ޓްވިޓާއިން ފޯރުކޮށްދޭ ސަބްސްކްރިޕްޝަން ހިދުމަތާ އެކު "އެޑިޓް ބަޓަން" ޓެސްޓު ކުރުމުގެ މަސައްކަތް ފަށާނެކަން އިއުލާންކޮށްފި އެވެ.
ޓްވީޓު ކުރުމަށް ފަހު އެޑިޓު ކުރެވޭނެ ނުވަތަ ބަދަލު ގެނެވޭނެ ފީޗާއެއް ހޯދުމަށް ޓްވިޓާ ބޭނުން ކުރާ ގިނަ ބަޔަކު އެދެމުން ދާތާ ދުވަސްތަކެއް ވެއްޖެ އެވެ.
"ޓްވިޓާ ބްލޫ" ނުވަތަ ކޮންމެ މަހަކު ފީއެއް ދައްކައިގެން ސަބްސްކްރައިބު ކުރެވޭ ހާއްސަ ފީޗާތަކުގެ ތެރެއިން "އެޑިޓް ބަޓަން" ތައާރަފް ކުރާނެ ކަމަށް ކުރިން ވެސް އޮތީ ބެލެވިފަ އެވެ.
ޓްވިޓާގެ ގިނަ އަދަދެއްގެ ހިއްސާތައް ގަނެ، އާ ބޯޑު މެމްބަރެއްގެ ގޮތުގައި ހަމަޖައްސާފައިވާ ބިލިއަނަރު އެލޮން މަސްކް ދާދި ފަހުން ވަނީ "އެޑިޓް ބަޓަން" އާ ބެހޭ ގޮތުން އާއްމުންގެ ހިޔާލު ހޯދާފަ އެވެ.
މަސްކް ކުރި ޓްވީޓެއްގައި ސުވާލުކޮށްފައި ވަނީ ޓްވިޓާއަށް "އެޑިޓް ބަޓަން" ތައާރަފް ކުރުމާ މެދު ދެކޭ ގޮތް ހޯދުމަށެވެ. ގާތްގަނޑަކަށް 4.4 މިލިއަން މީހުން ޕޯލްގައި ބައިވެރިވި އެވެ. އޭގެ ތެރެއިން 73 ޕަސެންޓް މީހުން ބުނީ "އެޑިޓް ބަޓަން" ބޭނުންވާ ކަމަށެވެ.
"ހުރިހާ އެންމެން މި ސުވާލު ކުރަމުން ދާތީ އަޅުގަނޑުމެން ހާމަކުރަން ބޭނުން. މިދިޔަ އަހަރުން ފެށިގެން އެޑިޓް ފީޗާއެއްގެ މަސައްކަތް ދަނީ ކުރިއަށް،" ޓްވިޓާއިން ބުންޏެވެ.
"އެކަމަކު އެއީ މަސްކްގެ އޮންލައިން ޕޯލްއާ ގުޅިގެން އަޅުގަނޑުމެންނަށް އައި ވިސްނުމެއް ނޫން."
ޓްވިޓާއިން ބުނީ "ޓްވިޓާ ބްލޫ" ސަބްސްކްރިޕްޝަން ބޭނުން ކުރާ ފަރާތްތަކަށް "އެޑިޓް ބަޓަން" ތައާރަފުކޮށް، އެ ފީޗާގެ ޓެސްޓްތައް ވަރަށް އަވަހަށް ފަށާނެ ކަމަށެވެ.
"ޓްވިޓާ ބްލޫ" އަކީ ކޮންމެ މަހަކު ތިން ޑޮލަރު ދައްކައިގެން ހާއްސަ ފީޗާތަކާއި ހާއްސަ ކޮންޓެންޓަށް އެކްސެސްވެވޭ ހިދުމަތެކެވެ.
ޓްވިޓާއިން ބުނީ ސަބްސްކްރިޕްޝަން ހިދުމަތް މިހާރު ލިބެނީ އެޕަލް އަދި އެންޑްރޮއިޑް ސްމާޓްފޯނުތަކަށް އޮސްޓްރޭލިއާ، ކެނެޑާ، ނިއުޒީލޭންޑް އަދި އެމެރިކާގައި ކަމަށެވެ.
