ހުޅުމާލޭގައި މީގެ ދެ އަހަރު ކުރިން ތޫނު އެއްޗަކުން ހަމަލާދީ އަނިޔާވެރި ގޮތަކަށް މަރާލި ޓެކްސީ ޑްރައިވަރު ގާސިމް ހަސަން, 59, ގެ މަރުގެ މައްސަލައިގައި ތުހުމަތުކުރެވޭ ޅ. ހިންނަވަރު، ބޮޑުހިޔާގެ، އަދުހަމް މުހައްމަދުއާ ދެކޮޅަށް ދައުލަތުން ހުށަހަޅަ ތިން ހެކިވެރިއެއްގެ ހެކިބަސް މިއަދު ނަގައިފި އެވެ.
ދައުލަތުން އޭނާގެ މައްޗަށް އުފުލާފައިވާ ގަސްދު މަރުގެ ދައުވާ އެވެ.
އެ މައްސަލައިގައި އަދުހަމް ވަނީ ގާސިމްގެ މަރަށް އިއުތިރާފްވެފަ އެވެ. އެކަމަކު އަދުހަމް ވަނީ އެއީ އޭނާ ގަސްދުގައި ކުރިކަމެއް ނޫން ކަމަށް ބުނެފަ އެވެ. އެހެންކަމުން އެ މައްސަލަ އެއީ ގަސްދު މަރެއްގެ ގޮތުގައި ސާބިތުވޭތޯ ނުވަތަ ނުވޭތޯ ވަޒަން ކުރުމަށް ހެކިބަސް ނެގުން ވަނީ ފަށާފަ އެވެ.
އެ މައްސލައިގައި މިއަދު 10:00 ގައި އޮތް އަޑުއެހުމުގައި ދައުލަތުގެ ފަރާތުން ވަނީ ތިން ހެކިވެރިޔަކު ހުށަހަޅާފަ އެވެ. އެ ތިން ހެކިވެރިންނަކީ ވެސް ފުލުހުންނެވެ. އޭގެ ތެރޭގައި ގާސިމް މަރާލި ދުވަސް، ޑިސެމްބަރު 4، 2019 ވަނަ ދުވަހު، އެ ސީންއަށް ހާޒިރުވެ، ފޮރެންސިކް ހެކި ނަގައި، ތަހުލީލުކުރި އަދި ރިޕޯޓު ތައްޔާރުކުރި އޮފިސަރުން ހިމެނެ އެވެ.
އޭގެ ތެރޭގައި އެ ސީންއިން ހެކި ނެގި އޮފިސަރަކާއި، ފިންގަޕްރިންޓް އެނަލިސިސް ހެދި އޮފިސަރަކާ، އަދުހަމް މާލޭގައި ދިރިއުޅެމުންދިޔަ މ. ޖަންތަރިގެ ބަލައި ފާސްކުރި އޮފިސަރަކު ވެސް ވަނީ މިއަދު ހެކި ބަސްދީފަ އެވެ.
އަދުހަމް, ގާސިމްއަށް ހަމަލާދީފައިވަނީ އަދުހަމް ގޮވައިގެން ގާސިމް ޓެކްސީ ދަތުރެއްގައި ހުޅުމާލޭގައި ދުއްވަމުން ދަނިކޮށެވެ. ގާސިމް މަރަލި ހާދިސާއަށްފަހު، އެ ސީންގައި އޮތް ގާސިމްގެ ޓެކްސީގެ ފަހަތު ސީޓުން ފިންގަޕްރިންޓް ނެގި ފުލުސް އޮފިސަރު މިއަދު ހެކިބަސްދެމުން ބުނީ އެ ފިންގަޕްރިންޓާއި އަދުހަމްގެ ފިންގަޕްރިންޓާ 52 ސިފަ ދިމާވާ ކަމަށެވެ.
ދިފާއުން އެ ފިންގަޕްރިންޓް ހެއްކާ ގުޅޭ ގޮތުން ސުވާލުކުރުމުން އެ އޮފިސަރު ވަނީ އުސޫލެއްގެ ގޮތުން ފިންގަޕްރިންޓް ދިމާވާން އޮންނަ އެންމެ ދަށް މިންގަނޑަކީ އަށެއް ސިފަ ކަމަށް ބުނެފަ އެވެ. އަދި އެއީ އެއްވެސް ޝައްކެއް ނެތި އަދުހަމްގެ ފިންގަޕްރިންޓް ކަމަށް އެ އޮފިސަރު ބުންޏެވެ.
