ބާސެލޯނާ (އޭޕްރީލް 18) - ސްޕެނިޝް ލީގުގައި މިރޭ ކަޑިޒް އިން ބާސެލޯނާ ދަނޑުގައި 1-0 އިން މޮޅުވެއްޖެ އެވެ.
މި ނަތީޖާއާ އެކު ބާސެލޯނާ މި ވަނީ ހަތަރު ދުވަސް ތެރޭ އަމިއްލަ ދަނޑުގައި ބޮޑު ދެ ނާކާމިޔާބީއާ ކުރިމަތިލާން ޖެހިފަ އެވެ. ބުރާސްފަތި ދުވަހުގެރޭ އަމިއްލަ ދަނޑުގައި ޖަރުމަނުގެ އައިންޓްރަކްޓް ފްރޭންކްފާޓް އަތުން ބަލިވެ، ބާސެލޯނާ ވަނީ ޔޫރޮޕާ ލީގުން ކަޓައިފަ އެވެ. އޭގެ ފަހުން ކުޅުނު ފުރަތަމަ މެޗުގައި މިރޭ އަމިއްލަ ދަނޑުގައި ކަޑިޒް އަތްދަށުވިއިރު، މި ފަހަރު ލީގު ހޯދުމަށް ބާސެލޯނާ އިން ކުރަމުން އަންނަ މަސައްކަތުގައި މިއީ ލިބުނު ވަރަށް ބޮޑު ދެރައެކެވެ.
އަނެއްކޮޅުން، މިއީ 2003 ވަނަ އަހަރުގެ އޭޕްރީލް މަހުގެ ފަހުން ދެ މުބާރާތެއްގައި ބާސެލޯނާ ޖެހިޖެހިގެން އަމިއްލަ ދަނޑުގައި ދެ މެޗުން ބަލިވި ފުރަތަމަ ފަހަރެވެ.
މިދިޔަ ޑިސެމްބަރު މަހުގެ ފަހުން ސްޕެނިޝް ލީގުގައި ބާސެލޯނާ އިން ކުޅުނު 15 މެޗަށް ފަހު ފުރަތަމަ ފަހަރަށް ބަލިވިއިރު، ބާސެލޯނާ މި ވަގުތު ދެ ވަނައިގައި އޮތީ އެއް ވަނައިގައި އޮތް ރެއާލް މެޑްރިޑަށް ވުރެ 15 ޕޮއިންޓް ފަހަތުގަ އެވެ. ރެއާލަށް 32 މެޗުން 75 ޕޮއިންޓް ލިބިފައިވާއިރު، ބާސެލޯނާގެ އޮތީ 31 މެޗުން 60 ޕޮއިންޓެވެ. ތިން ވަނައިގައި އޮތް ސެވިއްޔާ އާއި ހަތަރެއްގައި އޮތް އެންމެ ފަހުގެ ޗެމްޕިއަން އެތުލެޓިކޯ މެޑްރިޑަށް ވެސް ވަނީ 32 މެޗުން 60 ޕޮއިންޓް ލިބިފަ އެވެ.
ބާސެލޯނާގެ ދަނޑުގައި މިރޭ ކަޑިޒުން ޖެހި ހަމައެކަނި ގޯލު ކާމިޔާބުކުރީ މެޗުގެ 48 ވަނަ މިނިޓްގައި ލޫކަސް ޕެރޭޒް އެވެ. ބާސެލޯނާ އޭރިއާތެރެއިން އެ ޓީމުގެ ޑިފެންޑަރުންނާއި ގޯލްކީޕަރު ޓާ ސްޓެގެން ކައިރިން ލިބުނު ފުރުސަތެއްގައި ޕެރޭޒް ވަނީ ގޯލަށް ބޯޅަ ވައްދާލައިފަ އެވެ.
މެޗުގެ އިތުރު ވަގުތުގެ ފަހު މިނިޓް ނިމެންދެން ބާސެލޯނާ އިން ލަނޑެއް ޖެހޭތޯ މަސައްކަތް ކުރި ނަމަވެސް ކާމިޔާބެއްނުވި އެވެ. ބާސެލޯނާގެ އެރިކް ގާސިއާ އާއި ޕިއޭ އެމެރިކް އޮބާމަޔަން ޖެހި ބޯޅަތައް ކަޑިޒްގެ ކީޕަރު ޔެރެމިއަސް ލެޑެސްމާ ވަނީ މަތަކޮށްފަ އެވެ.
ކަޑިޒުން އެ ކްލަބްގެ 111 އަހަރުވީ ދިގު ތާރީހުގައި ބާސެލޯނާ ދަނޑުގައި ފުރަތަމަ ފަހަރަށް މޮޅުވިއިރު، މިއީ އެ ޓީމަށް މުހިންމު ތިން ޕޮއިންޓެވެ. ރެލިގޭޝަނުން ސަލާމަތްވާން މަސައްކަތް ކުރަމުން އަންނަ ކަޑިޒް މިރޭގެ ތިން ޕޮއިންޓާ އެކު އޮތީ ލީގުގެ 16 ވަނައިގަ އެވެ. އެއީ 32 މެޗުން 31 ޕޮއިންޓް ހޯދައިގެންނެވެ.
