ނަން ފަންޖިބަލް ޓޯކެން ނުވަތަ އެންއެފްޓީގެ ވާހަކައަކީ މިވަގުތު ދުނިޔޭގައި އެންމެ ބާރަށް ދެކެވެމުން އަންނަ އެއް ވާހަކަ އެވެ. ކޮންމެ ދުވަހަކު އެތައް މިލިއަން ޑޮލަރެއް އެންއެފްޓީގެ ބާޒާރުގައި އަންނަނީ ދައުރު ކުރަމުންނެވެ. މީހުންގެ ސެލްފީ އާއި ޓްވީޓުތައް ވެސް އެންއެފްޓީގެ ގޮތުގައި އަންނަނީ ގަނެ ވިއްކަމުންނެވެ. އެންއެފްޓީ މާކެޓަކީ މިވަގުތު އެންމެ ޑިމާންޑު ބޮޑު އެއް މާކެޓޭ ބުނުމަކީ ވެސް ދޮގަކަށް ނުވާނެ އެވެ.
މިހާ ހިސާބުން އުފެދޭ ސުވާލުތަކެއް އެބަ ހުއްޓެވެ. އެންއެފްޓީއަކީ ކޯއްޗެއް ހެއްޔެވެ. އެހާ ބޮޑު ޑިމާންޑެއް އެންއެފްޓީއަށް އޮތީ ކީއްވެ ހެއްޔެވެ. އެތައް މިލިއަން ޑޮލަރެއް އެންއެފްޓީ ގަތުމަށް މީހުން ހަރަދުކުރަނީ ކީއްވެ ހެއްޔެވެ. އެންއެފްޓީ މާކެޓުގައި ފޮރުވިފައިވަނީ ކޮން ސިއްރުތަކެއް ހެއްޔެވެ. އެންއެފްޓީއެއް ގަންނާނީ ކިހިނެއް ހެއްޔެވެ. އެ ސުވާލުތަކަށް ޖަވާބު ދެވޭތޯ މަސައްކަތް ކޮށްލާނަމެވެ.
އެންއެފްޓީއަކީ ކޯއްޗެއް؟
ކުރުކޮށް ބުނާނަމަ އެންއެފްޓީއަކީ އަސްލު މުދަލެއް ރަމްޒުކޮށްދޭ ޑިޖިޓަލް މުދަލެކެވެ. އެއީ ކުރެހުމަކަށް ވެސް ވެދާނެ އެވެ. ލަވައެއް ނުވަތަ ވީޑިއޯއަކަށް ވެސް ވެދާނެ އެވެ. ގޭމްތަކުގައި ގަންނަން ހުންނަ އައިޓަމަކަށް ވެސް ވެދާނެ އެވެ. ޓްވީޓަކަށް ވެސް ވެދާނެ އެވެ. ކޮންމެ އެއްޗައް ވެސް އެންްއެފްޓީއެއްގެ ގޮތުގައި ވިއްކާލެވިދާނެ އެވެ.
އާންމު ގޮތެއްގައި އެންއެފްޓީ ގަނެ ވިއްކުމަށް ބޭނުންކުރަނީ ޑިޖިޓަލް ކަރަންސީ ނުވަތަ ކްރިޕްޓޯ ކަރަންސީ އެވެ. އާންމު ގޮތެއްގައި ގިނަ ކްރިޕްޓޯތަކުގައި ބޭނުންކުރާ އެންކޯޑިން ސޮފްޓްވެއާތައް އެންއެފްޓީ ގަނެ ވިއްކުމުގައި ވެސް ބޭނުންކުރެ އެވެ.
މީގެ އަށް އަހަރު ކުރިން ފެށިގެން ވެސް އެންއެފްޓީ މާކެޓަކީ ވުޖޫދުގައި އޮތް މާކެޓެކެވެ. ނަމަވެސް، މަޝްހޫރު ވާން ފެށީ 2017 އިން ފެށިގެންނެވެ. މެއިން ސްޓްރީމް މީޑިއާއަށް މަޝްހޫރުވީ އެއަށްވުރެ ވެސް ފަހުންނޭ ބުނެވިދާނެ އެވެ. އަންދާޒާތައް ދައްކާގޮތުން ނޮވެމްބަރު 2017 އިން ފެށިގެން މިހާތަނަށް އެންއެފްޓީ ގަތުމަށް 174 މިލިއަން ޑޮލަރު އެކި މީހުން ހަރަދުކޮށްފައިވެ އެވެ.
އެންއެފްޓީ ހާއްސަ ވަނީ ކީއްވެ؟
ޑިމާންޑު އޮންނަ އެއްޗެއްގެ ސަޕްލައި ކަނޑާލުމުން އޭގެ އަގު އިންތިހާއަށް އުފުލޭނެ އެވެ. މިއީ އެންއެފްޓީ މާކެޓުގެ އެންމެ މުހިންމު އެއް އަސާސެވެ. ކޮންމެ އެންއެފްޓީއަކީ އެހެން އެންއެފްޓީތަކާ ތަފާތު އެއްޗެކެވެ. ތިޔަ ކިޔުންތެރިޔާ ގަންނަ އެންއެފްޓީއެއް އެހެން މީހަކަށް ނުގަނެވޭނެ އެވެ. އެ ބޭނުންނަމަ އެ މީހަކު ވެސް ޖެހޭނީ ތިޔަ ކިޔުންތެރިޔާ އަތުން އެ ގަންނާށެވެ.
