އައްމާން، އުރުދުން (އެޕްރީލް 3) - އިޒްރޭލާއި ފަލަސްތީނާ ދެމެދު ހަމަނުޖެހުން އިތުރުވަމުން ދާތީ އުރުދުންގެ ރަސްގެފާނު އަބްދުﷲ ދެ ވަނަ ކަންބޮޑުވުން ފާޅުކުރައްވައިފި އެވެ.
އިޒްރޭލުގެ ބޮޑު ވަޒީރު ނަފްތާލީ ބެނެޓްއަށް އާދީއްތަ ދުވަހު ފޯނުން ގުޅުއްވައި ރަސްގެފާނު ވިދާޅުވީ ފަލަސްތީނާއި އިޒްރޭލާ ދެމެދު "ހަމަޖެހުން" އޮތުން މުހިއްމު ކަމަށެވެ.
ރަސްގެފާން އަބްދުﷲ ގޮވާލެއްވީ އަލް އަގްސާ މިސްކިތުގައި އެއްވެސް ހުރަހެއް ނެތި ރޯދަ މަހު މުސްލިމުންނަށް އަޅުކަން ކުރެވޭނެ މަގު ތަނަވަސްކޮށްދިނުމަށެވެ.
މާޗް 22 ވަނަ ދުވަހުގެ ފަހުން އިޒްރޭލުގައި ދީފައިވާ ތަފާތު އެކި ހަމަލާތަކުގައި 11 މީހުން މަރުވެފައިވެ އެވެ. ބައެއް ހަމަލާތައް ދިނީ އިސްލާމިކް ސްޓޭޓް (އައިއެސް) އާ ގުޅުން ހުރި މީހުންނެވެ.
ހަމަ އެ މުއްދަތުގައި ދިން ހަމަލާތަކުގައި ފަލަސްތީނުގެ އަށް މީހުން މަރުވެފައިވާ ކަމަށް އޭއެފްޕީގެ ތަފާސްހިސާބުން ދައްކަ އެވެ.
ބެނެޓްގެ އޮފީހުން ބުނީ އިޒްރޭލުގައި ހިންގާފައިވާ "ޓެރަރިސްޓް ހަމަލާތަކާ" ދެކޮޅަށް ރަސްގެފާނު ވާހަކަފުޅު ދެއްކެވުމުން ބޮޑު ވަޒީރު ޝުކުރު އަދާ ކުރެއްވި ކަމަށެވެ.
އޭގެ އިތުރުން އިޒްރޭލާއި އުރުދުން ގުޅިގެން މަސައްކަތް ކުރުމުގެ މުހިއްމު ކަމާއި، ދެ ގައުމުގެ ގުޅުމާއި މަޝްވަރާތައް ދަމަހައްޓަން ވާހަކަ ދެއްކެވި ކަމަށް ބެނެޓްގެ އޮފީހުން ބުންޏެވެ.
މިދިޔަ އަހަރުގެ ރޯދަ މަހު އިޒްރޭލާއި ގާޒާގައި ވެރިކަން ކުރާ ހަމާސްއާ ދެމެދު 11 ދުވަހުގެ ހަނގުރާމައެއް ކުރީ އަލް އަގްސާ މިސްކިތުގައި އަޅުކަން ކުރަން ހުރަސްތަކެއް ކުރިމަތިވި ފަހުންނެވެ.
