އަންހެނުންގެ މެދުގައި ނަފުސާނީ ބަލިމަޑުކަމެއް ކަމަށްވާ ޑިޕްރެޝަން ނުވަތަ މާޔޫސްވުމުގެ މައްސަލަ އިތުރުވަމުން ދާއިރު، މިއީ އާދައިގެ ދެރަވުމަކަށްވުރެ ސީރިއަސްކަން ބޮޑު ބައްޔެކެވެ.
ދިރާސާތަކުން ދައްކާ ގޮތުގައި ފިރިހެނުންނަށްވުރެ ދެގުނަ އިތުރަށް އަންހެނުންނަށް މި ބަލި ތަހައްމަލު ކުރަންޖެހެ އެވެ. މިއީ ދިރިއުޅުމުގެ އާދަކާދަތަކަށާއި، މަސައްކަތުގެ މާހައުލަށާއި، އާއިލީ ގުޅުންތަކަށް އޭގެ ނޭދެވޭ އަސަރު ވަރަށް ބޮޑަށް ފޯރުވާ ކަމެކެވެ.
އަންހެނުންނަށް ޑިޕްރެޝަންގެ އަލާމާތްތައް ފެންނަ ގޮތް ފިރިހެނުންނާ ތަފާތެވެ. އާންމުކޮށް ފެންނަ އަލާމާތްތަކުގެ ތެރޭގައި ކުރިން ކުރަން އުފާވި ކަންކަމަށް ހުންނަ ޝައުގުވެރިކަން ކެނޑުމާއި، އެއްވެސް ކަމަކަށް ސަމާލުކަން ދޭން އުނދަގޫވުމާއި، ކެއުމަށް އޮންނަ ޝައުގުވެރިކަން ކުއްލިއަކަށް ބަދަލުވުން ހިމެނެ އެވެ.
މީގެ އިތުރުން ސަބަބެއް ނެތި ވަރުބަލިވުމާއި، އަމިއްލަ ނަފުސަށް އޮންނަ އިތުބާރު ކުޑަވުމާއި، އަމިއްލަ ނަފުސް ކުށްވެރި ކުރުމަކީ ވެސް މި ބަލީގެ ނިޝާންތަކެވެ. ގިނަ އަންހެނުންނަށް ސަބަބެއް ނެތި ރޮވުމާއި، ނިދަން އުނދަގޫވުމާއި، އަދި މަރުވުމާ މެދު ވިސްނުން ފަދަ ނުރައްކާތެރި އަލާމާތްތައް ވެސް ފެނެއެވެ.
ފިރިހެނުންނާއި އަންހެނުންގެ މެދުގައި މި ބަލީގެ އަލާމާތްތައް ތަފާތުވާ މައިގަނޑު ސަބަބަކީ ހަށިގަނޑަށް އަންނަ ހޯމޯންތަކަށް އަންނަ ބަދަލުތަކެވެ.
އަންހެނުންގެ ހަށިގަނޑަށް މައްސަރު ކަންތައްތަކުގެ ދުވަސްވަރާއި، މާބަނޑު ދުވަސްވަރާއި، ވިހެއުމަށްފަހު އަދި އިއްދައިން ކެނޑޭ ދުވަސްވަރު އަންނަ ބޮޑެތި ބަދަލުތަކުގެ ސަބަބުން ނަފުސާނީ ދުޅަހެޔޮކަމަށް އަސަރުކުރެ އެވެ. މީގެ އިތުރުން މުޖުތަމައު ބައްޓަންވެފައިވާ ގޮތުން ފިރިހެނުން ދެރަވުމުގެ ބަދަލުގައި ރުޅި އިސްކޮށް އެހެން މީހުން ކުށްވެރިކުރާއިރު، އަންހެނުން ގިނައިން އިހުސާސް ކުރަނީ މާޔޫސްކަމާއި އަމިއްލަ ނަފްސު ކުށްވެރިކުރުމެވެ.
އަންހެނުންނަށް ޑިޕްރެޝަން މެދުވެރިވާ ހާއްސަ ހާލަތްތަކެއް ހުރެއެވެ. އޭގެ ތެރޭގައި މައްސަރު ކަންތައްތަކާ ގުޅިގެން ކުރިމަތިވާ ޕީއެމްޑީޑީ އާއި، ވިހެއުމަށްފަހު ކުރިމަތިވާ ޕޯސްޓްޕާޓަމް ޑިޕްރެޝަން ހިމެނެ އެވެ. ވިހެއުމަށްފަހު ހަށިގަނޑުގެ ހޯމޯންތަކަށް އަންނަ ކުއްލި ބަދަލުތަކުގެ ސަބަބުން ދަރިފުޅަށް އަޅާލުމަށް އުނދަގޫވެ، އަމިއްލަ ނަފުސަށް ގެއްލުން ދިނުމުގެ ހިޔާލުތައް އުފެދުމަކީ ވަރަށް ބޮޑަށް ސަމާލުވާންޖެހޭ ކަމެކެވެ. މީގެ އިތުރުން އާއިލާގައި ނަފުސާނީ ބަލިތައް ހުރުމާއި، ދިރިއުޅުމުގައި ދިމާވާ ހިތާމަވެރި ހާދިސާތަކަކީ ވެސް މި ބައްޔަށް މަގުފަހިވާ ކަންކަމެވެ.
މި ބަލިން އަރައިގަތުމަށްޓަކައި އެންމެ މުހިންމު ކަމަކީ އެހީތެރިކަން ހޯދުމެވެ. ނަފުސާނީ ބަލިތަކަށް ހާއްސަ ޑޮކްޓަރުންނާއި ކައުންސިލަރުންގެ އެހީތެރިކަން ހޯދުމަކީ ބަލިން ފަސޭހަވުމަށް އޮތް އެންމެ ކުރު މަގެވެ.
މީގެ އިތުރުން ކޮންމެ ދުވަހަކު ކަސްރަތު ކުރުމާއި، ސިއްހަތަށް ފައިދާހުރި ކާނާ ބޭނުންކުރުމާއި، އަދި ދިރިއުޅުމުގައި ހިތްހަމަޖެހުން ލިބޭ ފަދަ މީހުންނާއެކު ވަގުތު ހޭދަކުރުމަކީ މުހިންމު ކަމެކެވެ. އަދި ދިރިއުޅުމުގައި ދިމާވާ މައްސަލަތަކާއި އިހުސާސްތައް އިތުބާރު ހުރި މީހަކާ ހިއްސާކުރުމަކީ ބަލީގެ އަލާމާތްތައް ކުޑަކުރުމަށް އެހީތެރިވެދޭނެ ކަމެކެވެ. ޑިޕްރެޝަނަކީ ފަރުވާ ދެވޭ ބައްޔަކަށްވާއިރު، އަލާމާތްތައް ފެންނަ ނަމަ ލަސްނުކޮށް ސިއްހީ އެހީތެރިކަން ހޯދުމަކީ ދުޅަހެޔޮ ދިރިއުޅުމަކަށް ކޮންމެހެން ބޭނުންތެރި ކަމެކެވެ.
