ތިލަފުށީ ފަޅުގައި ވެރިޔަކު ނެތި އޮތް ދަގަނޑު ބޯޓު "ސީހޯމް ސަފަޔާ" އުޅަނދު ސެލްވޭޖުކޮށް، ގްރޭޓާ މާލެ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) އަށް ބޯޓު ޔާޑު ކުލީގެ ގޮތުގައި ޕާކްވަން އިންވެސްޓްމަންޓުން ދައްކާފައިވާ 1.08 މިލިއަން ޑޮލަރު (15 މިލިއަން ރުފިޔާ) އަނބުރާ ދޭން ނުޖެހޭ ކަމަށް ހުކުމް ކޮށްފި އެވެ.
ސިވިލް ކޯޓުން މި ގޮތަށް ހުކުމް ކުރީ، އުޅަނދު ސެލްވޭޖުކޮށް ނަގާފައިވާ ބިމުގެ ކުއްޔަކީ ތިލަފުށީގެ ސިނާއީ ކުންފުނިން ޕާކަވަންއަށް އަނބުރާ ދޭން ޖެހޭ ފައިސާއެއް ކަމަށް ކަނޑައަޅައި ދިނުމަށާއި އެ މައްސަލަ ކޯޓަށް ހުށަހެޅުމާ ހަމައަށް ދައްކާފައިވާ 15 މިލިއަން ރުފިޔާ ހޯދަން އެދި ޕާކަވަނުން ހުށަހެޅި މައްސަލައަށެވެ.
ދެހާސް ބާރަ ވަނަ އަހަރުން ފެށިގެން، ތިލަފުށީ ފަޅުގައި ގަވައިދާ ހިލާފަށް އަޅާފައި އޮތް ސީހޯމް ސަފަޔާ އެތަނުން ނެގުމަށް ކޯޓުން ހުކުމެއް ކުރި އެވެ.
އެ ފަހުން، އެ ބޯޓު ކީހައި އެތަނުން ނަގަން ޖީއެމްއައިޒެޑްއެލް އިން ހަވާލު ކުރީ ޕާކަވަންއަށެވެ. 30 ދުވަހުގެ ތެރޭގައި އެ މަސައްކަތް ނިންމުމަށް ހަވާލު ކުރީ، އެ ބޯޓުގެ މިލްކުވެރިކަން ވެސް ޕާކަވަންއަށް ދޭ ގޮތަށެވެ.
ނަމަވެސް، މަސައްކަތް ކުރަމުން ދަނިކޮށް ގުރައިދޫ ކޯޓުގެ އަމުރަކާއެކު ފުލުހުން އެކަން ހުއްޓުވި އެވެ. ފަހުން ކޯޓު އަމުރު ބާތިލުކުރި ނަމަވެސް އެހާއިރަށް އަމުރު ވަނީ ތަންފީޒުކޮށް ނިމިފަ އެވެ.
އެހެންވެ ލިބުނު ގެއްލުމުގެ ބަދަލުގެ ގޮތުގައި 10.9 މިލިއަން ރުފިޔާ ނަގައިދޭން އެދި ޕަކަވާން އިން 2019 ވަނަ އަހަރު ހުށަހެޅި މައްސަލައެއްގައި، 9.2 މިލިއަން ރުފިޔާ ދޭން ސިވިލް ކޯޓުން ހުކުމް ވެސް ކޮށްފައިވެ އެވެ.
ޕާކަވަން އިން އިތުރު ފައިސާ ނަގަން އެދި ސިވިލް ކޯޓަށް ހުށަހެޅި މައްސަލާގައި އެ ކޯޓުން ކުރި ހުކުމުގައި ވަނީ، އޭގެ ކުރިން ހުށަހެޅި މައްސަލަ އާއި މި މައްސަލާގައި ވެސް ހިމެނެނީ އެއް އުޅަނދެއް ކަމާއި މައްސަލަ ހުށަހެޅި ފަރާތާއި ރައްދުވާ ފަރާތަކީ ވެސް އެއް ބަޔެއް ކަމުގަ އެވެ. އެހެންވެ މައްސަލަ އިޖުރާއީ ގޮތުން ކުރިއަށް ގެންދެވެން ނެތް ކަމުގައި ކަނޑައެޅީ އެވެ.
އޭގެ އިތުރުން ސިވިލް ކޯޓުން 2020 ވަނަ އަހަރު ނިންމި ގަޒިއްޔާގައި ވެސް ބޯޓު ޔާޑުގެ ކުއްޔާ މެދު ގޮތެއް ނިންމާފައިވާ ކަން ވެސް ފަހުން އިއްވި ހުކުމުގައި ފާހަގަކޮށްފައިވެ އެވެ.
ކުރީގެ ގަޒިއްޔާގައި ބުނެފައިވާ ގޮތުން، ބޯޓު ޔާޑުގެ ކުއްޔަށް އޭރު ދައްކަން ޖެހޭ 110،711 ޑޮލަރު ޕާކަވަންއަށް ޖީއެމްއައިޒެޑްއެލް އިން ނަގައިދޭން ޖެހޭ ސަބަބެއް ނެތެވެ.
ސީހޯމް ސަފަޔާ ބޯޓަކީ އޭގެ މިލްކުވެރި ފަރާތެއް ނޭނގި ގިނަ ދުވަސްތަކެއް ވަންދެން އޮތް ބޯޓެކެވެ. ބޯޓު ތިލަފުށީ ފަޅުގައި އޮންނާތީ އެ ސަރަހައްދުގައި އުމްރާނީ ތަރައްގީގެ މަޝްރޫއުތައް ހިންގަން ދަތިވާތީ ސިވިލް ކޯޓަށް ދިއުމުން ބޯޓު ދައުލަތަށް ނަގައިދިނީ އެވެ.
ތިމަރަފުށީ ދާއިރާގެ ކުރީގެ މެމްބަރު މުހައްމަދު މުސްތަފާ ވެސް އެ ބޯޓުގެ މިލްކުވެރި ކަމަށް ދައުވާކޮށް ވާހަކަތަކެއް ދައްކަވާފައިވެ އެވެ.
