ހުކުރު ދުވަހު ފަތިސް ނަމާދު ވަގުތަށް އެތައް ހާސް ބަޔަކު އަލް އަގްސާ މިސްކިތަށް ޖަމާވެފައި ވަނިކޮށް، އިޒްރޭލް ފުލުހުން ހިންގި ހަމަނުޖެހުމުގެ ސަބަބުން ފަލަސްތީނުގެ 152 މީހުންނަށް އަނިޔާވެއްޖެ އެވެ.
ޔަހޫދީންނާއި ނަސާރާއިން ފާހަގަކުރާ މުހިއްމު ދެ ދުވަހެއް ވެސް މި މަހު ކުރިމަތިވާތީ އެ ދެ ދީނުގެ އެތައް ހާސް ބަޔަކު ވެސް ދަނީ އަގްސާ މިސްކިތް ހުންނަ ގުދުސްއަށް ޖަމާވަމުންނެވެ.
ރޯދަ މަސް ފެށުމާ އެކު އިޒްރޭލާއި ފަލަސްތީނުގެ މަޝްރަހު ގޯސްވެފައި ވަނިކޮށް، ހުކުރު ދުވަހު ފަތިހު އަގްސާ މިސްކިތުގައި ހިންގި ހަމަނުޖެހުން ކޮންޓްރޯލްކޮށްފައިވާ ކަމަށް އިޒްރޭލް ފުލުހުން ބުނެ އެވެ.
އިޒްރޭލް ފުލުހުން ފަލަސްތީނުގެ އެތައް ސަތޭކަ ބަޔަކު މިސްކިތުން ހައްޔަރު ކުރި އިރު، އޭގެ ތެރޭގައި ކުޑަކުދިން ވެސް ހިމެނެ އެވެ. ހުކުރު ދުވަހު މެންދުރު ފަހު އަލުން މިސްކިތް ހުޅުވި އެވެ.
އަގްސާ މިސްކިތުގެ ކަންކަން ބަލަހައްޓާ ފަރާތުން ބުނީ ފަތިސް ވަގުތާ ދިމާކޮށް، ނަމާދަށް ތައްޔާރުވަމުން ދަނިކޮށް، އިޒްރޭލް ފުލުހުން އައިސް މިސްކިތުގެ ތެރެއަށް ވަދެގަތް ކަމަށެވެ.
އިޒްރޭލް ފުލުހުން ބުނީ މިސްކިތަށް ވަނީ ހަމަނުޖެހުން އުފެއްދުމުގެ ބޭނުމުގައި އެ ތަނަށް ޖަމާކޮށްފައި ހުރި ގަލާއި ހިލަ ގެންދިޔުމަށް ކަމަށެވެ.
ފަލަސްތީނު މީހުންނާއި އިޒްރޭލް ފުލުހުންނާ ދެމެދު ހަމަނުޖެހުން ހިނގަނީ. -- ފޮޓޯ: ރޮއިޓާޒް
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަނީ ފަލަސްތީނު މީހުން ގާ އުކާއިރު، އިޒްރޭލް ފުލުހުން ކަރުނަ ގޭހާއި ސްޓަން ގްރެނޭޑް ބޭނުން ކުރާ މަންޒަރެވެ.
ފަލަސްތީނުގެ ރެޑް ކްރެސެންޓުން ބުނީ އަނިޔާވި 59 މީހުން ހޮސްޕިޓަލަށް ގެންދިޔަ ކަމަށެވެ. އަގްސާ މިސްކިތް ބަލަހައްޓާ ފަރާތުން ބުނީ އެ ތަނުގެ ގާޑެއްގެ ލޮލަށް ރަބަރު ވަޒަނެއް އެރި ކަމަށެވެ.
އިޒްރޭލުގެ ފޮރިން މިނިސްޓްރީން ބުނީ މޫނު ނިވާކޮށްގެން ތިބި ގިނަ އަދަދެއްގެ މީހުން ފަލަސްތީނާއި ހަމާސްގެ ދިދަ ހިފައިގެން އަގްސާ މިސްކިތުގެ ގޯތި ތެރެއަށް ޖަމާވެ، ގަލާއި ހިލަ އެއްކުރި ކަމަށެވެ.
"ފުލުހުން އެ ތަނަށް ވަދެ، މީހުން ފޮނުވާލައި، ގަލާއި ހިލަތައް ގެންދަން މަސައްކަތް ކުރީ، އިތުރު ހަމަނުޖެހުމަށް ފުރުސަތު ނުދިނުމަށް،" އެ މިނިސްޓްރީން ޓްވީޓް ކުރި އެވެ.
މި ފަހަރު ވެސް އިޒްރޭލާއި ފަލަސްތީނާ ދެމެދު ހަމަނުޖެހުން ބޮޑުވެފައި މި ވަނީ ރޯދަ މަހުގަ އެވެ. މިދިޔަ އަހަރުގެ ރޯދަ މަހު ވެސް ހަމަނުޖެހުން ބޮޑުވެ، 11 ދުވަހުގެ ހަނގުރާމައެއް ކުރި އެވެ.
