ސިއްހީ ހިދުމަތާއި، ތަރިކަ ދިރުވައި އާލާކުރުމާއި އަދި ޒުވާނުން ކުރިއެރުވުމަށް އަމާޒުކޮށް އިންޑިއާއިން ރާއްޖޭގެ ހަތް އަތޮޅެއްގައި 27 މިލިއަން ރުފިޔާގެ އާ ހަތް މަޝްރޫއެއް ކުރިޔަށްގެންދިޔުމަށް ނިންމައިފި އެވެ.
އިންޑިއާގެ ހައި އިމްްޕެކްޓް ކޮމިއުނިޓީ ޑެވެލޮޕްމެންޓް ޕްރޮޖެކްޓްތަކުގެ ދަށުން ރާއްޖޭގައި ކުރިޔަށްގެންދާ އެ މަޝްރޫއުތަކުގެ ތެރޭގައި ކުޅުދުއްފުށި ހޮސްޕިޓަލުގައި އޯޑިއޮލޮޖީ ނުވަތަ ކަންފަތަށް އަޑުއިވުމުގެ މައްސަލަތައް ދަނެގަނެ އެކަންކަމަށް ފަރުވާދޭ ސެންޓަރެއް ގާއިމުކުރުމުގެ އިތުރުން އައްޑޫގައި ހުންނަ އިކުއެތޯރިއަލް ހޮސްޕިޓަލުގައި މެންޓަލް ހެލްތު ޔުނިޓެއް ގާއިމުކުރުން ވެސް ހިމެނެ އެވެ. އަދި ހުޅުމާލެ ހޮސްޕިޓަލުގައި ޕްރޮސްތެޓިކްސް އަދި އޯތޮޓިކްސް ޔުނިޓެއް އެޅުން ވެސް ހިމެނެ އެވެ.
ހަމަ އެއާއެކު ނ. ލަންދޫގައި ހުންނަ މާބުދުގެ އަދި ތ. އަތޮޅު ދިޔަމިގިލީގައި ހުންނަ ގަނޑުވަރު ދާރުލްއާސާރުތަކަށް ހަދައި ހިމާޔަތްކުރާ މަޝްރޫއެއް ހިމެނެ އެވެ. މާބުދުގެއާއި ދިޔަމިގިލީގައި ހުންނަ ގަނޑުވަރަކީ ވެސް ވީރާނާވެ ހަލާކުވުމުގެ ބިރު ހީވެފައިވާ ދެ ތަނެވެ.
އޭގެ އިތުރުން ވެސް ދެން އިންޑިއާއިން ކުރިޔަށް ގެންދަން ނިންމާފައިވާ މަޝްރޫއުތަކަކީ ނ. މަނަދޫގައި މަލްޓި-ސްޕޯޓްސް ކޮމްޕްލެކްސްއަކާއި އދ. ދިގުރަށާއި ގއ. ގެމަނަފުށީގައި ޔޫތު ސެންޓަރުތަކެއް އަޅައިދިނުމަށް މަޝްރޫއުތަކެވެ.
އެ މަޝްރޫއުތަކަކީ މިފަހުން އިންޑިއާގެ އެކްސްޓާާނަލް އެފެއާޒް މިނިސްޓަރު ޑރ. އެސް. ޖައިޝަންކަރު ރާއްޖެއަށް ވަޑައިގަތް ދަތުރުފުޅުގައި ކުރިޔަށް ގެންދަން ނިންމި މަޝްރޫއުތަކެކެވެ.
އެއާއެކު އިންޑިއާއިން ރާއްޖޭގައި ކުރިޔަށް ގެންދާ ހައި އިމްޕެކްޓް މަޝްރޫއުތަކުގެ ޖުމްލަ އަދަދު މިވަނީ 27 އަށް އަރައިފަ އެވެ. މިފަހުން ވެސް އިންޑިއާގެ އެހީތެރިކަމާއެކު އައްޑޫގައި ވަނީ "ވިލުނު" ގެ ނަމުގައި ޑްރަގް ޑިޓޮކްސިފިކޭޝަން ސެންޓަރެއް ހުޅުވައިފަ އެވެ. އިންޑިއާއިން ރާއްޖޭގައި ކުރިޔަށްގެންދާ ހައި އިމްޕެކްޓް މަޝްރޫއުތަކަށް ޖުމްލަ 155 މިލިއަން ރުފިޔާ ހަރަދުކުރަން ވަނީ ނިންމައިފަ އެވެ.
