ހުޅުމާލޭ ފޭސް ޓޫ ގައި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ން އިމާރާތްކުރަމުން އަންނަ ވިނަރެސް ފްލެޓު އިމާރަތްކުރުމުގެ މަސައްކަތް ޖުލައި މަހަށް އެއްކޮށް ނިމުނު ނަމަވެސް ވިއްކަން ފަށާނެ ތާރީހު ނޭނގޭ ކަމަށް އެ ކޯޕަރޭޝަނުން ބުނެފި އެވެ.
ވިނަރެސް މަޝްރޫއުގެ ދަށުން އެޗްޑީސީން ވަނީ ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއިސީ)އާ ހަވާލުކޮށްގެން "މިކްސްޑް ރެޒިޑެންޝަލް ކޮމްޕްލެކްސް" ކޮންސެޕްޓަށް 10 ޓަވަރު އިމާރާތްކޮށްފަ އެވެ. މި ޓަވަރުތަކުގައި ތިން ކޮޓަރީގެ 1،344 އެޕާޓްމަންޓާއި ތިރީ ފަންގިފިލާތަކުގައި ކޮމާޝަލް ޔުނިޓުތައް ހުންނާނެ އެވެ.
މި ފްލެޓުތަކުގެ މަސައްކަތް ކުރިޔަށްދާ ގޮތާ ގުޅިގެން އެޗްޑީސީގެ ޕީއާރު އޮފިސަރު އަލީ މަޝާރު ވިދާޅުވީ ކޮންޓްރެކްޓަރު އެންމެ ފަހުން ދީފައިވާ ތާވަލަށް ބަދަލެއް ނާންނަ ކަމަށެވެ. އެހެންކަމުން, އެންމެ ފަހުން ބުނެފައިވާ ގޮތަށް ޖޫން ނޫނީ ޖުލައި މަހަށް މި ޓަވަރުތަކުގެ މަސައްކަތް އެއްކޮށް ނިންމާލެވޭނެ އެވެ.
މިހާރު ގިނަ ޓަވަރުތަކުގެ އެކްސްޓީރިޔާ އާއި އިންޓީރިއާ ހުރިހާ މަސައްކަތެއް ހެން ނިމިފައިވާ އިރު ބައެއް ޓަވަރުތަކުގައި އޭސީ ހަރުކުރުމުގެ މަސައްކަތް ވެސް ނިމިއްޖެ އެވެ. މިތަނުގެ ފްލެޓުތައް ހަވާލުކުރަނީ ފިނިޝިން އެއްކޮށް ނިންމާފަ އެވެ.
އިމާރާތްތައް ނިމުނު ނަމަވެސް، މި ފްލެޓުތައް އާންމުކޮށް ވިއްކުމުގެ ކަންކަން އޮތީ މަޑުޖެހިފަ އެވެ. މިހާތަނަށް ވިނަރެސް ފްލެޓުތަކަށް އެދުމުގެ ފުރުސަތު ދިނީ ގުޅީފަޅުން ފްލެޓު ގަތް މީހުންނާއި ސީލައިފުން ފްލެޓު ގަތް މީހުންނާއި ހިޔާ ފްލެޓު ދޫކޮށްލި މީހުންނަށް އެކަންޏެވެ. އޭގެ ތެރެއިން 288 ފްލެޓު ގަންނަން ހުށަހަޅާފައިވާ ކަމަށް އެޗްޑީސިން ބުނެފައިވެ އެވެ.
އެންމެ ފަހުން މި ފްލެޓުތައް ވިއްކުން މަޑުޖައްސާލީ، މާލޭ މީހުންނަށާއި ދަފްތަރުގައި ހިމެނޭ މީހުންނަށް އެކަނި ވިނަރެސް ފްލެޓުތައް ވިއްކަން ހައުސިން މިނިސްޓްރީން ނިންމާފައިވާ ކަމަށް މީޑިއާތަކުން ރިޕޯޓުކޮށްފައިވާ ދަނޑިވަޅެއްގަ އެވެ.
އެކަމަކު ސީދާ ރައީސް އިބްރާހިމް މުހައްމަދު ސޯލިހުގެ އެންގެވުމަކަށް މި ނިންމުން ބަދަލުކޮށްފައިވާ ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާ ހަވާލާދީ ރާއްޖެ.އެމްވީ ގައި ލިޔެފައިވެ އެވެ.
އެޗްޑީސީން މައުލޫމާތު ދިން ގޮތުގައި މި ފްލެޓުތައް ވިއްކުމުގެ ކަންކަން މިހާރު ކުރިޔަށް ދަނީ ސީދާ ހައުސިން މިނިސްޓްރީގެ ބެލުމުގެ ދަށުންނެވެ. އެހެންކަމުން ފްލެޓު ވިއްކާނެ އުސޫލާއި އެކަން ފަށާނެ ތާރީހެއް އިނގޭނީ އެ މިނިސްޓްރީއަށް ކަމަށް މަޝާރު ވިދާޅުވި އެވެ.
މިކަމާ ގުޅިގެން ހައުސިން މިނިސްޓްރީގެ އޮފިޝަލުން ޖަވާބުނުދެއްވާތީ މިނިސްޓްރީގެ ބަހެއް ނުލިބެ އެވެ.
