ރާއްޖޭގެ ޓޫރިޒަމް އިންޑަސްޓްރީއަށް އެހީތެރިކަން ފޯރުކޮށްދިނުމުގެ އަމާޒުގައި މޯލްޑިވިއަން އިން ދެކުނު އެފްރިކާއަށް ދަތުރުތައް ފެށުމަށް މަސައްކަތް ކުރަމުން އަންނަ ކަމަށް އެ ކުންފުނިން ބުނެފި އެވެ.
ގައުމީ އެއާލައިން ހިންގާ އައިލެންޑު އޭވިއޭޝަންގެ 22 ވަނަ އަހަރީ ދުވަހާ ގުޅިގެން "އަދަދު" އަށް ދެއްވި އިންޓަވިއުގައި އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނިފާ ވަނީ އެކަން ހާމަކުރައްވާފަ އެވެ.
މިވަގުތު މޯލްޑިވިއަނުން ބޭރުގެ ދަތުރުތައް ކުރަމުންދަނީ އެންމެ ދެ ބޯޓާއެކު އެވެ. އެ ބޯޓުތަކުގެ ރޭންޖު ދަށްވުމުން ދަތުރުކުރެވޭ ގައުމުތައް މަދެވެ. ނަމަވެސް، މި ބޯޓުތަކާއެކު ވެސް ދަތުރުތައް އެ ކުންފުނިން ފަށަން ވަނީ ނިންމާފަ އެވެ.
"އަޅުގަނޑުމެންގެ މިހާރު ހުރި ބޯޓުތައް ބޭނުން ކޮށްގެން އިހަކަށް ދުވަހަކު ސައުތު އެފްރިކާއަށް ވެސް އެޅިން ފްލައިޓެއް،" އެ ގައުމަށް ދަތުރުތައް ފަށަން ހަމަޖެހިފައިވާކަން ހާމަކުރައްވަމުން ޖެނިފާ ވިދާޅުވި އެވެ.
ދެކުނު އެފްރިކާއަށް މޯލްޑިވިއަންގެ ދަތުރުތައް ކުރާނީ މޮރިޝަސްގައި ޓްރާންސިޓު ކުރުމަށްފަހު އެވެ.
"އަޅުގަނޑުމެން ބޭނުން ދިވެހިރާއްޖޭގެ ޓޫރިޒަމް އިންޑަސްޓްރީއަށް ކޮންމެވެސް ކަހަލަ އިންޕުޓެއް ވެސް ދޭން،" މި ދަތުރުތައް ފަށަން ގަސްތުކުރާ ސަބަބު ސާފުކޮށްދެއްވަމުން ޖެނިފާ ވިދާޅުވި އެވެ.
އަންނަ މަހުން ފެށިގެން ދެކުނު އެފްރިކާއަށް މޯލްޑިވިއަންގެ ދަތުރުތައް ފެށުމަށް މަސައްކަތް ކުރާއިރު، އެ ކުންފުނީގެ އަމާޒު ހުރީ އޮޕަރޭޝަންތައް ފެށުމަށް ފަހު، މެދުނުކެނޑޭ ގޮތަކަށް އެ ރޫޓުގައި ފްލައިޓުތައް ބޭއްވުމަށެވެ. އެގޮތުން، ހަފްތާއަކު ދެ ފްލައިޓު ނުވަތަ މަހަކު ހަތަރު ފްލައިޓު ބާއްވަން ދަނީ މަޝްވަރާ ކުރަމުންނެވެ.
މޯލްޑިވިއަންގެ އަމާޒުތައް ހުރީ އިންޓަނޭޝަނަލް ފްލައިޓުތައް އިތުރުކޮށް ރާއްޖެއަށް ފަތުރުވެރިން ގެންނަ މިންވަރު އިތުރުކުރުމަށެވެ. އެކަން ކުރުމަށް ބޮޑު ބޯޓެއް ގެނައުމަށް ވެސް އެ ކުންފުނިން އަންނަނީ މަސައްކަތް ކުރަމުންނެވެ.
"އަޅުގަނޑުމެންގެ ވިސްނުމުގަ އެބަހުރި އޭ-330 އެއަކްރާފްޓެއް ގެނައުމަށް،" ކުންފުނީގެ އަމާޒުހުރީ ބޮޑެތި ބޯޓުގައި މީހުން އުފުލަންކަން ހާމަކުރައްވަމުން ޖެނިފާ ވިދާޅުވި އެވެ.
