ޕެރިސް (އޭޕްރީލް 9) - ފްރެންޗް ލީގުގައި މިރޭ ކްލާމެންޓް ފޫޓް އަތުން 6-1 އިން ޕީއެސްޖީ މޮޅުވި މެޗުގައި އެ ޓީމުގެ ތިން ތަރިން ކަމަށްވާ ކީލިއަން އެމްބާޕޭ އާއި ނޭމާ އަދި ލިއޮނަލް މެސީ ވެސް ތަފާތު ދައްކައިފި އެވެ.
އެމްބާޕޭ އާއި ނޭމާ ހެޓްރިކް ހެދިއިރު، މެސީ ވަނީ ގޯލު ޖަހަން ފުރުސަތު ތަނަވަސްކޮށްދީގެން، އެސިސްޓް ހެޓްރިކެއް ހަދައިފަ އެވެ. މީގެ ހަފްތާއެއްހާ ދުވަސް ކުރިން ޕީއެސްޖީން 5-1 އިން ލޮރިއެންޓް ބަލިކުރި މެޗުގައި ނޭމާ، އެމްބާޕޭ އަދި މެސީ ވަނީ ފުރަތަމަ ފަހަރަށް އެއް މެޗެއްގައި ޕީއެސްޖީ އަށް ގޯލު ޖަހައިދީފަ އެވެ. މިރޭ، ކްލާމެންޓް ފޫޓް ކޮޅަށް މެސީގެ ގޯލެއް ނުފެނު ކަމުގައި ވިޔަސް ޖުމްލަކޮށް ތިން ކުޅުންތެރިންގެ ކޮމްބިނޭޝަނުގެ ތަފާތު ފެނުނެވެ.
މެޗު ފަށައިގެން ހަ ވަނަ މިނިޓްގައި މެސީ ދިން ބޯޅައަކުން ގޯލު ހުޅުވައިދިނީ ނޭމާ އެވެ. އަދި މެޗުގެ 19 ވަނަ މިނިޓްގައި މެސީ ހުސްކޮށްލާފައި ދިން ބޯޅައަކުން އެމްބާޕޭ ޕީއެސްޖީގެ ލީޑުފުޅާކޮށްދިނެވެ. ލީގުގެ 17 ވަނައިގައި އޮތް ކްލާމެންޓް ފޫޓުން ކުޅުން ރަނގަޅުކޮށް ފުރަތަމަ ހާފު ނިމުމުގެ ކުރިން ލަނޑެއް ޖަހައި އުންމީދެއް ހޯދި އެވެ. އެ ޓީމުގެ ގޯލު ޖެހީ ޖޯޑެލް ޑޮސޯއު އެވެ.
ލަނޑެއް ޖަހައި، ކްލާމެންޓުން ކޮންމެ ވެސް ވަރެއްގެ އުންމީދެއް ހޯދި ނަމަވެސް އެ ޓީމަށް ދެ ވަނަ ހާފްގައި މާ ބޮޑު ތަފާތެއް ނުދެއްކުނެވެ. ޕީއެސްޖީގެ ތަރިން ތިބީ ތަފާތު ފޯމެއްގަ އެވެ. ޕީއެސްޖީން ފަހު ހަތަރު ގޯލު ޖެހީ މެޗުގެ ފަހު 20 މިނިޓް ތެރޭގަ އެވެ.
އެ ގޮތުން މެޗުގެ 71 ވަނަ މިނިޓްގައި ޕެނަލްޓީ އަކުން ނޭމާ ވަނީ ޕީއެސްޖީގެ ތިން ވަނަ ގޯލު ޖަހައިފަ އެވެ. އޭގެ ތިން މިނިޓް ފަހުން ނޭމާ ދިން ބޯޅައަކުން އެމްބާޕޭ ވަނީ ޕީއެސްޖީގެ ހަތަރު ވަނަ ގޯލު ޖަހައި، މެޗުގެ ތިން ޕޮއިންޓް ޔަގީންކޮށްދީފަ އެވެ. އެކަމަކު، އެ ހިސާބުން ވެސް މަޑުނުޖެހި ޕީއެސްޖީން އެޓޭކްތައް ގިނަކުރި އެެވެ. ނަތީޖާ އަކީ ނޭމާ އާއި އެމްބާޕޭ އިތުރު ދެ ގޯލު ޖަހައި، ދެ ކުޅުންތެރިންގެ ހެޓްރިކް ފުރިހަމަކުރުމެވެ، އެމްބާޕޭ ޖެހި ގޯލަށް މެސީ ބޯޅަ ދިންއިރު، ނޭމާ ޖެހި ގޯލަށް ފުރުސަތު ތަނަވަސްކޮށްދިނީ އެމްބާޕޭ އެވެ.
މީޑިއާ ރިިޕޯޓްތައް ބުނާގޮތުން ޕީއެސްޖީގައި މަޑުކުރަން އެމްބާޕޭ ނިންމައިފިނަމަ އޭނާ އަށް ބޯނަހެއްގެ ގޮތުގައި 150 މިލިއަން ޕައުންޑް (195 މިލިއަން ޑޮލަރު) ދޭން ޕީއެސްޖީން ނިންމާފައިވަނިކޮށް މިރޭ ވެސް އޭނާ މި ވަނީ ތަފާތު ދައްކައިފަ އެވެ. މިރޭގެ މެޗަށް ފަހު އެމްބާޕޭ ވަނީ ސީޒަނުގައި މިހާތަނަށް ކުޅުނު 39 މެޗުގެ ތެރެއިން 31 ގޯލު ޖަހައި، 21 ގޯލު ޖަހަން ފުރުސަތު ތަނަވަސްކޮށްދީފަ އެވެ.
ބާކީ ހަތް މެޗަށް ދާއިރު ޕީއެސްޖީ އެއް ވަނައިގައި އޮތީ ބޮޑު ލީޑަކާ އެކު އެވެ. އެ ޓީމަށް 31 މެޗުން 71 ޕޮއިންޓް ލިބިފައިވާއިރު، ދެ ވަނައިގައި އޮތީ މިރޭ ރެއިމްސް ބަލިކުރި ރެނެސް އެވެ. ރެނެސް އަށް 31 މެޗުން 56 ޕޮއިންޓް ލިބިފައިވާއިރު، ތިން ވަނައިގައި އޮތް މާސޭ އަށް ވަނީ 30 މެޗުން 56 ޕޮއިންޓް ލިބިފަ އެވެ. މާދަމާރޭ މާސޭ އިން މޮންޓެޕިއޭ އަތުން މޮޅުވެގެން ދެ ވަނަ އަށް އެރޭނެ އެވެ.
