އުމުރުން ހަ އަހަރުގެ ކުޑަ އަންހެން ކުއްޖަކަށް އައްޑޫ ސިޓީގައި ޖިންސީ ގޯނާ ކުރި މައްސަލާގައި ހައްޔަރުކުރި އުމުރުން 59 އަހަރުގެ އަންހެން މީހާގެ ޝަރީއަތް ނިމެންދެން ބަންދު ކުރަން އައްޑޫ ސިޓީ ހިތަދޫ މެޖިސްޓްރޭޓް ކޯޓުން ނެރުނު އަމުރަށް ހައި ކޯޓުން ވެސް ތާއީދު ކޮށްފި އެވެ.
ހައި ކޯޓުގައި އެ އަންހެން މީހާގެ ފަރާތުން އިސްތިއުނާފް ކުރި މައްސަލަ ބެއްލެވީ ތިން ފަނޑިޔާރުންގެ ބެންޗަކުންނެވެ. އެއީ ރިޔާސަތުގައި އިންނެވި އިސް ފަނޑިޔާރު ހާތިފް ހިލްމީގެ އިތުރަށް ބެންޗުގައި ދެން ތިއްބެވި ފަނޑިޔާރު ހުސައިން ޝަހީދުއާއި، ފަނޑިޔާރު އަބްދުﷲ ހަމީދެވެ.
އިސް ފަނޑިޔާރު ހާތިފް ހިލްމީ ނެރުއްވި ރައުޔުއަށް ދެން ތިއްބެވި ފަނޑިޔާރުން ތާއީދު ކުރެއްވިއިރު، ފަނޑިޔާރު ހާތިފް ހިލްމީގެ ރައުޔުގައި ވަނީ އިސްތިއުނާފީ ގިނަ ނުކުތާތައް ބަލައިގަނެވެން ނެތް ކަމުގަ އެވެ.
މި ގޮތުން އެއް ނުކުތާއަކީ ފުލުހުން އެދިގެން ނެރުނު އަމުރަކަށް ވާތީ، އެއީ ކުޑަކުދިންނަށް ޖިންސީ ގޯނާ ކުރާ މީހުންނަށް ހާއްސަ އުސޫލުތަކަށް އަމަލު ކުރުމުގެ ގާނޫނާ ހިލާފަށް ނެރުނު އަމުރެއް ކަމުގަ އެވެ.
ފުލުހުން އެދިގެން ނެރުނު އަމުރަކަށް ވިޔަސް، އެ އަޑުއެހުމުގައި ޕްރޮސެކިއުޓަ ޖެނެރަލްގެ އޮފީހުން ބައިވެރިވެފައިވާތީ ދައުލަތުގެ ބައިވެރިވުން އޮތް ކަމުގައި ބެލެވޭ ކަމަށް ހައި ކޯޓުން ނިންމި އެވެ.
ހެއްކާ ގުޅޭ ގޮތުން ހުށަހެޅި އިސްތިއުނާފީ ނުކުތާއަށް ހައި ކޯޓުން ނިންމެވީ، ކުށުގެ ބާވަތަށް ބެލުމަށް ފަހު، ހެކިންނަށް ނުފޫޒު ފޯރުވުމާއި މުޖުތަމައަށް ނުރައްކާވެދާނެ ކަމަށް ބެލެވޭ ހާލަތު އޮތް ކަމުގަ އެވެ.
މި މައްސަލާގައި އުމުރުން ދުވަސްވީ އަންހެނަކު ހައްޔަރު ކުރި ނަމަވެސް، އެ ރަށު މީހުން ޖިންސީ ގޯނާގެ ތުހުމަތު ކުރަނީ ކުއްޖާގެ ކާފައަށެވެ.
ހައްޔަރު ކުރީ ކަމާނުބެހޭ މީހެއް ކަމަށް ބުނެ އައްޑޫ ސިޓީގެ އެ ކުއްޖާގެ ކާފަގެ ގޭ ދޮށުގައި ވަނީ މުޒާހަރާ ވެސް ކޮށްފަ އެވެ. އަދި އަންހެން މީހާ ދޫކޮށްލަން ގޮވާލައި ޕެޓިޝަނެއް ވެސް ކުރިއަށް އެބަ ގެންދެ އެވެ.
އެހެން ވިޔަސް ފުލުހުން ވަނީ ހައްޔަރު ކުރި މީހާގެ އިތުރުން އެހެން މީހެއްގެ މައްޗަށް ތުހުމަތު ކުރެވޭނެ ހެކިި މިހާތަނަށް ނެތް ކަމަށް ބުނެފަ އެވެ.
