ސޯޝަލް މީޑިއާ ޕްލެޓްފޯމް ޓްވިޓާގެ "އާދަޔާ ހިލާފު ގާބިލްކަން ހޯދައިގަތުމުގެ" ވިސްނުން އެބަ ހުރި ކަމަށް ބުނެ، ބިލިއަނަރު އެލޮން މަސްކް، އެ ކުންފުނި ގަންނަން ހުށަހަޅައިފި އެވެ.
މަސްކް ބުނީ ހިއްސާއަކަށް 54.20 ޑޮލަރުގެ އަގުން އޭނާ ފައިސާ ދައްކާނެ ކަމަށެވެ. އެއާ އެކު ކުންފުނީގެ ޖުމްލަ އަގު 40 ބިލިއަން ޑޮލަރަށް އަރާނެ އެވެ.
ދާދި ފަހުން މަސްކް ވަނީ ޓްވިޓާގެ ގިނަ އަދަދެއްގެ ހިއްސާތަކެއް ގަނެފަ އެވެ. މި ވަގުތު ޓްވިޓާގެ އެންމެ ބޮޑު ޝެއާ ހޯލްޑަރަކީ އޭނާ އެވެ.
މަސްކް ބުނީ އޭނާގެ ހުށަހެޅުން ބަލައިނުގެންފި ނަމަ "ޝެއާހޯލްޑަރެއްގެ ގޮތުގައި ދެމިހުރުމާ މެދު ވިސްނަން ޖެހޭނެ" ކަމަށެވެ. ނަމަވެސް އެއީ އިންޒާރެއް ނޫން ކަމަށް އޭނާ ބުންޏެވެ.
ނަމަވެސް ބައެއް އެނެލިސްޓުން ސިފަކުރަނީ އެއީ އިންޒާރެއްގެ ގޮތުގަ އެވެ. އެކަމަކު މަސްކް ބުނީ އޭނާ ބޭނުންވާ ބަދަލުތައް ނުގެނެވޭ ނަމަ ޝެއާ ހޯލްޑަރެއްގެ ގޮތުގައި ހުރުމުގެ ބޭނުމެއް ނެތް ކަމަށެވެ.
ޓްވިޓާއިން ބުނީ ކުންފުނީގެ ބޯޑުން މަސްކްގެ ހުށަހެޅުން ރަނގަޅަށް ދިރާސާ ކުރުމަށް ފަހު ހުރިހާ ޝެއާހޯލްޑަރުންނާއި ކުންފުންޏަށް އެންމެ ފައިދާ ހުރި ގޮތެއް ނިންމާނެ ކަމަށެވެ.
ޓްވިޓާގެ ބޯޑާ ގުޅެން މަސްކަށް ދައުވަތު ދިން ނަމަވެސް، އޭނާ އެކަމެއް ބޭނުމެއް ނުވި އެވެ.
ފޯބްސް މެގެޒިންގައިވާ ގޮތުން މަސްކްއަކީ މި ވަގުތު ދުނިޔޭގެ އެންމެ މުއްސަނދި މީހާ އެވެ. އޭނާގެ އިލެކްޓްރިކް ކާރު ކުންފުނި ޓެސްލާގެ ސަބަބުން، މުއްސަނދިކަމުގެ އަގު 219 ބިލިއަން ޑޮލަރަށް އަރަ އެވެ. އޭގެ އިތުރުން ޖައްވީ އުދުހުންތަކާ ގުޅޭ ސްޕޭސް އެކްސް ކުންފުނީގެ ވެރިޔަކީ ވެސް މަސްކް އެވެ.
