ކޮވިޑް ފަތުރާ ވައިރަހަކީ މުޅި ދުނިޔެއަށް އަދިވެސް ބޮޑު ނުރައްކަލެއް ކަމަށާއި ގައުމުތަކުން ފަރުވާ ކުޑަ ނުކުރުމަށް ދުނިޔޭގެ ސިއްހަތު ޖަމިއްޔާގެ ކޮވިޑާ ގުޅޭ އެމެޖެންސީ ކޮމިޓީން ގޮވާލައިފި އެވެ.
ގިނަ ގައުމުތަކުގައި ބޮޑެތި ލުއިތަކެއް ދީ، ކޮވިޑަށް ޓެސްޓު ކުރުން ވެސް ބޮޑު ތަނުން މަޑު ޖައްސާލާފައިވާ އިރު، ޑަބްލިއުއެޗްއޯގެ ތަޖުރިބާކާރުން ބުނީ ބަލިމަޑުކަން ނިމެން އަދި ގާތް ނުވާ ކަމަށެވެ.
"މިއީ ފަރުވާ ކުޑަ ކުރަންވީ ވަގުތެއް ނޫން. މިއީ އިތުރަށް ސަމާލުވާންވީ ވަގުތު. އަދި މިއީ އަޅުގަނޑުމެން ދޭ ވަރަށް މުހިއްމު ލަފައެއް،" ކޮމިޓީގެ ރިޔާސަތުގައި އިންނަވާ ޑިޑިއާ ހުސީން ވިދާޅުވި އެވެ.
"ކޮވިޑް-19 ބަލިމަޑުކަން ނިމެން އަދި ގާތް ނުވޭ. ވައިރަސް ދައުރުވުން އަދިވެސް ވަރަށް ހަލުވި. މަރުވާ އަދަދު ވެސް ބޮޑު. ވައިރަސް ބަދަލުވަމުން ދަނީ ލަފާ ކުރަން ދަތި ގޮތް ގޮތަށް."
ޑަބްލިއުއެޗްއޯގެ ކޮވިޑާ ގުޅޭ އެމެޖެންސީ ކޮމިޓީން ކޮންމެ ތިން މަހަކުން ބައްދަލުވުންތައް ބާއްވައި، ޑަބްލިއުއެޗްއޯގެ ވެރިޔާ ޓެޑްރޯސް އަދަނޮމްއަށް ބަލީގެ ހާލަތާ ގުޅޭ ރިޕޯޓު ހުށަހަޅަން ޖެހެ އެވެ.
އެ ކޮމިޓީން އެންމެ ފަހުން ތައްޔާރު ކުރި ރިޕޯޓުގައި ބުނީ ބަލިމަޑުކަން އޮތީ އާއްމު ސިއްހީ ނުރައްކަލެއް ކަމަށް ބަލަން ޖެހޭ ހާލަތުގައި ކަމަށެވެ.
ދުނިޔޭގެ ތަފާސްހިސާބަށް ބަލާއިރު، ކޮވިޑް ކޭސްތަކާއި މަރުވާ އަދަދު ވެސް ދަށް ވާތާ މިހާރު ތިން ހަފްތާ ވެއްޖެ އެވެ. އެގޮތުން ފާއިތުވި ހަފްތާގައި ރިޕޯޓު ކުރީ ހަތް މިލިއަން ކޭސް އަދި 22،000 މަރެވެ.
މިއީ ބަލިމަޑުކަމުގެ ފުރަތަމަ ދުވަސްތަކަށް ފަހު އަދަދު މިހާ ދަށްވި ފުރަތަމަ ފަހަރެވެ. އެހެން ނަމަވެސް ބައެއް ގައުމުތަކުގައި އަދަދު އިތުރުވެ، ސީރިއަސް ހާލަތަށް ދާ މަންޒަރު އަދިވެސް ފެނެ އެވެ.