އޭގެ އިތުރުން ދެން ހާޒިރުކުރި ސީން އޮފް ކްރައިމް ފުލުސް އޮފިސަރު ވަނީ އަދުހަމްގެ ހާޒިރުގައި ގާސިމް މަރާލި ސަރަހައްދު ބަލައި ފާސްކުރި ކަމަށް ބުނެފަ އެވެ. އަދި އެ ސަރަހައްދުގައި ހުރި ގޯނިތަކެއްގެ ތެރެއިން ނޫ ކުލައިގެ އަތްދިގު ގޮޅި ޖެހި ގަމީހެއް ނެގި ކަމަށާއި، އެ ގަމީހުގެ ދަށުގައި އޮތް ގާކޮޅަކުން ސްވަބް އެނަލިސިސްއަށް ލޭ ނެގިކަމަށް ވެސް އެ އޮފިސަރު ބުންޏެވެ.
އަދި އެ ސީންއަށް ހާޒިރުވެ ހުރި އަދުހަމް އެވަގުތު ލައިގެން ހުރި ފައިވާން ވެސް ހެކީގެ ގޮތުގައި ނަގާފައިވާ ކަމަށް އެ އޮފިސަރު ބުންޏެވެ. ނަމަވެސް ފައިވާން ނަގަން ޖެހުނީ ކޮން ސަބަބަކާހުރެ ކަމެއް ޝަރީއަތުގެ މަޖިލީހުގައި މިއަދު އެ އޮފިސަރު ނުބުނެ އެވެ.
ތިން ވަނައަށް ހާޒިރުކުރީ، އަދުހަމް މާލޭގައި ދިރިއުޅެމުން ދިޔަ މ. ޖަންތަރިގެ ބަލައިފާސްކޮށް ހެކި އެއްކުރި ފުލުސް އޮފިސަރުންގެ ތެރެއިން އޮފިސަރެކެވެ. އެ އޮފިސަރު މިއަދު ހެކިބަސް ދެމުން ވަނީ އެ ސީންއަށް އޭނާއާއެކު އެސްއޮ ފުލުހުންގެ ޓީމެެއް އަދި ޑްރަގް އެންފޯސްމެންޓް ޑިޕާޓްމެންޓުގެ ޓީމެއް ވެސް ދިޔަ ކަމަށް ބުނެފަ އެވެ.
ދައުލަތުން އެސްއޯ ފުލުހުން އަދުހަމް ދިރިއުޅުނު ގެޔަށްދާން ޖެހުނު ސަބަބު ކިޔައިިދިނުމަށް އެދުމުން އެ އޮފިސަރު ވަނީ އެއީ ބޮޑަށް އާންމު ހަމަޖެހުން ދެމެހެއްޓުމަށް ކަމަށާއި، ނަމަވެސް ޑްރަގް އެންފޯސްމެންޓް ޑިޕާޓްމެންޓްއިން އެތަނަށް ދިޔަ ސަބަބެއް އެނގިފައި ނުވާ ކަމަށެވެ.
އެ އޮފިސަރު ވަނީ ޖަންތަރިގެޔަށް ކޯޓު އަމުރަކާއެކު ވަދެ، ދެ ފަންފިލާއެއްގައި ހުރި ކޮޓަރިތަކެއް ބަލައި، ގިނަ އަދަދެއްގެ ތަކެތި މާއްދީ ހެކީގެ ގޮތުގައި ގެންދިޔަ ކަމަށް ބުނެފަ އެވެ. އޭގެ ތެރޭގައި ހިމެނެނީ ހުސް އަދުހަމް ލާ އަންނައުނުތަކެވެ. މިއަދު ހުށަހެޅި ތިން އޮފިސަރުން ވެސް ވަނީ މައްސަލައާ ގުޅޭގޮތުން ތައްޔާރުކޮށްފައިވާ ރިޕޯޓުތަކާއި ފޮޓޯތަކަކީ ސައްހަ ތަކެތި ކަމަށް ބުނެފަ އެވެ.
އެ މައްސަލައިގައި ދެން އަޑުއެހުމެއް އޮންނާނީ އަންނަ ބުދަ ދުވަހު އެވެ. އަދި ބުރަސްފަތި ދުވަހު ވެސް އެ މައްސަލައިގެ އަޑުއެހުމެއް މައްސަލަ ބައްލަވާ ގާޒި އަލީ ނަދިމް ވަނީ ތާވަލުކުރައްވާފަ އެވެ.
