އިޒްރޭލުގެ ތެލް އަވީވްގައި ދިން ހަމަލާއެއްގައި ތިން މީހުން މަރުވުމާ އެކު ސަލާމަތީ ބާރުތަކަށް "ފުރިހަމަ މިނިވަންކަން" ދީފައިވާ ކަމަށް ބޮޑު ވަޒީރު ނަފްތާލީ ބެނެޓް ވިދާޅުވެއްޖެ އެވެ.
ފަލަސްތީނު މީހަކު ތެލް އަވީވްގެ އެންމެ ކާރޫބާރޫ ބޮޑު މަގުގައި ބުރާސްފަތި ދުވަހުގެ ރޭ ބަޑި ޖެހުމުން ދެ މީހުން މަރުވި އެވެ. އަނިޔާވި ތިން ވަނަ މީހަކު މަރުވީ ހުކުރު ދުވަހު އެވެ.
ހަމަލާ ދިނުމަށް ފަހު ސަލާމަތީ ފައުޖުތަކަށް ފިލައިގެން ގިނަ ގަޑިއިރުތަކެއް ހޭދަކުރި ފަލަސްތީނުގެ މީހާގެ ގަޔަށް ބަޑި ޖަހައި މަރާލީ ތެލް އަވީވް ކައިރީގައި އޮންނަ ޖައްފާގަ އެވެ.
ފަހަކަށް އައިސް އިޒްރޭލުގައި ގިނަ އަދަދެއްގެ ހަމަލާތަކެއް އަންނަނީ ދެމުންނެވެ. އެ ހަމަލާތަކުގައި މަރުވި މީހުންގެ ޖުމްލަ އަދަދު ވަނީ 14 އަށް އަރާފަ އެވެ.
ހުކުރު ދުވަހުގެ ހެނދުނު ބެނެޓް ވިދާޅުވީ ސަލާމަތީ ފައުޖުތަކަށް އިތުރު ބާރު ދީފައިވާ ކަމަށާއި ކޮންމެ ގޮތަކުން ވިޔަސް "ޓެރަރިޒަމް" ބަލިކުރާނެ ކަމަށެވެ.
އިޒްރޭލުގެ ޖާސޫސީ އިދާރާއިން ބުނީ ހަމަލާދިން މީހާ އިޒްރޭލަށް އެތެރެވީ ގާނޫނާ ހިލާފަށް ކަމަށާއި އޭނާ އާއި އެއްވެސް ހަނގުރާމަވެރި ޖަމާއަތަކާ ގުޅުމެއް އޮތް ކަމަށް އެނގިފައި ނުވާ ކަމަށެވެ.
ފަލަސްތީނުގެ ރައީސް މަހްމޫދް އައްބާސް ހަމަލާ ކުށްވެރި ކުރައްވައި ވިދާޅުވީ އިޒްރޭލާއި ފަލަސްތީނުގެ އާއްމު ރައްޔިތުން މެރުމަކީ "ހާލަތު އިތުރަށް ގޯސްވާން މެދުވެރިވާނެ ސަބަބެއް" ކަމަށެވެ. ނަމަވެސް ގާޒާ ކޮންޓްރޯލް ކުރާ ހަމާސް ޖަމާއަތުން ވަނީ ހަމަލާއަށް މަރުހަބާ ކިޔައިފަ އެވެ.
އިޒްރޭލުގައި މިހާރު ދެމުންދާ ހަމަލާތަކަކީ 2006 ވަނަ އަހަރަށް ފަހު މިގޮތަށް ދެމުންދާ އެންމެ ނުރައްކާތެރި ހަމަލާތަކެވެ. ރޯދަ މަސް ފަށާފައިވާ އިރު، ޔަހޫދީންނާއި ނަސާރާއިން ފާހަގަކުރާ މުހިއްމު ދުވަސްތަކެއް ކައިރިވެފައި ވާތީ، މި ހަމަލާތަކުގެ ސަބަބުން އިޒްރޭލާއި ފަލަސްތީނުގެ މަޝްރަހު އިތުރަށް ގޯސްވުމުގެ ފުރުސަތު ވަރަށް ބޮޑު ކަމަށް އެނެލިސްޓުން ދެކެ އެވެ.
މިދިޔަ އަހަރުގެ ރޯދަ މަހު އިޒްރޭލާއި ގާޒާގައި ވެރިކަން ކުރާ ހަމާސްއާ ދެމެދު 11 ދުވަހުގެ ހަނގުރާމައެއް ކުރީ އަލް އަގްސާ މިސްކިތުގައި އަޅުކަން ކުރަން ހުރަސްތަކެއް ކުރިމަތިވި ފަހުންނެވެ.
