ރިސޯޓުތަކާއި ވިޔަފާރި ކުންފުނިތަކަށް ވިއްކާ ތެލުގެ އަގު ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ބޮޑުކޮށްފި އެވެ.
މި ބަދަލާއެކު މިއަދުން ފެށިގެން އެސްޓީއޯ އިން ރިސޯޓުތަކާއި ވިޔަފާރި ކުންފުނިތަކަށް ޑީސެލް ލީޓަރެއް ވިއްކަނީ 17.57ރ. އަށެވެ. އަދި ޕެޓްރޯލް ލީޓަރެއް ވިއްކަނީ 16.09ރ. އަށެވެ. އެސްޓީއޯއިން ވަނީ އަގަށް ގެނައި ބަދަލުތައް އެ ކުންފުނީގެ ކަސްޓަމަރުންނަށް އަންގާފަ އެވެ. ނަމަވެސް، އެ މައުލޫމާތު އާންމެއް ނުކުރެ އެވެ.
ރިސޯޓުތަކާއި ވިޔަފާރި ކުންފުނިތަކަށް ކުރިން ތެޔޮ ވިއްކަނީ، އެހެން ފަރާތްތަކަށް ވެސް ވިއްކާ އާންމު ރޭޓްގަ އެވެ.
ސަރުކާރުގެ ކުންފުނިތަކާއި ބައުޒަރުތަކަށް ވިއްކާ ތެލުގެ އަގު ބޮޑުކޮށްފައި ނުވާކަން މި ނޫހަށް ވަނީ ކަށަވަރު ކުރެވިފަ އެވެ. އެގޮތުން، ފެނަކަ، ސްޓެލްކޯ އަދި އެމްޕީއެލް ފަދަ ކުންފުނިތަކަށް ތެޔޮ ވިއްކަމުން ދަނީ ކުރިން ވެސް ވިއްކި ރޭޓުގަ އެވެ.
އެފްއެސްއެމްގެ ޝެޑުތަކުން ވިއްކާ ތެލުގެ އަގަށް ބަދަލެއް އައިސްފިނަމަ އެކަން ހާމަކުރެ އެވެ.
މިކަމާ ގުޅޭގޮތުން އެސްޓީއޯގެ ބަހެއް ހޯދަން މި ނޫހުން މަސައްކަތް ކުރިނަމަވެސް ލިބޭ ގޮތް ނުވި އެވެ.
އެންމެ ފަހުން ޝެޑުތަކުން ވިއްކާ ތެލުގެ އަގަށް އެސްޓީއޯއިން ބަދަލު ގެނައީ މާޗް 5، ގަ އެވެ. އެއީ ރަޝިއާ-ޔޫކްރެއިން ހަނގުރާމަ އާ ގުޅިގެން ދުނިޔޭގެ ބާޒާރުގައި ތެލުގެ އަގު ބޮޑުވުމުންނެވެ. އެގޮތުން މިހާރު ޕެޓްރޯލް ލީޓަރެއް ވިއްކަނީ 14.60ރ. އަދި ޑީސަލް ލީޓަރެއް ވިއްކަނީ 14.80ރ. އަށެވެ.
