އެމެރިކާގެ ރައީސް ޖޯ ބައިޑެންއަކީ "ބަލިކަށި މުސްކުޅިއެއް"ގެ ގޮތުގައި އުތުރު ކޮރެއާއިން ސިފަކޮށްފި އެވެ.
އެފަދަ ގޮތަކަށް އުތުރު ކޮރެއާއިން ބައިޑެންއަށް ބަހުގެ ހަމަލާތައް ރައްދު ކުރީ ޔޫކްރެއިންގައި ރަޝިއާއިން ކުރާ ހަނގުރާމައާ ގުޅޭ ގޮތުން ބައިޑެން ދެއްކެވި ވާހަކަތާ ގުޅިގެންނެވެ.
ބައިޑެން ވިދާޅުވީ ރަޝިއާގެ ރައީސް ލެޑިމިއަ ޕުޓިން އަކީ "ހަނގުރާމައިގެ މުޖުރިމެއް" ކަމަށާއި ޕުޓިންއާ ދެކޮޅަށް ޝަރީއަތް ހިންގަން ޖެހޭނެ ކަމަށެވެ.
"އެންމެ ފަހުގެ ހަބަރަކީ އެއްވެސް ހެއްކެއް ނެތި އެމެރިކާގެ ވެރިޔާ ރަޝިއާގެ ރައީސްގެ އަބުރަށް އަރައިގަތް ހަބަރު،" އުތުރު ކޮރެއާގެ ކޭސީއެންއޭ ނިއުސް އެޖެންސީގައި ޝާއިއުކުރި ކޮމެންޓަރީ ލިޔުމެއްގައިވެ އެވެ.
އެ ލިޔުމުގައި ބުނީ އެމެރިކާގެ ވެރިޔަކަށް ހުންނެވީ "ތަކުރާރުކޮށް އޮޅިގެން ނުރަނގަޅު ވާހަކަ ދެއްކޭ" ބޭފުޅެއް ކަމަށެވެ. ނަމަވެސް ލިޔުމުގައި ސީދާ ބައިޑެންގެ ނަން ފާހަގަކޮށްފައެއް ނުވެ އެވެ.
"އޭގެ ސަބަބެއް ކަމަށް ބެލެވެނީ ވިސްނުމުގެ ބާރު ދަށްވެފައިވާ ބަލިކަށި މުސްކުޅިއަކަށް ވާތީ. އެފަދަ ބަލިކަށި މީހަކު ބާރުގައި ހުންނަވާ ނަމަ، އެމެރިކާގެ ކުރިމަގު ވަރަށް އަނދިރި ކަމަށް ބެލެވޭ."
ބައިނަލްއަގްވާމީ މުޖުތަމައުގައި ޗައިނާގެ އިތުރުން އުތުރު ކޮރެއާއާ އެންމެ ގާތް ގުޅުމެއް ބާއްވާ އެއް ގައުމަކީ ރަޝިއާ އެވެ. އުތުރު ކޮރެއާއާ ދެކޮޅަށް އަޅާފައިވާ ފިޔަވަޅުތަކަށް ލުއި ލިބޭތޯ ރަޝިއާއިން މަސައްކަތްކޮށްފައިވެ އެވެ.
ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައިގައި އުތުރު ކޮރެއާއިން ވެސް ރަޝިއާއަށް ތާއީދުކުރެ އެވެ. އަދި ހަނގުރާމައަށް މަގުފަހިވީ އެމެރިކާގެ ސަބަބުން ކަމަށް ބުންޏެވެ.
މީގެ ކުރިން ވެސް އުތުރު ކޮރެއާގެ ދައުލަތުގެ މީޑިއާއިން އެހެން ގައުމުތަކުގެ ވެރިންނަށް އަމާޒުކޮށް، ވަރުގަދަ ޒާތީ ބަހުގެ ހަމަލާތައް ރައްދުކޮށްފައިވެ އެވެ.
މީގެ ކުރިން ކޭސީއެންއޭއިން ވަނީ ބައިޑެންއަކީ "ވަގު ކުއްތާއެއް" ކަމަށާއި އެފަދަ ޖަނަވާރެއްގެ ގައިގައި "ދަނޑިއަކުން ތަޅައި މަރާލަން ޖެހޭނެ" ކަމަށް ވެސް ބުނެފަ އެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕަކީ "ބުއްދި ގޯސްވެފައިވާ އެމެރިކާގެ މުސްކުޅިއެއް" ކަމަށާއި އޭގެ ކުރިން ރައީސްކަން ކުރެއްވި ބަރަކް އޮބާމާއަކީ "ރާމާ މަކުނެއް" އަދި ޖޯޖް ޑަބްލިއު ބުޝް އަކީ "ބުއްދި ރޯނުފިލާ" މީހެއްގެ ގޮތުގައި ވެސް ސިފަކުރި އެވެ.
އޭގެ އިތުރުން ދެކުނު ކޮރެއާގެ ކުރީގެ ރައީސް ޕާކް ގުން ހައި އަކީ ސިހުރު ހަދާ މީހެއް ކަމަށް ވެސް ސިފަކުރި އެވެ.