އެންއެފްޓީ މާކެޓުގައި ވިއްކަން ހުންނަ ތަކެއްޗަކީ ލިމިޓެޑު އެޑިޝަން ނުވަތަ އެ ވައްތަރުގެ އެހެން އެއްވެސް އެއްޗެއް މާކެޓުން ނުލިބޭނެ އެއްޗެއްސެވެ. ކޮންމެ އެންއެފްޓީއެއްގައި ވެސް އޭތި ވަކިކުރުމަށް ހާއްސަ އައިޑެންޓިފިކޭޝަން ކޯޑުތަކެއް ހުންނާނެ އެވެ. އެންއެފްޓީއިން އުފައްދަނީ "ޑިޖިޓަލް ސްކާސިޓީ" އެއް ކަމަށް މާހިރުން ބުނެ އެވެ.
އެހެން ޑިޖިޓަލް އުފެއްދުންތަކަކީ ކިތަންމެ ޑިމާންޑު ބޮޑުވިޔަސް ސަޕްލައި އަށް އަސަރު ކުރާ އެއްޗެއްސެއް ނޫނެވެ. ބޭނުން މިންވަރަކަށް ގަންނަން ލިބެ އެވެ. އެންއެފްޓީ ހާއްސަ ވަނީ މި ހިސާބުންނެވެ. އަގު ބޮޑުވަނީ ވެސް މިހެންވެ އެވެ.
މައިކު ވިންކަލްމަންގެ "އެވްރީޑޭސް: ދަ ފަސްޓް 5000 ޑޭސް" އަކީ 5،000 ކުރެހުމުގެ މައްޗަށް ބިނާކޮށް އުފެއްދި އެންއެފްޓީއެކެވެ. ކްރިސްޓީސްގައި އޮތް ނީލަމެއްގައި އޭތި ވިކުނީ 69.3 މިލިއަން ޑޮލަރަށެވެ. އެއީ ދުނިޔޭގެ ރެކޯޑެކެވެ. މި ހުރިހާ ކުރެހުމެއް ނުވަތަ ވަކިވަކި ކުރެހުންތައް ވެސް އޮންލައިންކޮށް ކޮންމެ މީހަކަށް ވެސް ބަލާލެވޭނެ އެވެ.
އޮންލައިންކޮށް ލިބެން ހުރި ކުރެހުންތަކަކަށް އެތައް މިލިއަން ޑޮލަރެއް ހުށަހެޅީ ކީއްވެގެންތޯ މިހާ ހިސާބުން ސުވާލު އުފެދެ އެވެ. ޖަވާބަކީ އެންއެފްޓީއެއްގެ ގޮތުގައި އެ ކުރެހުންތައް ގަތުމުން މިހާރު އެއީ މައިކް ވިންކަލްމަންގެ އަމިއްލަ ކުރެހުންތަކެއް ނޫނެވެ. އެއީ، އެންއެފްޓީއެއްގެ ގޮތުގައި އެ ކުރެހުންތައް ގަތް މީހާގެ އަމިއްލަ އެއްޗެކެވެ. މިއީ އެންއެފްޓީއަށް މިލިއަނުން އަގު ހުށަހަޅާ އަނެއް ސަބަބެވެ.
އެންއެފްޓީ މަސައްކަތް ކުރަނީ ކިހިނެއް؟
އެންއެފްޓީއާ ބެހޭ ހުރިހާ މައުލޫމާތެއް ރައްކާކުރެވިފައި ވަނީ ބްލޮކްޗެއިނެއްގަ އެވެ. މާނައަކީ އެންއެފްޓީ ބާޒާރުގައި ހިނގާ ހުރިހާ މުއާމަލާތެއް ރެކޯޑު ކުރެވި އާންމުކޮށް ފެންނާން ހުންނާނެ ކަމެވެ. އޭގައި ހުންނަ މައުލޫމާތު ބަދަލުކޮށް، ހެކުކޮށް ނުވަތަ ސިސްޓަމަށް މަކަރު ހެދުމުގެ އެއްވެސް ފުރުސަތެއް ނޯންނާނެ އެވެ.
އާންމުކޮށް، އެންއެފްޓީގެ މުއާމަލާތްތައް ކުރަނީ ކްރިޕްޓޯކަރަންސީއެއް ކަމަށްވާ އެތީރިއަމް އިންނެވެ. ނަމަވެސް، އެހެން ކްރިޕްޓޯތައް ވެސް އެންއެފްޓީ ގަނެ ވިއްކުމަށް ބޭނުން ކުރެވެ އެވެ. އެންއެފްޓީއެއް ވިއްކާލާއިރު ފަހުން އޭގެ އެއްވެސް މުއާމަލާތެއް ކޮށްފިނަމަ ރޯޔަލިޓީގެ ގޮތުގައި ފީއެއް ލިބޭ ގޮތަށް ވެސް ހެދޭނެ އެވެ.
