ސައޮ ޕައޮލޯ، ބްރެޒިލް (އޭޕްރީލް 8) - ގަތަރުގައި މި އަހަރު ފަހު ކޮޅު ބާއްވާ ފީފާ ވޯލްޑް ކަަޕަށް ފަހު ބްރެޒިލް ގައުމީ ޓީމާ ހަވާލުވާން، މެންޗެސްޓާ ސިޓީގެ ކޯޗު ޕެޕް ގާޑިއޯލާ އަށް ހުށަހަޅާނެ ކަމަށް ސްޕެއިނާއި ދެކުނު އެމެރިކާގެ މީޑިއާތަކުން ރިޕޯޓްކޮށްފި އެވެ.
ބްރެޒިލް ފުޓްބޯލް ކޮންފެޑެރޭޝަން (ސީބީއެފް)ގެ ޑިރެކްޓަރު ޖުނީނިއޯ ޕައުލިސްޓާ ދާދި ފަހުން ސްޕެއިންގެ ނޫހެއް ކަމަށްވާ، މަރްކާ އަށް ދިން އިންޓަވިއުއެއްގައި ބުނެފައިވަނީ މިހާރު ފެންނަ މަންޒަރުތަކަށް ބަލާއިރު، މި ފަހަރުގެ ވޯލްޑް ކަޕަށް ފަހު ބްރެޒިލްގެ ކޯޗުގެ މަގާމުގައި މި ވަގުތު ހުރި ޓީޓޭ ވަޒީފާ އިން އަމިއްލަ އަށް ވަކިވާނެ އެވެ. އެކަމަކު، ރަސްމީކޮށް ޓީޓޭގެ ނިންމުމެއް އެނގޭނީ ވޯލްޑް ކަަޕަށް ފަހު ކަމަށް ޖުނީނިއޯ ބުނެފައިވެ އެވެ.
ދެކުނު އެމެރިކާގެ ކުޅިވަރު ހަބަރުފަތުރާ ގިނަ މީޑިއާތަކުން ރިޕޯޓްކޮށްފައިވާ ގޮތުގައި ޓީޓޭ، ބްރެޒިލް ދޫކޮށްލާނީ ގަތަރު ވޯލްޑް ކަޕް ކާމިޔާބު ނުކުރެވިއްޖެނަމަ އެވެ.
ބްރެޒިލުން އެންމެ ފަހުން ވޯލްޑް ކަޕް ޗެމްޕިއަންކަން ހޯދީ 2002 ވަނަ އަހަރު އެވެ. މި ފަަހަރުގެ ވޯލްޑް ކަޕަށް ބްރެޒިލުން ކުރިމަތިލާނީ އެންމެ ފަހުން ހަތަރު ފަހަރެކޭ އެއް ގޮތަށް ފޭވަރިޓުންގެ ގޮތުގަ އެވެ. ފީފާ އިން އެންމެ ފަހުން ނެރުނު ރޭންކިންގެ އެއް ވަނައިގައި އޮތް، ފަސް ފަަހަރު ވޯލްޑް ކަޕްގެ ޗެމްޕިއަންކަން ހޯދި ބްރެޒިލް އިން މި ފަހަރުގެ ވޯލްޑް ކަޕަށް ވަރަށް ބޮޑަށް ތައްޔާރުވާނެ ކަމަށް ޓީޓޭ ވަނީ ވޯލްޑް ކަޕްގެ ގުރުއަތުލުމަށް ފަހު ބުނެފަ އެވެ.
ގަތަރު ވޯލްޑް ކަޕް ފަށާނީ ނޮވެމްބަރު 21 ވަނަ ދުވަހު އެވެ. ބްރެޒިލް ކުޅޭ. މެޗު އޮތީ އޭގެ ތިން ދުވަސް ފަހުންނެވެ. ބްރެޒިލުން ފުރަތަމަ ކުޅޭނީ ސާބިއާއާ އެވެ. ދެ ވަނަ މެޗުގައި ސްވިޒަލެންޑާ ކުޅޭއިރު، ފަހު މެޗުގައި ބައްދަލުކުރާނީ ކެމަރޫންއާ އެވެ.
