ގުދުސް (އެޕްރީލް 17) - ގުދުސްގެ އަލް އަގްސާ މިސްކިތުގެ ހަރިންމަތެރެ އާއި ބޭރުގައި ހިނގި ހަމަނުޖެހުންތަކުގައި އާދީއްތަ ދުވަހު 20 މީހުންނަށް އަނިޔާވެއްޖެ އެވެ.
އާދީއްތަ ދުވަހުގެ ހަމަނުޖެހުންތަކާ އެކު ފާއިތުވި ތިން ދުވަހުގެ ތެރޭގައި އަނިޔާވި މީހުންގެ ޖުމްލަ އަދަދު ވަނީ 170 އަށް ވުރެ މަތިވެފަ އެވެ.
ފަހަކަށް އައިސް އިޒްރޭލާއި ފަލަސްތީނުގެ މަޝްރަހު ގޯސްވެ، މިދިޔަ މާޗް މަހުން ފެށިގެން ތަފާތު އެކި ހަމަލާތަކުގައި ޖުމްލަ 36 މީހުން ވަނީ މަރުވެފަ އެވެ.
އިޒްރޭލް ފުލުހުން ބުނީ އާދީއްތަ ދުވަހު ޔަހޫދީންތަކެއް އަލް އަގްސާ މިސްކިތުގެ ގޯތިތެރެއަށް ޒިޔާރަތް ކުރަން ހަމަޖެހިފައި ވަނިކޮށް، ފަލަސްތީނު މީހުން މުޒާހަރާކޮށް ގަލާއި ހިލަ އެއްކުރި ކަމަށޭވެ.
އަލް އަގްސާ މިސްކިތުގެ ގޯތިތެރެ ނުވަތަ އަލް ހަރަމް އަލް ޝަރީފްއަށް ވަނުމުގެ ހުއްދަ ޔަހޫދީންނަށް އޮތް ނަމަވެސް، އެ ތަނުގައި އަޅުކަން ކުރުން ޔަހޫދީންނަށް މަނަ އެވެ.
އިޒްރޭލް ފުލުހުން މިސްކިތުގެ ގޯތިތެރެއަށް ފުލުހުން ވަނީ މުޒާހަރާ ކުރަމުން ދިޔަ މީހުން ފޮނުވާލައި، އެ ތަނުގައި ހަމަޖެހުން ގާއިމްކުރުމަށް ކަމަށެވެ.
ފަލަސްތީނުގެ ރެޑް ކްރެސެންޓުން ބުނީ އަނިޔާވި މީހުންގެ ތެރެއިން ބައެއް މީހުން ހޮސްޕިޓަލަށް ގެންދަން ޖެހުނު ކަމަށާއި ބައެއް މީހުންނަށް އަނިޔާވީ ރަބަރު ވަޒަނުން ކަމަށެވެ.
އޭގެ އިތުރުން ޔަހޫދީން ގޮވައިގެން ދަތުރު ކުރަމުން ދިޔަ ދެ ބަހަކަށް ގާ އުކުމުން، ފަލަސްތީނުގެ 18 މީހުން ހައްޔަރު ކުރި ކަމަށް އިޒްރޭލް ފުލުހުން ބުނެ އެވެ.
އަލް އަގްސާ މިސްކިތުގެ ގޯތިތެރޭގައި ހަމަނުޖެހުން ހިނގުން އިތުރުވެފައިވާ މި ދަނޑިވަޅުގައި ނަސާރާއިންގެ އެންމެ އިސް ފާދިރީ ޕޯޕް ފްރޭންސިސް އާދީއްތަ ދުވަހު ގޮވާލީ ހުރިހާ އެންމެންނަށް ވެސް އަލް އަގްސާ މިސްކިތުގެ ގޯތިތެރޭގައި އަޅުކަން ކުރުމުގެ ފުރުސަތު ދިނުމަށެވެ.
