މެންޗެސްޓާ (އޭޕްރީލް 18) - މެންޗެސްޓާ ޔުނައިޓެޑްގެ ތަރި ކްރިސްޓިއާނޯ ރޮނާލްޑޯގެ ލޯބިވެރިޔާ ޖިއޮޖީނާ ރޮޑްރިގޭޒް، 27، ވިހެއި އެއްމާބަނޑު ދެ ކުދިންގެ ތެރެއިން އެއް ކުއްޖަކު މަރުވެއްޖެ އެވެ.
ދަރިފުޅު މަރުވެފައިވާކަން އިއުލާނުކޮށްފައިވަނީ ރޮނާލްޑޯ، 37، ސޯޝަލް މީޑިއާގައި އާންމުކުރި ބަޔާނެއްގަ އެވެ. ޖިއޮޖީނާ ވިހެއި، އެއް މާބަނޑު އެއް ކުއްޖަކީ އަންހެން ކުއްޖެކެވެ. މަރުވީ ފިރިހެން ކުއްޖާ އެވެ. ރޮނާލްޑޯ ބުނީ މުޅި އާއިލާ އަށް މިއީ ލިބުނު ވަރަށް ބޮޑު ހިތާމައެއް ކަމަށެވެ.
"މި ވަގުތު އަހަރެމެންނަށް އޮތް ހަމައެކަނި އުފަލަކީ އަންހެން ދަރިއަކު ލިބުން. އަހަރެންގެ (ފިރިހެން) ދަރިފުޅު ސަލާމަތްކުރަން ޑޮކްޓަރުންނާއި ނަރުހުން ކުރި މަސައްކަތް ހެޔޮހިތުން ބަލައިގަންނަން،" ރޮނާލްޑޯ ސޯޝަލް މީޑިއާ އަށް ދޫކޮށްލި މެސެޖްގައި ލިޔެފައިވެ އެވެ.
ރޮނާލްޑޯ މީގެ ކުރިން އާއިލާއާ އެކު ނަގާފައިވާ ފޮޓޯއެއް.
ރޮނާލްޑޯ ބުނީ މިއީ އޭނާގެ އާއިލާ އަށް ލިބިފައިވާ ބޮޑު ހިތާމަ އަކަށް ވާތީ، ވީހާ ވެސް ބޮޑަށް އަމިއްލަ ކަންކަމަށް ވަގުތުދޭން ބޭނުންވާ ކަމަށެވެ. އަދި އެންމެންގެ ފަރާތުން ރޮނާލްޑޯ އެދެނީ މި ވަގުތު "ޕްރައިވެސީ" ދިނުމަށެވެ.
ރޮނާލްޑޯގެ މިހާރު ތިބި ދަރިންނަކީ މިއަދު ލިބުނު އަންހެން ދަރިފުޅު ހިމެނޭ ގޮތަށް ޖުމްލަ ފަސް ދަރިންނެވެ. އެއީ 11 އަހަރުގެ ދޮށީ ފިރިހެން ދަރިފުޅު، މެންޗެސްޓާ ޔޫތު ޓީމުގެ ކުޅުންތެރިޔާ، ރޮނާލްޑޯ ޖޫނިއާގެ އިތުރުން މީގެ ކުރިން ޖިއޮޖީނާ އަށް 2017 ވަނަ އަހަރު ލިބުނު އެލާނާ މާޓީނާ އަދި ސަރޮގެސީ ހަދައިގެން ލިބުނު އުމުރުން ހަތަރުގެ އެއްމާބަނޑު ދެ ކުދިން ކަމަށްވާ އޭވާ އާއި މަޓެއޯ އެވެ. ރޮނާލްޑޯ ޖޫނިއާގެ މަންމަ އަކީ ކާކުކަން މިހާތަނަށް ރޮނާލްޑޯ ހާމައެއް ނުކުރެ އެވެ.
އިނގިރޭސި ޕްރިމިއާ ލީގުގައި މާދަމާރޭ ޔުނައިޓެޑުން ރަށުންބޭރުގައި ލިވަޕޫލާ ދެކޮޅަށް ކުޅޭ މެޗުގައި ރޮނާލްޑޯ ފެނުމުގެ ފުރުސަތު ކުޑަކަމަށް ރިޕޯޓްތައް ބުނެ އެވެ. މިދިޔަ ހޮނިހިރު ދުވަހު އިނގިރޭސި ޕްރިމިއާ ލީގުގައި ޔުނައިޓެޑުން ލީގުގެ ފުލުގައި އޮތް ނޮރިޗް ސިޓީ ބަލިކުރި މެޗުގައި ރޮނާލްޑޯ ވަނީ ހެޓްރިކެއް ހަދައިފަ އެވެ.
