ރަޝިއާގެ ޕަބްލިކް އަދި ޕްރައިވެޓް ބޭންކުތަކާއި ރައީސް ލެޑިމިއަ ޕުޓިންގެ ދެ ދަރިކަނބަލުންނަށް ދަތިކުރުމުގެ ފިޔަވަޅު އަޅަން ނިންމައި، އެމެރިކާއިން އިއުލާނުކޮށްފި އެވެ.
އަލަށް އިއުލާން ކުރި ފިޔަވަޅުތަކުގެ ދަށުން ޕުޓިން އާއި ކުރީގެ އަނބިކަނބަލުން ލިޔުޑްމިލާ ޝްކްރެބްނެވާގެ ދެ ދަރިކަނބަލުން، މަރިއާ ވޮރޮންޓްސޮވާ އަދި ކަޓެރިނާ ޓިހޮނޮވާއަށް އަމާޒު ކުރެ އެވެ.
އޭގެ އިތުރުން ރަޝިއާގެ ފޮރިން މިނިސްޓަރު ސާގެއި ލެވްރޯވްގެ އަނބިކަނބަލުންނާއި ދަރިކަނބަލުންނަށް ވެސް ދަތި ކުރުމުގެ ފިޔަވަޅުތައް އަމާޒު ކުރާނެ އެވެ.
އިތުރަށް އަމާޒު ކުރި ފަރާތްތަކުގެ ތެރޭގައި ހިމެނެނީ ރަޝިއާގެ ސަލާމަތީ މަޖިލީހުގެ ހުރިހާ މެމްބަރުންނެވެ. އޭގެ ތެރޭގައި ކުރީގެ ރައީސް އަދި ބޮޑު ވަޒީރު ޑިމިޓްރީ މެޑްވެޑޭވް އަދި ކުރީގެ ބޮޑު ވަޒީރު މިކާއިލް މިޝުސްޓިން ހިމެނިވަޑައިގަންނަވަ އެވެ.
"މި ފަރާތްތައް ވަނީ ރަޝިއާ ރައްޔިތުންނަށް ލިބޭނެ ގެއްލުމަކަށް ނުބަލައި، އަމިއްލަ މުއްސަނދިކަން އިތުރުކޮށްފައި. އޭގެ ތެރެއިން ބައެއް މީހުން ދަނީ ޕުޓިން ޔޫކްރެއިންގައި ކުރާ ހަނގުރާމައަށް އެއްބާރުލުން ދެމުން،" ވައިޓް ހައުސްގެ ބަޔާނެއްގައި ބުންޏެވެ.
"އަޅުގަނޑުމެން ދެކޭ ގޮތުގައި ޕުޓިންގެ މުދާ ފޮރުވާފައި ވަނީ އާއިލާ މެމްބަރުންގެ އެހީގައި. އާއިލާގެ ފަރާތްތަކަށް އަމާޒު ކުރަން ޖެހެނީ އެހެންވެ،" އެމެރިކާގެ އިސް އޮފިޝަލަކު ނޫސްވެރިންނަށް ވިދާޅުވި އެވެ.
އެމެރިކާ އާއި ހުޅަނގުގެ ގައުމުތަކުން ރަޝިއާއާ ދެކޮޅަށް ދަތިކުރުމުގެ އާ ފިޔަވަޅުތަކެއް އިއުލާން ކުރަން ނިންމީ، ޔޫކްރެއިންގެ ބައެއް ހިސާބުތަކުގައި ރަޝިއާ ސިފައިން ގަތުލުއާއްމު ހިންގާފައިވާ ކަމަށް ބެލެވޭތީ އެވެ.
