ނިއުދިއްލީ، އިންޑިއާ (އޭޕްރީލް 13) - އިންޑިއާ ފުޓްބޯޅަ ފެޑެރޭޝަން (އައިއެފްއެފް)ގެ ރައީސްގެ މަގާމުގައި ހުންނެވި، ޕްރަފުލް ޕަޓޭލް އަށް ގާނޫނީ ގޮތުން އެ މަގާމުގައި ދެން ނުހުރެވޭނެ ކަމަށް އިންޑިއާގެ ކުޅިވަރާބެހޭ ވުޒާރާއި ކަނޑައަޅައިފަ އެވެ.
އިންޑިއާ ފުޓްބޯޅައިގެ ރައީސްކަން ތިން ދައުރުކުރެއްވި، ޕްރަފުލްގެ އެންމެ ފަހުގެ ދައުރުގެ މުއްދަތު 2020 ޑިސެމްބަރަށް ހަމަވާނެ އެވެ. އިންޑިއާގެ ކުޅިވަރާ ބެހޭ މިނިސްޓްރީން ސުޕްރީމް ކޯޓަށް ފޮނުވި ސިޓީގައި ބުނެފައިވަނީ އިތުރަށް ފަސް ނުކޮށް އިންޑިއާ ފުޓްބޯޅައިގެ އިންތިހާބުވީ އެންމެ އަވަހަކަށް ބާއްވަން ޖެހޭނެ ކަމަށާއި މި ވަގުތު އިންޑިއާ ފުޓްބޯޅައިގެ އިސް ވެެރިންގެ ގޮތުގައި ޕްރަފުލްގެ ލީޑަޝިޕްގެ މެމްބަރުން ތިބީ ގާނޫނީ ހައިސިއްޔަތަކުން ނޫން ކަމަށެވެ.
އިންޑިއާ ފުޓްބޯޅަ ފެޑެރޭޝަނުގެ އަސާސީ ގަވާއިދު އިސްލާހު ކުރަން ޖެހޭ މައްސަލައެއް 2017 ވަަނަ އަހަރުން ފެށިގެން އިންޑިއާ ސުޕްރީމް ކޯޓުގައި އެބައޮތެވެ. އިންތިހާބެއް ނުބާއްވައި، ޕްރަފުލް ފާއިތުވި ދެ އަހަރު އިންޑިއާ ފުޓްބޯޅައިގެ އިސް ވެރިއެއްގެ ގޮތުގައި ހުންނެވީ، އިންޑިއާގެ ކުޅިވަރު ކޯޑުގައިވާ ގިނަ މާއްދާތަކާ ވެސް ހިލާފަށް ކަމަށް އިންޑިއާގެ ކުޅިވަރު ކޮމިއުނިޓީގެ އެކި ފަރާތްތަކުން އަންނަނީ ބުނަމުންނެވެ.
ފީފާގެ ކޮންގްރެސްއެއްގެ ތެރެއިން އޭއައިއެފްއެފްގެ ރައީސް ޕްރަފުލް (ކ) އާއި ފީފާގެ ރައީސް އިންފަންޓީނޯ.--- ފޮޓޯ: އޭއެފްޕީ
އިންޑިއާގެ ކުޅިވަރު ކޯޑުގައިވާ ގޮތުން ގައުމީ ކުޅިވަރު އެސޯސިއޭޝަނެއްގެ ރައީސްގެ މަގާމުގައި އެކަކަށް ތިން ދައުރަށް ވުރެ އިތުރަށް ނުހުރެވޭނެ އެވެ. އިންޑިއާގެ ކުޅިވަރާބެހޭ އިސް ފަރާތްތަކުގެ އެއްބާރުލުމާ އެކު އެކުލަވާލި ސްޕޯޓްސް ކޯޑަށް 2011 ވަނަ އަހަރު ފެށިގެން އަންނަނީ އަމަަލުކުރަމުންނެވެ.
ޕްރަފުލް، އެންމެ ފުރަތަމަ އިންޑިއާގެ ފުޓްބޯޅަ ފެޑެރޭޝަން ރައީސްކަމަށް އިންތިހާބުވެވަޑައިގަތީ 2009 ވަނަ އަހަރު އެވެ. އިންޑިއާގެ ސްޕޯޓްސް ކޯޑް ބުނާގޮތުން ޕްރަފުލް އަށް ދެން ފުޓްބޯޅަ ފެޑެރޭޝަންގެ ރައީސްގެ މަގާމުގައި ދެމިނުހުރެވޭނެ އެވެ.
އިންޑިއާގެ ކުޅިވަރާ ބެހޭ މިނިސްޓްރީން ސުޕްރީމް ކޯޓަށް ފޮނުވި ލިޔުމުގައި ބުނެފައިވަނީ އޭއައިއެފްއެފްގެ ހިންގުން ޕްރަފުލްގެ ބެލުމުގެ ދަށުން ކުރިއަށްދާ މުއްދަތު ދެން އިތުރަށް ދިގުލައި ގޮސްފިނަމަ އިންޑިއާ ސަރުކާރުން ފުޓްބޯޅަ ފެޑެރޭޝަން ބަލައިގަތުމާ މެދު ދެ ވަނަ ވިސްނުމަކަށް ދާނެ ކަމަށެވެ.
ޕްރަފުލްގެ ގާނޫނީ ވަކީލާ ހަވާލާދީ އިންޑިއާގެ އެކި މީޑިއާތަކުން ރިޕޯޓްކޮށްފައިވާ ގޮތުގައި ދައުރު ހަމަވިތާ 14 މަސްވީއިރު ވެސް އިންޑިއާގެ ސަރުކާރުން ފުޓްބޯޅަ ފެޑެރޭޝަންގެ އިންތިހާބަށް ވީ ގޮތެއް ނުބަލައި، ކުއްލިއަކަށް ސުޕްރީމް ކޯޓު މެދުވެރިކޮށް ޕްރަފުލް މަގާމުން ދުރުކުރަން އުޅެނީ މީގެ ވަކި ބައެއްގެ "އަމިއްލަ މަސްލަހަތު" އޮތުމުން ކަމަށް ބެލެވޭ ކަމަށެވެ.
ޕްރަފުލް އަކީ ފީފާގެ ރައީސް ޖިއާނީ އިންފަންޓީނޯއާ ގާތްގުޅުމެއް އޮންނަ ފަރާތެއް ކަމަށް އިންޑިއާގެ މީޑިއާތަކުން ރިޕޯޓްކުރެ އެވެ. އެކަމަށް ބާރު ލިބޭ އެންމެ ބޮޑު ސަބަބަކީ ބޮޑެތި ގައުމުތަކުން ޝައުގުވެރިކަން ފާޅުކޮށްފައިވަނިކޮށް 2017 ވަނަ އަހަރު ފީފާގެ 17 އަހަރުން ދަށުގެ ވޯލްޑް ކަޕް ހޯސްޓް ކުރުމުގެ ފުރުސަތު އިންޑިއާ އަށް ދިނުމުންނެވެ. އަދި މި އަހަރު ފީފާގެ 17 އަހަރުން ދަށުގެ އަންހެން ވޯލްޑް ކަޕް ބޭއްވުމުގެ ފުރުސަތު ވެސް ދީފައި އޮތީ އިންޑިއާ އަށެެވެ.
