އެމްޑީޕީގެ ޗެއާޕާސަންކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއީލަށް އޭނާގެ ވާދަވެރިން ކުރާ ތުހުމަތުތައް ބަލައި ހަގީގަތް ހާމަކޮށްދޭން ، ކަމާ ބެހޭ މުއައްސަސާތަކަށް އޭނާ މިރޭ ގޮވާލައްވައިފި އެވެ.
ފައްޔާޒްގެ ކެމްޕޭން ޓީމުން ހުޅުމާލޭގައި ހެދި ޖަގަހައެއް ހުޅުވަން މިރޭ ބޭއްވި ރަސްމިއްޔާތުގައި އޭނާ ވިދާޅުވީ އޭނާއާއި އޭނާ އެކު ތިއްބެވި އެމްޑީޕީގެ އެހެން މެމްބަރުންނަށް ކުރާ ތުހުމަތުތައް އެއީ ބަލަން ޖެހޭ ކަމެއް ކަމަށެވެ. އޭނާ ވިދާޅުވީ ވައްކަމާއި ނުފޫޒުގެ ބޭނުންކޮށްގެން ބިރުދައްކަމުންދާ ކަމުގެ ތުހުމަތު އޭނާއަށް ރައްދުކުރަނީ ދައުލަތުގެ މުހިއްމު ޒިންމާއަކާ ހަވާލުވެ ތިއްބެވި ބޭފުޅުންތަކެއް ކަމަށާއި އެކަން ބަލަން ޖެހެނީ އެހެންވެ ކަމަށެވެ.
"އަޅުގަނޑު މިއަދު ގޮވައިލަން ދިވެހިރާއްޖޭގެ ކަމާ ބެހޭ ހުރިހާ މުއައްސަސާތަކަށް، އަމިއްލަފުޅަށް ނަމަވެސް އެބޭފުޅުން އެދައްކަވާ ވާހަކަތައް ބަލައި ރައްޔިތުުންނާ ހިސާބަށް ކަން އޮތް ގޮތް ގެނެސް ދެއްވުމަށް،" ފައްޔާޒް ވިދާޅުވި އެވެ.
އޭނާއާ ބެހޭ ގޮތުން ދައްކާފައި ހުރި ވާހަކަތައް ނޫސްތަކުން ފެނިވަޑައިގެންފި ކަމަށާއި އެވާހަކަތަކަށް ރައްދު ދެއްވަން ޖެހޭ ކަމަށް ގަބޫލުކުރައްވާ ކަމަށެވެ. އޭނާ ވިދާޅުވީ ތުހުމަތުތައް ކުރުމުގައި "ވަރަށް ދަށު ދަރަޖައަށް ކަންތައްތައް ގެންގޮސްފި" ކަމަށެވެ. އެހެން ނަމަވެސް އެއްވެސް އެހެން ބޭފުޅެއްގެ ނަމެއް އޭނާ ސީދާ ވިދާޅެއް ނުވެ އެވެ.
"ވަރަށް ބަދުނާމުކޮށްފި އިނގޭތޯ، ވަރަށް ބަދުނާމު ކޮށްފި. ވަރަށް ފިތުނަކޮށްފި. އަަޅުގަނޑު ދުވަހަކު ހީނުކުރާހާ ދަށުދަރަޖަ އަށް ކަންތައްތައް ގެންގޮސްފި،" ފައްޔާޒް ވިދާޅުވި އެވެ.
އޭނާ ވިދާޅުވީ މިއަދު ފުރަތަމަ ފެނުނު ލިއުމެއް ވިދާޅުވެފައި ރައްދެއް ދެއްވަން ޖެހޭ ކަމަށް ގަބޫލުކުރެއްވުނަސް ހަވީރު ފެނުނު ލިއުމަކުން އެނގިވަޑައިގަތީ އެއީ ރައްދު ދޭން ވާވަރު ބައެއް ނޫންކަން ކަމަށެވެ.
"އެހެންވީމާ އަޅުގަނޑު އެއަށް ރައްދުދޭކަށް ނެތިން،" އޭނާ ވިދާޅުވި އެވެ.
ފައްޔާޒް ވިދާޅުވީ އޭނާއަށް ކުރާ ތުހުމަތުތަކުގެ ވާހަކަ ގެނެސްދޭ ކަމަށް ވަންޏާ އެވާހަކަތަކުގެ ހަގީގަތް ހޯދައިގެން ރައްޔިތުންނާ ހަމައަށް ގެނެސްދިނުމަކީ ނޫސްވެެރިންގެ ވެސް ޒިންމާއެެއް ކަމަށެވެ.
