2024 ވަނަ އަހަރު މުޅި ދުނިޔޭގައި ގާތްގަނޑަކަށް 694,000 އަންހެނުން އުރަމަތީގެ ކެންސަރު ބަލީގައި މަރުވެފައިވާ ކަމަށް އިތުބާރު ހުރި ތަފާސްހިސާބުން ދައްކަ އެވެ. އުރަމަތީގެ ކެންސަރަކީ މިހާރު މުޅި ދުނިޔޭގައި ވެސް އަންހެނުންނަށް އެންމެ އާންމުކޮށް ޖެހޭ ކެންސަރުގެ ބާވަތެވެ.
އުރަމަތީގެ ކެންސަރު ޖެހޭ އަންހެނުން ސަލާމަތްވުމުގެ ފުރުސަތު ބިނާވެފައިވަނީ، އެމީހަކަށް ޖެހިފައިވާ ކެންސަރުގެ ބާވަތާއި، ބަލީގެ ސްޓޭޖް ނުވަތަ ހުރި މަރުހަލާގެ އިތުރުން، ހަށިގަނޑުގެ އެހެން ގުނަވަންތަކަށް ބަލި ފެތުރިފައިވާ މިންވަރުގެ މައްޗަށެވެ.
މީގެ ކުރިން ހަދާފައިވާ ދިރާސާތަކުން ދައްކާ ގޮތުގައި، ޑޮކްޓަރުން އިރުޝާދުދޭ ފަރުވާގެ އިތުރުން، ހަރަކާތްތެރި ދިރިއުޅުމެއް އުޅުން ފަދަ ސިއްހަތަށް ފައިދާހުރި އާދަތައް އަށަގެންނެވުމަކީ އުރަމަތީގެ ކެންސަރު ޖެހިފައިވާ އަންހެނުންގެ އުމުރު ދިގުވުމަށް އެހީތެރިވެދޭނެ ކަމެކެވެ.
ކެއިންބުއިމުގެ އާދަތަކަށް ބަލާއިރު، ބައެއް ހާއްސަ މާއްދާތަކުގެ ސަބަބުން އުރަމަތީގެ ކެންސަރުގައި މަރުވުމުގެ ނުރައްކާ ކުޑަކޮށްދޭ ކަމަށް މީގެ ކުރީގެ ދިރާސާތަކުން ވެސް ވަނީ ދައްކާފަ އެވެ. އޭގެ ތެރޭގައި ވިޓަމިން ބީ، ވިޓަމިން ޑީ، އޮމެގާ-3 ފެޓީ އެސިޑް އަދި ވިޓަމިން ސީ ހިމެނެ އެވެ.
ބްރިޓިޝް ޖާނަލް އޮފް ނިއުޓްރިޝަންގައި ދާދި ފަހުން ޝާއިއުކުރި އާ ދިރާސާއެއްގައި ބުނެފައިވާ ގޮތުގައި، ގަސްގަހާގެހިން ލިބޭ ގުދުރަތީ މާއްދާއެއް ކަމަށްވާ "ޕޮލިފެނޯލް" ބޭނުންކުރުމުން، އުރަމަތީގެ ކެންސަރުގައި މަރުވުމުގެ ފުރުސަތާއި ބަލި އަލުން އެނބުރި އައުމުގެ ނުރައްކާ ކުޑަކޮށްދެ އެވެ. މި މާއްދާއަކީ ހަށިގަނޑަށް ގެއްލުންދޭ މާއްދާތަކާ ދެކޮޅަށް މަސައްކަތްކުރާ "އެންޓިއޮކްސިޑެންޓް" ސިފަތައް އެކުލެވޭ މާއްދާއެކެވެ.
މި ދިރާސާ ހެދުމަށްޓަކައި ސައިންސްވެރިން ވަނީ އުރަމަތީގެ ކެންސަރު ޖެހިފައިވާ 95 އަންހެނުންގެ ސިއްހީ ހާލަތު އެވްރެޖްކޮށް 11.5 އަހަރުގެ މުއްދަތަށް ބަލާފަ އެވެ. މި މުއްދަތުގައި އެމީހުންގެ ކެއިންބުއިމުގައި ޕޮލިފެނޯލް ބޭނުންކުރާ މިންވަރު ވަނީ ދިރާސާކޮށްފަ އެވެ.
ދިރާސާ ނިމުނުއިރު ސައިންސްވެރިންނަށް ފާހަގަކުރެވުނު ގޮތުގައި، ޕޮލިފެނޯލްގެ ބާވަތްތައް ގިނައިން ބޭނުންކުރާ އަންހެނުން، ހާއްސަކޮށް "ފީނޯލިކް އެސިޑް" އާއި "ލިގްނަންސް" ގިނައިން ބޭނުންކުރާ މީހުން އުރަމަތީގެ ކެންސަރުގައި މަރުވުމުގެ ފުރުސަތު ވަރަށް ބޮޑަށް ކުޑަ އެވެ.
ވަކިން ހާއްސަކޮށް ފީނޯލިކް އެސިޑް ގިނައިން ބޭނުންކުރުމަކީ ބަލި އަލުން އެނބުރި އައުމުގެ ފުރުސަތު ކުޑަކޮށްދޭ ކަމެއްކަން ފާހަގަކުރެވުނެވެ. އަދި ޖުމްލަ ގޮތެއްގައި ޕޮލިފެނޯލް ގިނައިން ބޭނުންކުރުމަކީ އުރަމަތީގެ ކެންސަރު ޖެހިފައިވާ މީހުންގެ އުމުރު ދިގުވުމާ ގުޅުމެއް ހުރި ކަމެއްކަން ވެސް މި ދިރާސާއިން ދައްކަ އެވެ.
މި ދިރާސާގައި ބައިވެރިވި މީހުންނަށް ޕޮލިފެނޯލް، ފީނޯލިކް އެސިޑް އަދި ލިގްނަންސް އެންމެ ގިނައިން ލިބިފައިވަނީ ކޮފީގެ ޒަރީއާއިންކަން ސައިންސްވެރިން ފާހަގަކުރި އެވެ.
ޕޮލިފެނޯލްއަކީ ގުދުރަތީ ގޮތުން ގަސްގަހާގެހިން ލިބޭ ވަރަށް ގިނަ ބާވަތްތައް ހިމެނޭ މާއްދާއެކެވެ. މި މާއްދާ ހިމެނޭ ތަކެތީގެ ތެރޭގައި ބެރީގެ ބާވަތްތައް، ކޮކޯ، ކޮފީ، ކުލަގަދަ ތަރުކާރީ، އެކްސްޓްރާ ވާޖިން އޮލިވް އޮއިލް، ހާބްސް އަދި މަސާލާގެ ބާވަތްތައް، ބީންސް އާއި މުގުގެ ބާވަތްތައް އެކުލެވެ އެވެ.
މައުލޫމާތު: މެޑިކަލް ނިއުސް ޓުޑޭ