ސީބީއެފް އިން ތައްޔާރުވަނީ ހަމައެކަނި މި ފަހަރުގެ ވޯލްޑް ކަޕަށް އެކަންޏެއް ނޫނެވެ. އެ އަށް ވުރެ ދުރު ވިސްނުމެއްގަ އެވެ. އެ ގޮތުން ޓީޓޭ އަށް ފަހު ދެން ހަވާލުވާ ކޯޗަކަށް ބްރެޒިލުން ދޭން ބޭނުންވަނީ 2026 ވަނަ އަހަރު އެމެރިކާ އާއި މެކްސިކޯ އަދި ކެނަޑާގައި ބާއްވާ ވޯލްޑް ކަޕްގެ ނިޔަލަށް ހަދާފައިވާ ކޮންޓްރެކްޓެެކެވެ. އަދި އެ ކޮންޓްރެކްޓްގައި ބޮޑު މުސާރައެއް ހިމަނަން ވެސް ބްރެޒިލުން އޮތީ ތައްޔާރަށެވެ.
ގާޑިއޯލާ އަކީ ބްރެޒިލްގެ ފުޓްބޯޅަ ކޮންފެޑެރޭޝަނުން އެންމެ ބޭނުންވާ ކޯޗެކެވެ. ގާޑިއޯލާ މި ވަގުތު ސިޓީގެ ކޯޗަކަށް ހުރީ އަންނަ އަހަރުގެ ޖޫން މަހުގެ ނިޔަލަށް ހަދާފައިވާ އެއްބަސްވުމެއްގެ ދަށުންނެވެ.
ބްރެޒިލުން ދެން އެ ޓީމަށް ގެންނަ ކޯޗަކަށް މުސާރައިގެ ގޮތުގައި އަހަރަކު، 13 މިލިއަން ޑޮލަރު ދޭން ފަސް ނުޖެހޭނެ ކަމަށް ރިޕޯޓްތައް ބުނެ އެވެ. އެކަމަކު، އެއީ މި ވަގުތު ވެސް ސިޓީގައި ގާޑިއޯލާ އަށް އަހަރަކު ލިބޭ މުސާރަ އަށް ވުރެ ކުޑަ އަދަދެކެވެ. ގާޑިއޯލާ މި ވަގުތު ސިޓީގައި ހުރީ އަހަރަކު 21 މިލިއަން ޑޮލަރުގެ މުސާރަ އަކަށެވެ.
މީގެ ކުރިން ގާޑިއޯލާ ވަނީ ގައުމީ ޓީމެއްގެ ކޯޗަކަށް ހުރެ، އޭގެ ތަޖުރިބާ ކޮށްލަން ބޭނުންވާ ކަމަށް ބުނެފަ އެވެ. އެކަމަކު، ކޯޗިން ކެރިއަރުގައި ކުރިއަށް ގިނަ އަަހަރުތަކެއް އޮއްވައި، ގައުމީ ޓީމަކާ ހަވާލުވާން ގާޑިއޯލާ ނިންމުމަކީ ދުރު ކަމެއްގެ ގޮތުގައި ސްޕެއިނުގެ ފުޓްބޯޅަ ތަޖުރިބާކާރުން ގަބޫލުކުރެ އެވެ. އެއީ ގާޑިއޯލާގެ އުމުރުން 51 އަހަރުވީއިރު، އާންމު ގޮތެއްގައި ގިނަ ކޯޗުން ގައުމީ ޓީމަށް އިރުޝާދުދޭން ނިންމަނީ ކްލަބް ލެވަލްގައި ގިނަ އަހަރުތަކެއް ކޯޗުކޮށްދީފައި ކަމަށްވާތީ އެވެ. ގާޑިއޯލާ ކޯޗިން އަށް ނުކުތީ 2008 ވަނަ އަހަރު ބާސެލޯނާ އިންނެވެ.