މިއީ ފަންނުވެރިންނަށް އެމީހުން އުފައްދާ އުފެއްދުންތަކުން ރަނގަޅު އާމްދަނީއެއް ހޯދުމަށް އޮތް މަގެކެވެ. މިހާރު ކުރެހުމެއް ވިއްކަން ބޭނުންނަމަ ވެސް މުޅި ދުނިޔެއަށް ހުޅުވާލައިގެން ނީލަން ކުރެވިދާނެ އެވެ. އޮކްޝަން ހައުސް ނުވަތަ އާޓް ގެލަރީއެއް މެދުވެރިކޮށް އެކަން ކުރަން ނުޖެހޭނެ އެވެ.
އެންއެފްޓީއަކަށް އެއްޗެއް ބަދަލުކުރާނަމަ ޑިޖިޓަލް ކުރަން ޖެހޭނެ އެވެ. ޓްވިޓާގެ ކޯފައުންޑަރު ޖެކް ޑޯސީ އޭނާގެ ފުރަތަމަ ޓްވީޓު އެންއެފްޓީއަކަށް ބަދަލުކުރުމަށް ފަހު ވިއްކާލީ 2.9 މިލިއަން ޑޮލަރަށެވެ.
އެންއެފްޓީއެއް ގަންނާނީ ކިހިނެއް؟
އެންއެފްޓީއެއް ގަންނަނަމަ ބައެއް ކަންކަމަށް ވެސް ސަމާލުވާން ޖެހޭނެ އެވެ. ރަނގަޅަށް މާކެޓު ރިސާޗު ކުރަން ޖެހޭނެ އެވެ. ބައެއް ފަހަރު އެންއެފްޓީގެ ގޮތުގައި އެހެން މީހުންގެ އުފެއްދުންތައް ވަގަށް ނަގައިގެން ޑިޖިޓަލްކުރުމަށްފަހު ވިއްކަ އެވެ. މިފަދަ މައްސަލައެއް ދާދިފަހުން ރާއްޖޭގައި ވެސް ފެންމަތިވި އެވެ. އެހެންކަމުން އެންއެފްޓީ މާކެޓުގެ ކަންކަން ވަރަށް ރަނގަޅަށް ބަލަން ޖެހެ އެވެ.
މި ހިސާބަށް އާދެވުނުއިރު އެންއެފްޓީއެއް ގަތުމަށް ތީގެ ތެރެއިން ބައެއް ކިޔުންތެރިން ޝައުގު އުފެދުމަކީ ވެދާނެ ކަމެކެވެ. ރާއްޖޭގައި ޑިޖިޓަލް ކަރަންސީ ބޭނުން ކުރުމަކީ އެހާ ފަސޭހަ ކަމަކަށް ނުވި ނަމަވެސް އެންއެފްޓީ ގަނެވޭނެ ގޮތްތައް އެބަ ހުއްޓެވެ.
އެންމެ ފުރަތަމަ ކަމަކަށް ބޭނުންވާނީ ޑިޖިޓަލް ވޮލެޓެކެވެ. މިއީ އެންއެފްޓީ އާއި އެންއެފްޓީ ގަތުމަށް ބޭނުންކުރާ ކްރިޕްޓޯކަރަންސީ ބަހައްޓާނެ ވޮލެޓެވެ. މާކެޓުގައި ހުރި އެންއެފްޓީ ގަތުމަށް ދެން ބޭނުންވާނީ ކްރިޕްޓޯކަރަންސީ އެވެ. ކޮއިންބޭސް، ކްރަކެން، އީޓޯރޯ، ޕޭޕަލް އަދި ރޮބިންހުޑް ފަދަ ޕްލެޓްފޯމުތަކުން ކްރެޑިޓު ކާޑު ބޭނުންކޮށްގެން މިފަދަ ކަރަންސީތައް ގަނެވޭނެ އެވެ. އެއަށްފަހު ވޮލެޓަށް އެ ޖަމާވާނެ އެވެ.
ދެން އޮތީ އެންއެފްޓީ މާކެޓު ރިސާޗުކޮށް އެންއެފްޓީއެއް ގަތުމެވެ. މިވަގުތު އެންމެ ބޮޑު އެންއެފްޓީ މާކެޓުތަކަކީ އޯޕެންސީ.އައިއޯ، ރެރިބަލް އަދި ފައުންޑޭޝަން އެވެ. މި ޕްލެޓްފޯމުތަކުން އެތައް ހާސް އެންއެފްޓީ ވިއްކާ އާޓިސްޓުންނާ ދިމާވާނެ އެވެ. އަދި، އެތައް ހާއްސަ އެންއެފްޓީއެއް މާކެޓަށް ނެރެފައި ހުންނާނެ އެވެ.
