އިޒްރޭލާއި ފަލަސްތީނުގެ މަޝްރަހު ގޯސްވެފައި ވަނިކޮށް އަންގާރަ ދުވަހުގެ ދަންވަރު ވަގުތުގައި އިޒްރޭލުން ގާޒާއަށް ވައިގެ ހަމަލާ ދީފި އެވެ.
ގާޒާގައި ވެރިކަން ކުރާ ހަމާސްއިން ބުނީ އިޒްރޭލުގެ ވައިގެ އުޅަނދުން ހަމަލާ ދިނީ ގާޒާގެ އެންމެ ދެކުނަށް ކަމަށެވެ. ހަމާސްގެ ސިފައިން ވަނީ އިޒްރޭލުގެ ވައިގެ އުޅަނދުތަކަށް ރައްދުގައި ހަމަލާ ދީފަ އެވެ.
"އިޒްރޭލުގެ ހަނގުރާމަވެރި ޖެޓުތަކާ ދެކޮޅަށް އަޅުގަނޑުމެންގެ ވައިގެ ދިފާއީ ނިޒާމުގެ އެހީގައި ހަމަލާ ދިން ސިފައިންނަށް މަރުހަބާ،" ހަމާސްގެ ބަޔާނުގައިވެ އެވެ.
ހަމާސްގެ ތަރުޖަމާނު ހާޒިމް ގާސިމް ވިދާޅުވީ އިޒްރޭލުން ވައިގެ ހަމަލާ އަމާޒު ކުރީ ހުސް ބިންތަކަށް ކަމަށެވެ. ހަމަލާގައި އެއްވެސް މީހަކަށް އަނިޔާވެފައެއް ނުވެ އެވެ.
އިޒްރޭލުން ބުނީ ގާޒާއަށް ހަމަލާ ދިނީ ގާޒާގެ ސަރަހައްދުން އިޒްރޭލަށް ރޮކެޓް ހަމަލާ ފޮނުވުމުން ކަމަށެވެ. ނަމަވެސް އިޒްރޭލުގެ "އަޔަން ޑޯމް" ދިފާއީ ނިޒާމުން ވަނޯ ރޮކެޓު ހުއްޓުވާފަ އެވެ.
"ރޮކެޓު ހަމަލާގެ ރައްދުގައި އިޒްރޭލުގެ ހަނގުރާމަ މަތީ ޖެޓުތަކުން ވާނީ ގާޒާގައި ހަމާސްއިން ހަތިޔާރު އުފައްދާ ތަނަކަށް ވައިގެ ހަމަލާ ދީފައި،" އިޒްރޭލް ސިފައިން ބުންޏެވެ.
މިދިޔަ ހުކުރު ދުވަހު އިޒްރޭލުން ވެރިވެގަނެގެން އުޅޭ ފަލަސްތީނުގެ ގުދުސްގައި އަލް އަގްސާ މިސްކިތުގެ ގޯތިތެރެއަށް އިޒްރޭލް ފުލުހުން ވަދެ، ހަމަނުޖެހުން އުފެއްދި އެވެ.
އެ ހަމަނުޖެހުމުގައި ފަލަސްތީނުގެ 170 މީހުންނަށް އަނިޔާވި އެވެ. އޭގެ ފަހުން ހޮނިހިރު ދުވަހު ވެސް ގުދުސްގެ އެކި ހިސާބުތަކުގައި ކުރިމަތިލުންތައް ހިނގި އެވެ.
