ރޯމް (އޭޕްރީލް 14) - ޔުއެފާ ކޮންފަރެންސް ލީގުގެ ސެމީ ފައިނަލުގައި އިންގްލެންޑްގެ ލެސްޓާ ސިޓީ އާއި އިޓަލީގެ ރޯމާ ބައްދަލުކުރަން ޖެހިއްޖެ އެވެ. މިއީ ލެސްޓާގެ ތާރީހުގައި އެ ޓީމުން ޔޫރަޕްގެ މުބާރާތެއްގެ ސެމީ ފައިނަލަށް ދަތުރުކުރި ފުރަތަމަ ފަހަރެވެ.
ލެސްޓާ ވަނީ މިރޭ ކުޅުނު ކުއާޓާ ފައިނަލް ދެ ވަނަ ލެގުގައި ފަހު 12 މިނިޓް ތެރޭ ދެ ގޯލު ޖަހައި، 2-1 އިން ޕީއެސްވީ ބަލިކޮށްފަ އެވެ. އެގްރިގޭޓަށް ބަލާއިރު، ލެސްޓާ އަށް ކުރި ލިބުނީ 2-1 އިންނެވެ. ރޯމާ ވަނީ މިދިޔަ ހަފްތާގައި ބޯޑޯ/ގްލިމްތު ދަނޑުގައި 2-1 އިން ބަލިވެފަ އެވެ. އެކަމަކު، މިރޭ ރޯމްގައި ކުޅުނު މެޗުން 4-0 އިން މޮޅުވެ، ރޯމާ ވަނީ އެގްރިގޭޓަށް ބަލާއިރު، 5-2 އިން ކުރިހޯދައިފަ އެވެ.
ޕީއެސްވީ ދަނޑުގައި މިރޭ އެ ޓީމުން ވަނީ އިޒްރޭލުގެ ފޯވާޑް އެރަން ޒަހާވީގެ ގޯލުން މެޗުގެ 27 ވަނަ މިނިޓްގައި ލީޑުނަގައިފަ އެވެ. މިއީ މާރިއޯ ގޮޓްޒާ ދިން ބޯޅައަކުން ޒަހާވީ ޖެހި ގޯލެކެވެ. ލެސްޓާ އިން ގޯލެއް ޖެހޭތޯ ކުރަމުންދިޔަ މަސައްކަތް ކާމިޔާބުވީ މެޗުގެ 77 ވަނަ މިނިޓްގަ އެވެ. މި ގޯލު ޖެހީ ޖޭމްސް މެޑިސަން އެވެ. މެޑިސަން ގޯލު ޖަހަން ފުރުސަތު ތަނަވަސްކޮށްދިނީ އަޔޯޒީ ޕެރޭޒް އެވެ.
މެޗު ނިމެން ދެ މިނިޓަށް ވެފައި ހުއްޓައި، ލެސްޓާ މޮޅުވި ގޯލު ޖަހައިދިނީ ޕޯޗުގީސް ފުލްބެކް، ރިކާޑޯ ޕެރެއިރާ އެވެ. މިއީ ޔޫރަޕްގެ މުބާރާތްތަކުގައި ލެސްޓާ އަށް ޕެރެއިރާ ޖަހައިދިން ފުރަތަމަ ގޯލެވެ.
ރޯމާ އަށް މިރޭގެ މެޗުގައި ހެޓްރިކެއް ހަދައިދިން ފޯވާޑް ޒަނިއޯލޯ (ވ) އެ ޓީމުގެ ކޯޗު މޮރީނިއޯއާ އެކު އުފާފާޅުކުރަނީ.-- ފޮޓޯ: އޭއެފްޕީ
ރޯމްގެ އޮލިމްޕިކް ސްޓޭޑިއަމްގައި މިރޭ ކުޅުނު މެޗުގެ ފަސް ވަަނަ މިނިޓްގައި ރޯމާ އަށް ލީޑުނަގައިިދިނީ މި ސީޒަނުގައި ރަނގަޅު ފޯމެއްގައި ހުރި އިނގިރޭސި ފޯވާޑް ޓެމީ އަބްރަަހަމް އެވެ. ރޯމާގެ އަނެއް ތިން ގޯލު ޖަހައި، އިޓަލީގެ ފޯވާޑް ނިކޯލަ ޒަނިއޯލޯ ވަނީ ހެޓްރިކެއް ހަދައިފަ އެވެ.
