މަސްވެރިކަން އިންތިހާއަށް ރަނގަޅުވެ މިފްކޯގެ ކެޕޭސިޓީއަށް ވުރެ އިތުރަށް މަސް ބާނަމުން ދާތީ، ބާނަމުންދާ މަސް ގަނެވޭނެ ގޮތެއް ހޯދުމުގެ މަސައްކަތުގައި ބޭރުގެ ބޯޓެއް ގެންނަން ހަމަޖެހިފައިވާ ކަމަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަން ވިދާޅުވެއްޖެ އެވެ.
މިދިޔަ ހަފުތާގެ އާދީއްތަ ދުވަހުން ފެށިގެން އާދައިގެ ކޮންމެ ދޯންޏަކުން އެވެރެޖުކޮށް 12 ޓަނު އަދި ބޮޑު ދޯނިފަހަރުތަކުން 25 ޓަނަށް ވުރެ ގިނައިން މަސް ބާނައިގެން ކިރަމުން ދިޔަ އެވެ. ކެޕޭސިޓީއަށް ނުތަކައިގެން އެންމެ ފަހުން މަސް ގަންނަ ވަރު ލިމިޓުކޮށް ކޮންމެ ދޯންޏަކުން ގަންނަމުން ދިޔައީ ފަސް ޓަނު މަހެވެ.
މަސްވެރިންގެ ކަންބޮޑުވުންތައް އިތުރުވެފައިވަނިކޮށް ފިޝަރީޒް މިނިސްޓަރު ވިދާޅުވީ މަސްވެރިން ކިރަން ގެންނަ މަހުގެ މިންވަރު މަސް ގަނެ ފިނިކުރެވޭނެ ކެޕޭސިޓީއަށް ވުރެ ބޮޑު ތަނުން އިތުރުވެ، މަސް ގަންނަ ވަރު ލިމިޓު ކުރަން ޖެހުނީ ކަމަށެވެ. އެހެން އެ ގޮތަށް އޮތަސް، މާންދުއާއި، ކޫއްޑޫއާއި، ހުޅުމީދޫއަށް އަންނަ ދޯނިފަހަރުން މަސް ގަނެ ހުސް ކުރަމުންދާ ކަމަށް ވިދާޅުވި އެވެ.
މި މައްސަލަ ވަގުތީ ގޮތުން ހައްލު ކުރުމަށް ޓަކައި މަސް ގަނެ ފުރީޒް ކުރާ ބޮޑު އުޅަނދެއް ޅ. ފެލިވަރުން ގއ. ކޫއްޑޫއަށް ގެނެސްފައިވާ ކަމަށް މިނިސްޓަރު ވިދާޅުވި އެވެ. އަދި މާންދޫގައި މަސް ގަންނަ ބާޖެއް ވެސް ބޭނުން ކުރަމުންދާ ކަމަށް އޭނާ ވިދާޅުވި އެވެ. މަސް ގަތުމަށް ވަގުތީ ގޮތުން ބޭރުގެ ބޯޓެއް ހޯދަން މިފްކޯއިން މަސައްކަތް ކުރަމުންދާ ކަމަށް ވެސް ވިދާޅުވި އެވެ.
"މަސްވެރިން ބާނާގެން ގެންނަ ހުރިހާމަހެއް އެއްބުރުން ނުގަނެވޭ މައްސަލަ ދާއިމީކޮށް ހައްލު ކުރެވޭނީ މަސްފުރީޒުކުރާ ކެޕޭސިޓީ ދެކުނުގައި މިހާރު ހުރިވަރަށްވުރެ އިތުރަށް ގާއިމުކޮށްގެނެވެ. މަސްގަތުމަށް ވަގުތީގޮތުން ބޭރުގެ ބޯޓެއް ހޯދުމަށްވެސް މިފްކޯ އިން ދަނީ މަސައްކަތް ކުރަމުންނެވެ." މިނިސްޓަރު ފޭސްބުކްގައި ކުރެއްވި ޕޯސްޓެއްގައި ލިޔުއްވާފައިވެ އެވެ.
މިފްކޯއަށް މަސް ގަންނަ މިންވަރު އިތުރުކުރުމަށާއި، ފިނިކޮށްފައި މަސް ބެހެއްޓޭ ޖާގަ އިތުރުކުރުމަށް މަޝްރޫއުތަކެއް ވެސް ވަނީ ފަށައިފަ އެވެ.
ކޫއްޑޫ ބަނދަރުގެ ޖާގަ ކުޑަވުމުން ދިމާވާ މައްސަލަ ހައްލު ކުރަން ވެގެން ފަޅުގެ ޖާގަ ބޮޑުކޮށް، ކޯލްޑް ސްޓޯރޭޖް ކެޕޭސިޓީ އިތުރު ކުރަން ވަނީ ނިންމައިފަ އެވެ. މި މަޝްރޫއުގެ ދަށުން ކޫއްޑޫގެ ކޯލްޑް ސްޓޯރަށް އިތުރުކުރެވޭ 4،000 ޓަނާއެކު ޖުމްލަ 6،000 ޓަނަށް ޖާގަ އިތުރު ކުރަން އޮތީ ހަމަޖެހިފަ އެވެ.
ފެލިވަރުގައި މުޅިން އަލަށް 4،000 ޓަނުގެ ކޯލްޑް ސްޓޯރޭޖަކާއި 200 ޓަނުގެ ބްރައިން ފްރީންޒިން އަދި 80 ޓަނުގެ އާރުއެސްޑަބްލިޔޫ ސިސްޓަމެއް ގާއިމްކުރުމާއި، 3،500 ޓަނުގެ ކާގޯ ވެސަލް ކައިރި ކުރެވޭ ފެންވަރަށް ތަރައްގީ ކުރުމާއި، މަސްކިރާނެ ޖެޓީއަކާއި ފެލިވަރުގެ ބޭނުންތަކަށް އިތުރު ޖެޓީއެއް ތަރައްގީ ކުރުމުގެ އަމަލީ މަސައްކަތް ވަނީ ފެށިފައެވެ. އަދި 100 ޓަނުގެ ޕްރޮސެސިސް ކޭނެރީއެ އެއް ވެސް ގާއިމް ކުރެ އެވެ.
ނިމިގެންދިޔަ 2021 ވަނަ އަހަރަކީ މިފްކޯއިން އެންމެ ގިނައިން މަސް ގަތް އަހަރެވެ. އެގޮތުން މިދިޔަ އަހަރު މަސްވެރިންގެ އަތުން 58،350 ޓަނުގެ މަސް މަސް މިފްކޯއަށް ގަތެވެ. 2020 ވަނަ އަހަރު 49،000 ޓަނުގެ މަސް ގަނެފައިވާއިރު، އޭގެ ކުރީ އަހަރު ގަނެފައިވަނީ 48،000 ޓަނުގެ މަހެވެ.
