ކްރިކެޓް ބޯޑް އޮފް މޯލްޑިވްސް (ސީބީއޭއެމް) އިން ކޮންމެ ރަމަޟާން މަހަކަށް ހާއްސަކޮށްގެން ކުރިއަށްގެންދާ ކްރިކެޓް ކާނިވަލުގައި އިއްޔެ ހަވީރު ކުޅުނު މެޗުތަކުން ކިންޒާ ކެފޭ އާއި މޯލްޑިވްސް އެއާޕޯޓް ކޮމްޕެނީ މޮޅުވެއްޖެ އެވެ.
ކުޅިވަރު އެކުވެނީ އެއް ނަންބަރު ދަނޑުގައި އިއްޔެ ހަވީރު ކުޅުނު ފުރަތަމަ މެޗުން ލަވާލިޔާއާ ބައްދަލުކޮށް ނުވަ ލަނޑުން ކާމިޔާބުކުރީ ކިންޒާ ކެފޭ އެވެ. އަދި އެ މެޗަށް ފަހު ކުުޅުނު އިއްޔެގެ ދެ ވަނަ މެޗުގައި ގަލޮޅު ކަންމަތީ ޓީމު އަތުން 8 ވިކެޓުން މޯލްޑިވްސް އެއާޕޯޓް ކޮމްޕެނީ ވަނީ މޮޅުވެފަ އެވެ.
ފުރަތަމަ މެޗުގައި ޓޮސް ދިމާވީ ލަވާލިޔާއާ އެވެ. އެ ޓީމުން ނިންމީ ފީލްޑް ކުރާށެވެ. ކިންޒާ ކެފޭ އިން ކުޅެން އަރައި އަށް އޯވަރު ހަމަވިއިރު 4 ކުޅުންތެރިން ނުބައިވެގެން ހެދީ 126 ލަނޑެވެ. އެންމެ ރަނގަޅަށް ކުޅުނީ 30 ލަނޑު ހެދި ސަލާމް މުހަންމަދު އެވެ.
ޖަވާބުގައި ކުޅެން އަރައި، ލަވާލިޔާ އިން 8 އޯވަރު ތެރޭ ދެ ކުޅުންތެރިން ނުބައިވެގެން ހެދުނީ 117 ލަނޑެވެ. ލަވާލިޔާ އަށް އެންމެ ރަނގަޅު ކުޅުމެއް ދެއްކީ 29 ލަނޑު ހެދި އައްސަދު އަބްދުލްޢަނީ އެވެ. އަދި އެ ޓީމުގެ އިސްމާއިލް ނާސިހް ވަނީ 21 ލަނޑު އެއްކޮށްފަ އެވެ.
އިއްޔެގެ ދެ ވަަނަ މެޗުގައި ގަލޮޅު ކަންމައްޗަށް ޓޮސް ދިމާވުމުން ނިންމީ ކުޅޭށެވެ. ގަލޮޅު ކަންމަތި ޓީމުން ކުޅެން އަރައި އަށް އޯވަރު ހަމަވިއިރު، ހަ ކުޅުންތެރިން ނުބައިވި އެވެ. ސްކޯޜިން ވެސް އެހާ ރަނގަޅެއް ނޫނެވެ. ހެދުނީ އެންމެ 67 ލަނޑެވެ. އެންމެ ރަނގަޅު ކުޅުމެއް ދެއްކީ 26 ލަނޑު ހެދި މުހައްމަދު އަފްލާހު އެވެ. އެއާޕޯޓް ޓީމުގެ އަހުމަދު އަމީލް ތިން ވިކެޓް އަދި އާދަމް ނާސިފް ދެ ވިކެޓް ނަގާފައިވެ އެވެ. އެއާޕޯޓް ޓީމުން ކުޅެން އަރައި ތިން އޯވަރުގެ ތެރޭގައި 68 ލަނޑު ހަދައި މެޗު ނިންމާލި އެވެ. އެންމެ ރަނގަޅަށް ކުޅުނީ 20 ލަނޑު ހެދި ނާސިފް އެވެ.
މުބާރާތުގައި މިއަދު ވެސް ދެ މެޗެއް ކުޅޭނެ އެވެ. މެޗުތައް ފަށާނީ ހަވީރު 16:00 ގަ އެވެ. ފުރަތަމަ މެޗުގައި ގަލޮޅު ކަންމަތި ނުކުންނާނީ މެރީ ކޯނާއާ ދެކޮޅަށެވެ. އަދި ދެ ވަނަ މެޗުގައި އެވިއާ މޯލްޑިވްސް ބައްދަލުކުރާނީ އެއާޕޯޓް ރެކްރިއޭޝަން ކްލަބާ އެވެ.
