތު ސާފުކުރެވޭނެކަމަށް ޕްލޭނިންއިން ބުނެ އެވެ.
