އިޒްރޭލާއި ފަލަސްތީނުގެ މަޝްރަހު ހޫނުވެފައިވާ މި ދަނޑިވަޅުގައި އިޒްރޭލުން ހުޅަނގު އައްސޭރީގެ ޖެނިން ސިޓީގައި ހިންގާ އޮޕަރޭޝަން ތިން ވަނަ ދުވަހަކަށް ދިގު ދަންމައިފި އެވެ.
ފާއިތުވި ތިން ހަފުތާގައި އިޒްރޭލުގައި ދީފައިވާ ތަފާތު އެކި ހަމަލާތަކުގައި 14 މީހުން މަރުވެފައިވެ އެވެ. އެއީ ޓެރަރިޒަމްގެ އަމަލުތަކެއްގެ ގޮތުގައި ބޮޑު ވަޒީރު ނަފްތާލީ ބެނެޓް ސިފަކުރެއްވި އެވެ.
އާދީއްތަ ދުވަހު އިޒްރޭލުން ހުޅަނގު އައްސޭރީގައި ހިންގި އޮޕަރޭޝަނުގައި ފަލަސްތީނުގެ ހަތަރު މީހުން މަރުވި އެވެ. ޖެނިން އާއި ބެތްލްހެމްގެ ރައްޔިތުން ވަނީ މުޒާހަރާ ކުރަން ނިންމާފަ އެވެ.
މަރުވި މީހުންގެ ޖަނާޒާ އަށް އެތައް ހާސް ބަޔަކު ހޯމަ ދުވަހު ޖެނިންގެ މަގުތަކަށް ނުކުތީ ބަޑި އާއި ފަލަސްތީނުގެ ދިދަ ހިފައިގެންނެވެ. މަރުވި މީހުންގެ ތެރޭގައި ހަ ކުދިންގެ މަންމައެއް ހިމެނެ އެވެ.
ޖެނިން ރެފިއުޖީ ކޭމްޕުގައި އަސްކަރީ ކަންކަން ހިންގުމުގައި އިސްކޮށް އުޅޭ އަބޫ މުއާދް ބުނީ އިޒްރޭލުގެ "ޒަޔޮނިސްޓް ދުޝްމަނާ ދެކޮޅަށް ނުކުންނާނެ" ކަމަށެވެ.
އިޒްރޭލުގެ އޮޕަރޭޝަނުގައި ޓާގެޓް ކުރަނީ މިދިޔަ ބުރާސްފަތި ދުވަހު އިޒްރޭލުގައި ހަމަލާ ދިން އުމުރުން 28 އަހަރުގެ ރާދް ހާޒިމްގެ އާއިލާއަށެވެ.
ޖެނިންގައި ދިރިއުޅޭ ރާދް ހާޒިމްގެ އާއިލާ އާއި އިޒްރޭލް ސިފައިންނާ ދެމެދު ވަނީ ބަޑީގެ ހަމަލާތައް ބަދަލުކޮށްފަ އެވެ. އާއިލީ ގެ ސުންނާފަތި ކުރުމުގެ އިންޒާރު ދީ، ރާދް ހާޒިމްގެ ބައްޕަ އަމާން ދިނުމަށް ވެސް އިޒްރޭލުން ޑިމާންޑް ކުރެ އެވެ.
މި ފަހަރު ވެސް އިޒްރޭލާއި ފަލަސްތީނާ ދެމެދު ހަމަނުޖެހުން ބޮޑުވެފައި މި ވަނީ ރޯދަ މަހުގަ އެވެ. މިދިޔަ އަހަރުގެ ރޯދަ މަހު ވެސް ހަމަނުޖެހުން ބޮޑުވެ، 11 ދުވަހުގެ ހަނގުރާމައެއް ކުރި އެވެ.