ސެމީގައި ލެސްޓާ އާއި ރޯމާ ކުޅެން ޖެހުނުއިރު، ދެ ޓީމުގެ ކޯޗުން ކަމަށްވާ ރޯމާގެ ހޯސޭ މޮރީނިއޯ އާއި ލެސްޓާ ސިޓީގެ ބްރެންޑަން ރޮޖާސް ވަނީ އެކުގައި ކުރިން މަސައްކަތްކޮށްފަ އެވެ. މޮރީނިއޯ އެންމެ ފުރަތަމަ ޗެލްސީގެ ކޯޗަކަށް ހުރިއިރު، ރޮޖާސް އަކީ ޗެލްސީގެ ޔޫތު ޓީމު ކޯޗެކެވެ. އޭގެ ފަހުން މޮރީނިއޯ އާއި ރޮޖާސް ވަނީ ޕްރިމިއާ ލީގުގެ ތަފާތު ޓީމުތަކުގެ ބެންޗުގައި ހުރެ، އިދިކޮޅަށް ނުކުމެފަ އެވެ. އެކަމަކު، ލެސްޓާ އާއި ރޯމާގެ ކުރިމަތިލުމަކީ މި ދެ ކޯޗުން ހަވާލުވެ، ހުރި ކްލަބްތަކަކުން ބައްދަލުކުރާނެ ފުރަތަމަ ފަހަރެވެ.
ޔުއެފާ އިން މުޅިން އަލަށް ފެށި ކޮންފަރެންސް ލީގުގެ އަނެއް ސެމީގައި ކުޅޭނީ ފްރާންސްގެ މާސޭ އާއި ނެދަލެންޑްސްގެ ފެޔަނޫޑް އެވެ.
ފުރަތަމަ ލެގުގައި މާސޭ އިން ވަނީ 2-1 އިން ގްރީސްގެ ޕީއޭއޯކޭ ބަލިކޮށްފަ އެވެ. މިރޭ ޕީއޭއޯކޭ ދަނޑުގައި ކުޅުނު މެޗުން ވެސް މާސޭ ވަނީ މޮޅުވެފަ އެވެ. މެޗުގެ ހަމައެކަނި ގޯލު ޖެހީ މަޓެއޯ ގެންޑޫޒީ ދިން ބޯޅައަކުން ޑިމިޓްރީ ޕަޔެޓް އެވެ. ޕަޔެޓް ވަނީ ފުރަތަމަ މެޗުގައި ވެސް ޕީއޭއޯކޭ ކޮޅަށް ގޯލު ޖަހައިފަ އެވެ.
މިރޭ ޗެކް ރިޕަބްލިކްގެ ސްލާވިއާ ޕްރާގް ދަނޑުގައި ފެނަޔޫޑް މޮޅުވީ 3-1 އިންނެވެ. މިދިޔަ ހަފްތާގައި ފެޔަނޫޑް ދަނޑުގައި 3-3 އިން އެއްވަރުވި ނަމަވެސް މިރޭ، ރަށުންބޭރުގައި ފެޔަނޫޑް ވަނީ ޑިފެންސް ރަނގަޅުކޮށް މޮޅުވެފަ އެވެ. ފެޔަނޫޑްގެ ސިރިއަލް ޑޭސާސް ދެ ގޯލު ޖެހިއިރު، އަނެއް ގޯލު ޖެހީ ލުއިސް ސިނިސްޓޭރާ އެވެ. ސްލާވިއާގެ ހަމައެކަނި ގޯލު ޖެހީ އިބްރާހިމް ޓްރައޯރޭ އެވެ.
