ހދ. ކުޅުދުއްފުށި ސިޓީގައި ގާއިމްކުރަން ނިންމާފައިވާ ފުށާއި ހަނޑޫ ބަންދުކުރާ ފެކްޓްރީގެ އަމަލީ މަސައްކަތް މިއަހަރު ފެށުމަށް އެސްޓީއޯއިން ނިންމައިފި އެވެ.
ފެކްޓްރީ އެޅުމަށް ބޭނުންވާ ބިން ބެލުމަށް އެސްޓޯއޯގެ އިސް ވެރިންނާއި އެމްޕީއެލްގެ ވެރިން މިއަދު ވަނީ ކުޅުދުއްފުއްޓަށް ޒިޔާރަތް ކޮށްފަ އެވެ.
އެގޮތުން ކުޅުދުއްފުއްޓަށް ވަޑައިގެން ކައުންސިލާ ބައްދަލު ކޮށްފައި ވަނީ އެމްޕީއެލްގެ ސީއީއޯ ޝާހިދު އަލީ އާއި އެސްޓީއޯގެ މެނޭޖިން ޑިރެކްޓަރު ހުސައިން އަމްރު އެވެ. އަދި ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފާއި ދެކުނު ދާއިރާގެ މެމްބަރު ޖަމްޝީދު މުހައްމަދު ވެސް އެ ބައްދަލުވުމުގައި ބައިވެރިވި އެވެ.
މި ބައްދަލުވުމުގައި ފުށް ފެކްޓްރީ އެޅުމަށް ބިމެއް ވަނީ ފައިނަލްކޮށްފަ އެވެ. އެ ފެކްޓްރީ އެޅުމަށް އެއްބަސްވީ ކުޅުދުއްފުށީގައި އެމްޕީއެލްއިން ހިންގާ ޕޯޓް ހިމެނޭ ސަރަހައްދުން އެ ކުންފުންޏަށް ދޫކޮށްފައިވާ ބިމުން ސަރަހައްދެއްގަ އެވެ. އެ ސަރަަހައްދުގައި ކުޅުދުއްފުށީ އެސްޓީއޯ ފިހާރަ ވެސް ހުރެ އެވެ.
އަމްރު ވިދާޅުވީ މި ފުށް ފެކްޓްރީގެ ސަބަބުން ކުޅުދުއްފުށި ސިޓީގައި އިތުރު ވަޒީފާތައް އުފެދި އަލަށް ވިޔަފާރިއަށް ވަންނަން ބޭނުންވާ މީހުންނަށް ވެސް ފުރުސަތުތަކެއް ލިބޭނެ ކަމަށެވެ.
މި ފުށް ފެކްޓްރީއަކީ ރާއްޖެއަށް ދިމާވެފައިވާ ކާބޯތަކެތީގެ ރައްކާތެރިކަމުގެ މައްސަލައަށް ހައްލެއް ގެނައުމުގެ ގޮތުން އެސްޓީއޯއިން މި އަހަރު އިއުލާނުކުރި މަޝްރޫއެކެވެ. އަދި އަންނަ އަހަރުގެ މެދެއްހާ ހިސާބުގައި ފެކްޓްރީ އޮޕަރޭޝަނަށް ގެންނަން ކުރަން ޖެހޭ މަސައްކަތްތަށް އެސްޓީއޯއިން އަންނަނީ ކުރަމުންނެވެ.
ފުށް ފެކްޓްރީ މަޝްރޫއުގެ މަސައްކަތް ރަސްމީކޮށް ފެށުމާ ގުޅިގެން އެސްޓީއޯއިން ބުނީ ފެކްޓްރީއާ ގުޅޭ ދިރާސާތައް ކުރަން ބޭރުގެ ކޮންސަލްޓަންޓުން މަސައްކަތް ފަށާފައިވާ ކަމަށެވެ. އަދި މި މަޝްރޫއުގެ ކާމިޔާބުކަން ކަށަވަރުކުރުމުގެ ގޮތުން ބަލަންޖެހޭ ކަންކަން އެ ކޮންސަލްޓަންޓުންނާ ގުޅިގެން އެސްޓީއޯއިން ބަލަމުން އަންނަ ކަމަށް ވަނީ ބުނެފަ އެވެ.
