އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބާއި ގުޅިގެން ބައެއް ފަރާތްތަކުން ޕާޓީގެ މެމްބަރުންނަށް ވަޒީފާގެ ބިރު ދައްކާ ކަމަށް ބުނެ ހުށަހެޅި މައްސަލަ އެ ޕާޓީގެ އިންތިހާބާ ގުޅޭ ޝަކުވާ ކޮމިޓީން ބަލަމުންދާ ކަމަށް އެ އިންތިހާބުގައި ވާދަކުރާ އިމްތިޔާޒް ފަހުމީގެ ކެމްޕޭން ޓީމުން ބުނެފި އެވެ.
ކެމްޕޭންގެ ތެރެއިން އާންމު މެމްބަރުންގެ ފަރާތުން ލިބުނު ޝަކުވާތައް ޝަކުވާ ކޮމިޓީއަށް ހުށަހަޅާފައިވާ ކަމަށާއި އަދި އޭގެ ތެރެއިން އެއް މައްސަލަ މިހާރު އެ ކޮމިޓީން ބަލަމުންދާ ކަމަށް އިންތި ކެމްޕޭނު ޓީމުގެ ތަރުޖަމާނު އަދި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވި އެވެ.
ވަހީދު ވަނީ އެޓިމުގެ ޝަކުވާ އާ ގުޅިގެން ކޮމިޓީން ދެއްވި ޖަވާބު މިއަދުގެ ބައްދަލުވުމުގައި ވިދާޅުވެފަ އެވެ.
"އިމްތިޔާޒް ފަހުމީއަށް ތާއިދުކުރައްވާ ބައެއް ފަރާތްތަކަށް ދައުލަތުގެ އެކި މުއައްސަސާތަކުގައި ތިބި އެކި ފަރާތްތަކުން އެ މީސްމީހުންގެ މަގާމުގެ ނާޖާއިޒު ނުފޫޒު ބޭނުންކޮށްގެން މުވައްޒަފުންނަށް ބިރު ދައްކަމުން ގެންދާކަމުގެ މައުލޫމާތު ތިޔަ ކެމްޕޭން ޓީމަށް ލިބިފައިވާ ކަމަށް ވިދާޅުވެ ލިޔުއްވާފައިވާ ސިޓީތަކުގަައިވާ މައްސަލަތައް ޗެއާޕާސަން އަންހެނުންގެ ރޫހު، އަދި ޒުވާނުންގެ ހިތްވަރުގެ އިންތިހާބަށް އެކުލަވާލާފައިވާ ޝަކުވާ ބަލާ ކޮމިޓީން ބަލަމުން ގެންދާ ވާހަކަ ދަންނަވަން،" ވަހީދު ޖަވާބު ސިޓީ ކިޔުއްވަމުން ވިދާޅުވި އެވެ.
އޭނާ ވިދާޅުވީ ވަޒީފާ އާއި ސަރުކާރުގެ ހިދުމަތްތަކާއި ރަށު ތަރައްގީފަދަ ކަންކަން، ވަކި މީހަކަށް ވޯޓު ނުދީފިނަމަ، ހުއްޓި ނުވަތަ ނިމުމަކަށް އައިސްދާނެ ކަމަށް ބުނެ ބިރު ދެއްކުމަކީ އެމްޑީޕީގެ އަސާސެއް ނޫން ކަމަށެވެ.
އެމްޑީޕީގައި އަމިއްލަ ކަންކަމާއި މަގާމު ހާސިލުކުރުމަށް ބަޔަކު ހީލަތްތެރި ގޮތުގައި މަސައްކަތްކުރާ ކަމަށް ވެސް އޭނާ ވިދާޅުވި އެވެ. އަދި، އެއީ ޕާޓީ ތެރޭގައި ބައިބައިވުން އުފައްދައި ވެރިކަމަށް އައުމުން އަމިއްލަ އެޖެންޑާ ޕްރޮމޯޓުކޮށް، އަމިއްލައަށް މަގާމު ހޯދަން މަސައްކަތްކުރާ ބައެއް ކަމަށް އޭނާ ވިދާޅުވި އެވެ.
"ވެރިކަމަށް އައިމާ ބައެއް ފަހަރު ހަމަ ބައެއް ބޭފުޅުން އެބަ ވަޑައިގަންނަވާ އެކި އެކި އަމިއްލަ އެޖެންޑާތަކުގައި. ދެން އެ އަމިއްލަ އެޖެންޑާ ކުރިއެރުވުމަށްޓަކައި އަޅުގަނޑުމެންގެ ޖުމްލަ ބޮޑު މަގްސަދުތަކަށް ބުރޫއަރާ ގޮތަށް އެބަ މަސައްކަތް ކުރައްވާ. މި ޕާޓީ ތެރޭގައި ހަމަ ކުރިން އެހެން ޕާޓީތަކުގައި އެބޭފުޅުން ހޯއްދެވި މަގާމު ނޫނީ ޖާގަ ހޯއްދަވަން ވެގެން އެކި ހީލަތްތެރި ގޮތްތައް ބޭނުންކުރުމުގެ ކަންކަން އެބަ ހިނގާ،" ވަހީދު ވިދާޅުވި އެވެ.
