މައިކްރޯ ބްލޮގިންގް ސޯޝަލް މީޑިއާ ޕްލެޓްފޯމް ޓްވިޓާގެ 9.2 ޕަސެންޓު ހިއްސާ ބިލިއަނަރު އެލޮން މަސްކް ގަނެފި އެވެ.
އެމެރިކާގެ ސެކިއުރިޓީޒް އެންޑް އެކްސްޗޭންޖް ކޮމިޝަނުން ބުނީ ޓްވިޓާގެ 73،486،938 ހިއްސާ މަސްކް ގަނެފައި ވަނީ މާޗް 14 ވަނަ ދުވަހު އެވެ.
އެއީ 2.89 ބިލިއަން ޑޮލަރުގެ އަގަށްވާ ހިއްސާ އެވެ. އެއާ އެކު މަސްކްއަކީ މިހާރު ޓްވިޓާގެ އެންމެ ބޮޑު އެއް ޝެއާހޯލްޑަރެވެ. އެއީ ޓްވިޓާގެ ފައުންޑަރު ޖެކް ޑޯސީއަށް ވުރެ ހަތަރު ގުނަ އިތުރު ހިއްސާ އެވެ.
މަސްކްއަކީ ގަވާއިދުން ޓްވިޓާ ބޭނުން ކުރާ މަހުޖަނެކެވެ. ޓްވިޓާގައި 80 މިލިއަނަށް ވުރެ ގިނަ މީހުން އޭނާ ފޮލޯކުރެ އެވެ. އޭނާ ދާދި ފަހުން ބުނެފައި ވަނީ މުޅިން އާ ސޯޝަލް މީޑިއާ ޕްލެޓްފޯމެއް ބިނާކުރަން "ވަރަށް ސީރިއަސްކޮށް ވިސްނަމުންދާ" ކަމަށެވެ.
މިދިޔަ މަހު މަސްކް ވަނީ ޓްވިޓާޢިން ހިޔާލު ފާޅު ކުރުމަށް ފުރުސަތު ފަހިކޮށްދޭތޯ ސުވާލ އުފައްދާފަ އެވެ. އަދި އާ ޕްލެޓްފޯމެއް ބޭނުންތޯ ވެސް އޭނާގެ ފޮލޯވަރުންގެ ކައިރިން ސުވާލު ކުރި އެވެ.
މަސްކްއަކީ އޭނާގެ ކުންފުނިތަކާ ގުޅޭ މައުލޫމާތު ހިއްސާ ކުރުމަށް ގަވާއިދުން ޓްވިޓާ ބޭނުން ކުރާ މީހެކެވެ. އެގޮތުން ޓެސްލާ، ސްޕޭސްއެކްސް އަދި ނިޔުރާލިންކްގެ މައުލޫމާތު ވެސް ޓްވިޓާ މެދުވެރިކޮށް އާއްމުކުރެ އެވެ.