އެމްޑީޕީގެ ޗެއާޕާސަންކަމަށް ވާދަކުރައްވާ އަނެއް ކެންޑިޑޭޓް، އިކޮނޮމިކް މިނިސްޓަރު ފައްޔާޒް އިސްމާއިލާއި އޭނާގެ ކެމްޕޭން ޓީމަކީ ގޮތްނޭނގޭ ކަންތައްތަކެއް ކުރާ ބައެއް ކަމަށް ކުރައްވާ ތުހުމަތު ވަހީދު މިއަދު ވެސް ތަކުރާރުކުރެއްވި އެވެ. "ގޮތްނޭނގޭކަމަށް" މާނަކުރައްވަނީ ވަހީދު ވިދާޅުވި ގޮތުގައި ފައްޔާޒާއި ކެމްޕޭނު ޓީމްގެ އަމަލުތައް ހުންނަ ގޮތުންނެވެ.
މެމްބަރުންގެ ފަރާތުން ތަކުރާރުކޮށް އެކަހަލަ ކަންކަމުގެ ޝަކުވާ ލިބެމުންދާ ކަމަށާއި އިމްތިޔާޒްގެ ކެމްޕޭނުން ށ. އަތޮޅުގެ ހުރިހާ ރަށަކަށް މިދިޔަ ހަފްތާގައި ކުރި ދަތުރުގައި ވެސް އެކަންކަމުގެ ޝަކުވާ ލިބިފައިވާ ކަމަށް އޭނާ ވިދާޅުވި އެވެ.
"މިހާރު އަޅުގަނޑުމެން ނިސްބަތްވާ ސަރުކާރެއް، އަޅުގަނޑުމެންގެ 40 ޕަސަންޓު ހިއްސާވާ ސަރުކާރެއް އޮތްއިރުގައި، އަޅުގަނޑުމެންގެ ބައެއް އަމާޒުތައް، އަޅުގަނޑުމެންގެ ބައެއް ސިޔާސަތުތައް، އެންމެ އެއްވައްތަރުވެގެން ކަންކަން ނުހިނގާކަމުގެ ޝަކުވާ އެބަ ކުރޭ،" ވަހީދު ވިދާޅުވި އެވެ.
ލާމަރުކަޒު ކުރުމާއި ކައުންސިލްތަކަށް ވިޔަފާރި ކުރުމާއި އެކި އެކި ބާރު ދިނުމުގެ އެމްޑީޕީގެ ތަސައްވުރާއި ދެކޮޅަށް ކަންކަން ސަރުކާރުން ކުރާ ކަމުގެ ޝަކުވާ ލިބޭ ކަމަށް ވެސް ވަހީދު އިތުރަށް ވިދާޅުވި އެވެ.
"އަޅުގަނޑުމެންގެ ސަރުކާރެއްގައި ބައެއް ވަޒީރުން. އަޅުގަނޑުމެން އެ ތަސައްވަރުކުރި. އެ ވައުދުވި ގޮތް ނޫން ގޮތްގޮތަށް ބާރުތައް ހިފަހައްޓަން، އޮބަހައްޓަން، މަރުކަޒު ކުރަން އުޅޭ އުޅުން،" ވަހީދު ވިދާޅުވި އެވެ.
އިމްތިޔާޒުގެ ކެމްޕޭން ކުރިއަށް ދާ ގޮތުގެ ތަފްސީލް ދެއްވަމުން ވަހީދު ވިދާޅުވީ އިމްތިޔާޒުގެ ކެމްޕޭން ޓީމުން މިހާރު ޕާޓީ ދަފްތަރުގެ 60 އިންސައްތަ މީހުން އުޅޭ ރަށްރަށަށް ދަތުރުކޮށްފައިވާ ކަމަށެވެ. އެގޮތުން، ޖުމްލަ 97 ރަށަކަށް ދެވިފައިވާއިރު، މާދަމާ އިމްތިޔާޒްއާއި އޭނާގެ ޓީމުން އަނެއްކާ ވެސް ފުވައްމުލަކަށް ދަތުރުކުރާނެ ކަމަށް ވަހީދު ވިދާޅުވި އެވެ. އަދި ބުދަ ދުވަހު ތ. އަތޮޅާއި ލ. އަތޮޅުގެ 24 ރަށެއްގައި ކެމްޕޭން ހަރަކާތް ހިންގަން ފުރާނެ ކަމަށް އޭނާ ވިދާޅުވި އެވެ.
ވަހީދު ވިދާޅުވި އިމްތިޔާޒު އާއި އޭނާގެ ކެމްޕޭން ޓީމުން މޭ 14 ގައި އޮތް އިންތިހާބުގެ ކުރިން ޕާޓީގެ ހުރިހާ މެމްބަރުންނާ ވެސް ބައްދަލުކުރަން މަސައްކަތް ކުރާނެ ކަމަށެވެ. އަދި، މިހާރު ވެސް އިންތިހާބު ކާމިޔާބު ކުރެވޭނެ ކަމުގެ ޔަގީންކަން އެބަ އޮތް ކަމަށް ވަހީދު ވިދާޅުވި އެވެ.
